Čałaviek hoda — Mikałaj Kazłoŭ

Pa tradycyi ŭ apošnim numary «Naša Niva» vyznačaje ludziej hoda. Tych, čyje ŭčynki zapomnilisia, paŭpłyvali na historyju. Samyja jarkija asoby hoda ŭ rejtynhu «NN». Padziei 19 śniežnia i toje, što zdaryłasia paśla ich, pieraviarnuli situacyju ŭ krainie. Jany jašče nie skončylisia, nie asensavalisia. Pad imi nie padviedziena rysa, jany nie stali historyjaj. Tamu my prapanujem śpis takim, jakim my jaho skłali na 18 śniežnia. Hierojaŭ i zładziejaŭ apošnich 12 dzion vy bačycie z našaj infarmacyjnaj stužki.

18 śniežnia čałaviekam 2010 hoda my pryznali padpałkoŭnika Mikałaja Kazłova. Bieź jaho i biez takich, jak jon, napeŭna, nie było b i manifiestacyi 19 śniežnia, śviet nie pabačyŭ by sutnaści biełaruskich «vybaraŭ».

Padpałkoŭnik milicyi Mikałaj Kazłoŭ

prademanstravaŭ asabistuju mužnaść i prystojnaść. Jašče ŭ 2008 hodzie jon aficyjna zafiksavaŭ ukidy biuleteniaŭ na adnym z vybarčych učastkaŭ u Minsku. Kazłova prasili adklikać hety rapart, zamiać spravu. Milicyjant prajaviŭ pryncypovaść.

Situacyja razhortvałasia tak, što ŭ apošni dzień daterminovaha hałasavańnia staršynia kamisii paprasiła ŭ Kazłova klučy ad pamiaškańnia, dzie znachodziłasia skrynka. Kazłoŭ admoviŭsia, ale potym jamu pastupiŭ zvanok ad ułasnaha načalnika. Tym nie mienš, milicyjant napisaŭ rapart.

Jamu paabiacali, što spravu raskryjuć. Sioleta jon pierakanaŭsia, što nichto raskryvać hetaje złačynstva nie źbirajecca. Kazłoŭ źviarnuŭsia da žurnalistaŭ.

Jarmošyna nazvała jahonyja pakazańni «staroj pravakacyjaj».

Kali Kazłoŭ ahučvaŭ hetyja źviestki, to jon nie šukaŭ ułasnaj vyhady. Jon pa-raniejšamu praciahvaje žyć u Biełarusi i nikudy źjazdžać nie źbirajecca. U vypadku suda jon hatovy dać pakazańni. Čałaviekam prosta ruchała ŭzmocnienaje pačućcio spraviadlivaści.

Učynak Kazłova staŭ prykładam dla inšych ludziej, što taksama byli śviedkami parušeńniaŭ zakona, ale nie advažvalisia pra ich zajavić. Hetak, były staršy śledčy žodzinskaj milicyi Andrej Pyžyk raskazaŭ, jak jaho prymušali sfalšavać kryminalnuju spravu suprać vieterana-afhanca, jaki staŭ lidaram apazicyi ŭ Žodzinie.

Palityk hoda — Mikałaj Aŭtuchovič

Vaŭkavyski pradprymalnik Mikałaj Aŭtuchovič z honaram vynies sudovy praces. Jaho abvinavačvali ŭ padrychtoŭcy terakta suprać staršyni Hrodzienskaha abłvykankama Uładzimira Saŭčanki i namieśnika ministra pa padatkach i zborach Vasila Kamianko. Aŭtuchoviča možna ličyć pieramožcam, bo abvinavačvańni byli źniatyja. Adnak byłoha afhanca ŭsio adno «zakryli» za piać patronaŭ na piać hadoŭ. Ciapier jon praciahvaje adbyvać pakarańnie ŭ Ivacevickaj kałonii.

Haspadar hoda — Uładzimir Matusievič

Svoj majontak Macki fiermier Uładzimir Matusievič pačaŭ stvarać jašče pry kancy 1980-ch. Jon kaža, što chacieŭ adyści ad zvykłaj u našym razumieńni vioski. Jon braŭ prykład z haspadarak Francyi, Vialikabrytanii.

Pryčym, forma ŭłasnaści ŭ jaho jakraz i nazyvajecca majontak, choć i davodziłasia šmat pavajavać praz heta ź biurakratami. Usie papiery Matusievič zapaŭniaŭ tolki pa-biełarusku.

Siońnia jahonaja haspadarka śpiecyjalizujecca na harodninie. Jon vyroščvaje praktyčna ŭsie vidy kapusty, jakija jość u śviecie, a taksama cybulu, sielderej, piatrušku. A jašče cełyja płantacyi kvietak. Heta tytaničnaja praca, ale radasnaja. Matusievič buduje svaje Macki tak, jakoj choča bačyć usiu Biełaruś.

U asobie spadara Uładzimira Matusieviča my ŭšanoŭvajem usich novych biełaruskich haspadaroŭ.

Hieroj hoda — Siarhiej Kavalenka

Na pravasłaŭnaje Rastvo budaŭnik Siarhiej Kavalenka vyviesiŭ vializny bieł-čyrvona-bieły ściah na hałoŭnaj jalincy Viciebska. Pryhožy ŭčynak mužnaha čałavieka. Kavalenka nie admaŭlaŭsia, skazaŭšy, što dla jaho heta sprava honaru. Pad ciskam hramadskaści mužčynu vyzvalili z turmy, pakarali ŭmoŭnym terminam. Dumali, što supakojać, ale ničoha padobnaha.

Viernaść hoda — Taresa Sobal

Sioleta atrymaŭ praciah cisk na siabroŭ nieaficyjnaha sajuza palakaŭ. Polem bitvy stała miastečka Ivianiec. Miascovaja staršyńka SPB Taresa Sobal zastałasia viernaj sajuzu Anžaliki Borys. Na niemaładuju žančynu zavodzili kryminalnyja spravy, ckavali ŭ dziaržaŭnych ŚMI. Sobal zastałasia pry svaich pierakanańniach. I pazicyju svajoj staršyńki padtrymali mnohija miascovyja palaki, jakija prademanstravali prykład salidarnaści.

Straty hoda — Aleh Biabienin, Lech Kačynski

U pačatku vieraśnia trahična skončyłasia žyćcio žurnalista, redaktara sajta «Chartyi-97» Aleha Biabienina. Jaho znajšli ŭ piatli na ŭłasnym leciščy pad Minskam. Pravaachoŭniki śćviardžajuć, što heta samahubstva. Ź imi pahadzilisia ekśpierty ABSIE. Siabry i kalehi kažuć, što nie ŭsio ŭ hetaj spravie tak prazrysta. Śmierć Biabienina praciahvaje achutvać tajamnica.

U krasaviku ŭ avijakatastrofie zahinuŭ prezident Polščy Lech Kačynski, jahonaja žonka Maryja, a taksama šmatlikija pradstaŭniki polskaj elity. Katastrofa vyklikała spačuvańni va ŭsim śviecie. La pasolstva Polščy ŭ Minsku imhnienna źjavilisia kvietki i śviečki. Pryčym hetaja salidarnaść była absalutna nie centralizavanaj, była pamknieńniem sercaŭ zvyčajnych ludziej. Tym nie mienš, Biełaruś zastałasia adzinaj susiedkaj Polščy, što nie abviaściła žałoby pa pamierłych.

Achviary hoda — pinčuki

U kastryčniku na zavodzie «Pinskdreŭ» adbyŭsia vybuch, u vyniku jakoha pačaŭsia pažar. Heta było ŭ pracoŭny čas, kali ludzi znachodzilisia na miescach. U vyniku zdareńnia zahinuła čatyrnaccać čałaviek. Voś ich proźviščy: Ihar Muha, Jaŭhien Raputa, Michaił Staradub, Alaksandr Michajevič, Kaciaryna Sakovič, Viktar Žukoŭski, Hienadź Kaziur, Alaksandr Kałodzič, Siarhiej Tarełka, Aleh Kvašali, Alaksandr Maroz, Alaksandr Chamluk, Mikałaj Šaŭčuk, Alaksandr Šynkaruk.

Tolki paśla trahiedyi zahavaryli pra znošanaść abstalavańnia, pra inšyja prablemy. Žałoba pa achviarach Pinska tak i nie była abvieščanaja.

Uciakač hoda — Kurmanbiek Bakijeŭ

U krasaviku prezidenta Kyrhyzstana Kurmanbieka Bakijeva skinuli z pasady. Spačatku jon chavaŭsia na poŭdni krainy, a potym vylecieŭ u Biełaruś. Bakijeva abvinavačvali ŭ karupcyi i kłanavaści. Akcyi pratestu padtrymlivalisia z Maskvy. Łukašenka skazaŭ, što pastupić pa-inšamu nie moh. Choć heta i vyklikała razdražnieńnie Kramla. Bakijevu byŭ vydzieleny asobny katedž i achova. Ź Minska jon niekalki razoŭ sprabavaŭ paŭpłyvać na padziei na radzimie.

Žurnalist hoda — Džulijan Asanž

39-hadovyinternet-žurnalist Džulijan Asanž prademanstravaŭ, što zakrytaj infarmacyi nie isnuje. Jašče ŭ 2006 hodzie jon stvaryŭ sajt Wikileaks, dzie pačaŭ drukavać sakretnyja materyjały. Naturalna, što imiony svaich infarmataraŭ jon nie nazyvaŭ. Asanž drukavaŭ materyjały, datyčnyja vajny ŭ Afhanistanie. A pry kancy hoda ŭ internecie stali źjaŭlacca depiešy pasolstvaŭ ZŠA z roznych krainaŭ śvietu. Ź ich my daviedalisia mnostva pra mocnych hetaha śvietu. Heta vyklikała bujnyja skandały. Adny ličać Asanža hierojem, inšyja — złodziejem. Tym nie mienš, jon vykanaŭ praviła žurnalista — dać dostup čytaču da infarmacyi.

Viziciorka hoda — Dala Hrybaŭskajcie

Prezident Litvy była adzinaj kiraŭnicaj krainaŭ Jeŭrasajuza, što sioleta pryjechała ŭ Minsk. Hrybaŭskajcie adlustroŭvała pazicyju peŭnych kołaŭ na Zachadzie, što Łukašenku treba pryniać takim, jaki jon jość, bo heta addalić Biełaruś ad Rasii. Na adnoj z zakrytych naradaŭ Hrybaŭskajcie skazała, što choča, kab u Biełarusi pieramoh Łukašenka. Što ž, jaje palityka dała vyniki.

Dabračynca hoda — Taćciana Sałdacienka

Dziaŭčyna čatyry hady apiakujecca pacyjentami dziciačaha ankahiematałahičnaha centra. Sama Sałdacienka naradziłasia praz dva dni paśla Čarnobylskaj trahiedyi. Dabračynnaść u takim miescy — psichałahična ciažkaja praca. Šmat chto z pacyjentaŭ tak i nie pieraadolvaje chvarobu. Tym nie mienš, Sałdacienka spraŭlajecca z takoj nialohkaj zadačaj.

Spartoviec hoda — Alaksiej Hryšyn

Frystajlist zdabyŭ pieršy załaty miedal dla Biełarusi na Zimovych alimpijskich hulniach. Na jaho asabliva nichto i nie spadziavaŭsia. Usia ŭvaha pierad startam addavałasia Antonu Kušniru i Dźmitryju Daščynskamu. Pieršy nie avałodaŭ chvalavańniem jašče ŭ kvalifikacyi, druhi — padčas pieršaha finalnaha skačka. Rola lidara niečakana vypała na plečy Hryšyna, i jon daŭ sabie rady bliskuča.

Biełaruś maje ŭnikalnuju škołu frystajła. Ad 1998 hoda našy spartoŭcy zaŭsiody biaruć miedali na Alimpijadach. I heta pry tym, što kolkaść dziaciej, što idzie ŭ hety zachaplalny vid sportu, nie takaja vialikaja. Nie raŭnia futbołu i chakieju. Prafiesijnaja chvaroba frystajlistaŭ — śpinnaja hryža. Hryšyn taksama pakutuje na jaje.

Taksama spartoŭkaj hoda mahła być bijatłanistka Darja Domračava. Jaje soniečnaja ŭśmieška nieadnarazova źziała na pjedestale honaru.

Kamanda hoda — baskietbalistki

U hulniavych vidach sportu my nie majem vialikich dasiahnieńniaŭ. Čakali pośpiechaŭ ad chakieja, a jon pryjšoŭ ad baskietbalistak. Biełaruskija dziaŭčaty zaniali čaćviortaje miesca na čempijanacie śvietu, razhramiŭšy ŭ čverćfinale rasijanak. U dziaŭčat z kamandy zakachalisia ŭsie zaŭziatary.

Režysior hoda — Andrej Kudzinienka

Aŭtar słavutaj «Akupacyi. Misteryi» Andrej Kudzinienka stvaryŭ na «Biełaruśfilmie» stužku «Masakra». U joj šlachta razmaŭlaje pa-biełarusku i pieratvarajecca ŭ miadźviedziaŭ. A ŭnijacki baciuška rychtuje zbroju dla paŭstańnia. Adny chvalać film, inšyja — haniać. U Rasii naŭrad jon budzie papularnym, bo niezrazumiełyja realii. Kudzinienka stvaryŭ pieršy sapraŭdy biełaruski film XXI st.

Prykalist hoda — Jaŭhien Lipkovič

Jahonaja kampanija na miascovych vybarach vyjšła samaj jarkaj. Skandalny błohier nie davaŭ spakoju čynoŭnikam i vachciorkam, malavaŭ kałažy ŭ internecie. Ale ŭrešcie źniaŭsia, pryznaŭšy, što heta byŭ tolki prykoł. Na prezidenckich vybarach jon taksama nie zastaŭsia biez spravaŭ. Mienavita Lipkovič prydumaŭ łozunh «Kastusioŭ ili śmierť».

Cycki hoda — Kaciaryna Nikandrava

Dziaŭčyna sioleta nie tolki vyjhrała konkurs «Mis hrudzi Biełarusi», ale i prajaviła hrama-dzianskuju pazicyju, ustupiŭšy ŭ inicyjatyŭnyja hrupy Uładzimira Niaklajeva i Jarasłava Ramančuka.

Biełarus hoda — Chrystafor Kałumb

Pad kaniec hoda amatary historyi naśmiajalisia — adzin partuhalski historyk vyvieŭ rod vialikaha padarožnika Chrystafora Kałumba ź Vialikaha Kniastva Litoŭskaha. Za hetuju viestku schapilisia litoŭcy i palaki, nazvaŭšy jaho svaim. Biełarusy na hety raz taksama vyrašyli nie addavać słavutaściaŭ susiedziam. Kałumb byŭ biełarusam taksama!

Ludzi minułych hadoŭ pa viersii «NN»

2003 — muzyčny pradziusar Vital Supranovič

2004 — staršynia Biełaruskaj asacyjacyi žurnalistaŭ Žanna Litvina

2005 — kandydat u prezidenty Alaksandr Milinkievič

2006 — čałaviek Płoščy

2007 — «Maładafrontaviec»

2008 — trenier BATE Viktar Hančarenka

2009 — Natałka Vasilevič i inšyja dabračyncy

• 0
• 0
• 0
• 0
• 0
• 0
• 0
• 0