U Švecyi pratestujuć suprać represij u Biełarusi

Pravaabarončyja i piśmieńnickija arhanizacyi Švecyi abjadnalisia dziela pratestu suprać razhortvańnia represijaŭ u Biełarusi. Siońnia jany źbirajucca pravieści mitynh pratestu la budynku ambasady Biełarusi ŭ Stakholmie.

List ambasadaru Biełarusi ŭ Švecyi padpisali:

Lise Berh, Hieneralny sakratar «Mižnarodnaj Amnistyi», Švecyja, Janina Arłoŭ, Staršynia Bałtyjskaj Asacyjacyja Piśmieńnikaŭ, Ulryka Knutsan, Staršynia Švedzkaha Kluba Publicystaŭ, Esper Benhtsan, Staršynia arhanizacyi «Repartery biaź miežaŭ» u Švecyi, Mats Sioderłund, Staršynia Sajuza piśmieńnikaŭ Švecyi, Ahneta Lindbłum Chulten, Staršynia Švedzkaha Sajuzu žurnalistaŭ, Uła Łarsma, Staršynia Švedzkaha PEN-centru.

U ich supolnym zvarocie da biełaruskich uładaŭ zaznačajecca:

«Ciaham apošnich tydniaŭ my ź vialikaj zaniepakojenaściu sočym za raźvićciom padziej u Biełarusi. U jakaści siabra AAN Biełaruś ratyfikavała Ŭsieahulnuju deklaracyju pravoŭ čałavieka i Kanvencyju AAN ab hramadzianskich i palityčnych pravach. Hetyja pravy — asnova demakratyčnaha hramadztva, i jany parušajucca siońnia ŭ Biełarusi systematyčna. Biełaruś aficyjna vyznačaje siabie jak demakratyčnaja dziaržava, ale toje, jak pradstaŭniki dziaržavy staviacca da tych, chto vykarystoŭvaje svajo zakonnaje prava na svabodu słova i mierkavańniaŭ — dysydentaŭ, piśmieńnikaŭ, žurnalistaŭ, pravaabaroncaŭ, hramadzian krainy ŭvohule — niemahčyma źviazać z demakratyčnym dziaržaŭnym ładam i pryniatymi Biełaruśsiu abaviazacielstvami pavažać pravy čałavieka.

My pratestujem suprać masavych aryštaŭ i turemnych pakarańniaŭ mirnych demanstrantaŭ, u tym liku vialikaj hrupy žurnalistaŭ, jakija aśviatlali demanstracyju ŭ Miensku 19 śniežnia, a taksama suprać taho, što niekatoryja z hetych žurnalistaŭ ryzykujuć być abvinavačanymi, ci ŭžo abvinavačanyja ŭ kryminalnych złačynstvach.

My pratestujem suprać taho, jak ułady abychodziacca z apazycyjnym kandydatam u prezydenty i byłym staršyniom Biełaruskaha PEN-centru Ŭładzimieram Niaklajevym, jakoha źbili prosta na vulicy, a potym aryštavali i vyvieźli sa špitala, kudy jon trapiŭ paśla źbićcia z čerapna-mazhavoj traŭmaj. Zhodna ź infarmacyjaj ź bližejšaha atačeńnia Ŭładzimiera Niaklajeva, jahonaje zdaroŭje ŭ źniavoleńni pahoršyłasia i jaho žyćcio ŭ niebiaśpiecy.

My asudžajem pieraśled u dačynieńni da niezaležnych arhanizacyj — jak tyja pieratrusy, što adbylisia ŭ pamiaškańni Biełaruskaha PEN-centru i na pryvatnaj kvatery namieśnika staršyni hetaj arhanizacyi. Vyšejpryviedzienyja prykłady pavinny razhladacca jak śviedčańnie kirunku raźvićcia palityčnaj sytuacyi ŭ Biełarusi. Biełaruskaja dziaržava pakazvaje siońnia staŭleńnie da svaich hramadzian, jakoje, jak padavałasia, zastałosia ŭ minułym.

My patrabujem ad kiraŭnictva Biełarusi pavahi da pravoŭ čałavieka i demakratyi, da hruntoŭnych asnoŭ jakoj naležać svaboda słova i schodaŭ. My patrabujem nieadkładnaha vyzvaleńnia ŭsich žurnalistaŭ, pravaabaroncaŭ i inšych demanstrantaŭ, jakija byli pazbaŭlenyja voli za toje, što skarystalisia svaim pravam na mirnyja demanstracyi i svabodu słova i mierkavańniaŭ».

Mitynh la biełaruskaha pasolstva (Herserudsvägen, 5) projdzie a 15-j pa minskim časie.

• 0
• 0
• 0
• 0
• 0
• 0
• 0
• 0