Niaklajeŭ pradublavaŭ svajo vystupleńnie pa radyjo

Uładzimir Niaklajeŭ skarystaŭsia pravam u druhi raz vystupić pa Biełaruskim radyjo (30 listapada z 6.40 da 7.10), adnak u efir vyjšaŭ pieršy aŭdyjozapis kandydata ŭ prezidenty ad 23 listapada.

«Kali niechta vam budzie kazać, što paet Uładzimir Niaklajeŭ mała što razumieje ŭ palitycy i nie moža być prezidentam — nie viercie, bo ja ŭžo dakazaŭ, što ja nasamreč palityk», — skazaŭ kandydat.

Jon zaznačyŭ, što stvaryŭ hramadzianskuju kampaniju «Havary praŭdu!» — «samuju mocnuju hramadskuju arhanizacyju ŭ Biełarusi». Kandydat paviedamiŭ, što jaho rejtynh składaje 17% — «heta značna bolš, čym rejtynh luboha inšaha sapiernika Łukašenki». «Heta značyć u Niaklajeva samyja vialikija šancy na pieramohu na prezidenckich vybarach», — skazaŭ jon.

Niaklajeŭ paabiacaŭ, što «kožnaja maci pry naradžeńni dziciaci budzie atrymlivać maciarynski kapitał, roŭny 25 tys. dołaraŭ».

Aprača taho, buduć viernuty ŭkłady nasielnictva, zroblenyja ŭ savieckija časy, — «kali nie ŭsie adrazu, to častkova, abo kampiensujem pasłuhami, tavarami — tymi, jakija niekali vy, źbirajučy tyja hrošy, chacieli kupić». U vypadku abrańnia prezidentam kandydat płanuje vypłačvać kampiensacyi dzieciam vajny, jak heta robić Ukraina.

Niaklajeŭ vykazaŭ abureńnie skasavańniem ilhotaŭ dla piensijanieraŭ, «čarnobylcaŭ», studentaŭ i inšych katehoryj hramadzian. «Ci tak užo lubić dziaržava svaich hramadzian, jak pra heta raspaviadaje jaje kiraŭnik? Jak vynikaje nie sa słoŭ Łukašenki, a ź jaho dziejańniaŭ, lubić jon nie piensijanieraŭ i nie studentaŭ, a tolki samoha siabie, prezidenta», — miarkuje Niaklajeŭ.

«Łukašenka — jak toj burak čyrvony, jaho śviadomaść zastajecca savieckaj, i jon užo nie zdolny jaje źmianić, tamu treba mianiać jaho samoha, jon staŭ pieraškodaj na našym šlachu», — skazaŭ kandydat.

Jon zajaviŭ, što budzie zachavana ŭsio dobraje, što było zroblena pry Łukašenku, «ale hetaha niedastatkova, kab zachavać Biełaruś». Na dumku Niaklajeva, treba źmianić palityčnuju sistemu, padzialić haliny ŭłady, pakinuć u minułym strach, jaki panuje ŭ hramadstvie.

«Ja, novy prezident Uładzimir Niaklajeŭ, admianiu hety strach. Kožny budzie volny kazać pra toje, u čym upeŭnieny, i tak, jak ličyć patrebnym, dziejničać. Pravy čałavieka buduć achoŭvacca zakonam nieparušna», — skazaŭ Niaklajeŭ. Jon paabiacaŭ pravieści «takuju palityčnuju reformu, jakaja navat tearetyčna nie dazvolić viarnucca da dyktatury — nikoli i nikomu».

«U vas u kožnaha budzie i svaja łyžka, i svoj kacioł, i svaja kaša ŭ im. Pieršym zakonam, jaki raspracuje parłamient i padpiša prezident, budzie zakon ab małym i siarednim biźniesie», — zajaviŭ Niaklajeŭ.

Jon ličyć, što raźvivać adnosiny ź ES nieabchodna, «ale nie canoj ža takoha rezkaha pavarotu ad Rasii».

Kandydat skieptyčna stavicca da prapanovy ES vydzielić Biełarusi 3 młrd. jeŭra ŭ vypadku praviadzieńnia siońniašniaj uładaj sumlennych vybaraŭ: «Nie vyrašać 3 młrd. jeŭra prablem Biełarusi, źniešni doŭh jakoj siońnia 25 młrd. dołaraŭ. A voś pierakryć z novaha hoda rasijski haz i pakinuć nas na zimu ŭ choładzie hetyja try miljardy mohuć. Ja ŭpeŭnieny, što Jeŭrasajuz, jaki za try miljardy patrabuje ad Łukašenki demakratyzacyi Biełarusi, budzie ŭ čakańniach svaich padmanuty».

• 0
• 0
• 0
• 0
• 0
• 0
• 0
• 0