Nasupierak minułatydniovym deklaracyjam Alaksandra Łukašenki pra nieabchodnaść pieramoŭnaje acenki koštu “Biełtranshazu”, Pucin pierad adlotam ź Miensku zajaviŭ pra stvareńnie SP na parytetnych umovach na bazie acenačnaha koštu, vyznačanaha bankam ABN Amro, jak spravu vyrašanuju. Ministar Martynaŭ u sieradu paćvierdziŭ zhodu na heta. Biełaruskaje kiraŭnictva kapitulavała?
28 listapada paśla sustrečy z Alaksandram Łukašenkam Uładzimier Pucin zajaviŭ pra stvareńnie SP na parytetnych umovach jak vyrašanuju spravu. Niezaležnaja acenka «Biełtranshazu» zavieršanaja, skazaŭ jon, i «my zahadzia damovilisia ź Biełaruśsiu, što jakoj by hetaja acenka ni była, my budziem abodva [mienavita abodva — nie abiedźvie krainy, a abodva prezydenty] ź joju zhodny». Pavodle Pucina, častka cany za haz dla Biełarusi dy inšych zamiežnych partneraŭ Rasiei budzie kapitalizavanaja ŭ košt «Biełtranshazu». Kankretnyja parametry buduć uzhodnienyja na karparatyŭnym uzroŭni.
Hetyja biezapelacyjnyja zajavy supiarečać niadaŭnim słovam A.Łukašenki pra niepieradvyrašanaść spravy i nieabchodnaść vyznačeńnia koštu šlacham pieramovaŭ.
Pavodle infarmacyi ekanamista Jarasłava Ramančuka, halandzki bank ABN Amro acaniŭ «Biełtranshaz» na $4 młrd. Kolki hod tamu biełaruski bok u pieramovach z Rasiejaj nazyvaŭ ličbu 5 młrd, a 13 listapada Łukašenka acaniŭ hazatranspartnuju systemu ŭtraja daražej.
Acency halandzkim bankam aktyvaŭ «Biełtranshazu» papiaredničała zajava biełaruskaha premjera pra stvareńnie SP na bazie biełaruskaha i rasiejskaha hazavych manapalistaŭ.
Ekanamist Uładzimier Kałupajeŭ nia raić stavicca da słovaŭ rasiejskaha lidera jak apošniaj instancyi. Na jaho dumku, baki ŭciahnulisia ŭ infarmacyjnuju vajnu. Adnak pieravaha całkam na baku Maskvy. Jana dazvalaje sabie razmaŭlać ź Biełaruśsiu jak z vasałam.
Možna zaŭvažyć, što aŭtorkavy demarš žurnalistaŭ kaardynavaŭsia presavaj słužbaj Pucina. U sieradu Biełaruś čakała jašče aplavucha: rasiejski premjer Fradkoŭ admoviŭsia pryniać Siarhieja Sidorskaha.
Žorstkamu patrabavańniu Ŭładzimiera Pucina biełaruskim uładam niama čaho procistavić. Šlachi pastavak enerhanośbitaŭ z Centralnaj Azii ci Eŭropy nie naładžanyja, kraina zastajecca ŭ mižnarodnaj izalacyi. 29 listapada ministar zamiežnych spravaŭ Biełarusi Siarhiej Martynaŭ paśpiašaŭsia paćvierdzić hatoŭnaść Biełarusi stvaryć SP ciaham miesiaca i zavieryŭ, što Biełaruś nie šukaje alternatyvy rasiejskim enerhanośbitam.
Pucin svajoj zajavaj paprostu žorstka pastaviŭ biełarusaŭ pierad infarmacyjnym faktam. Kali biełaruski ŭrad zaŭparcicca, rasiejskaja hramadzkaść budzie ličyć, što parušajucca raniejšyja damoŭlenaści. Biełaruskaje kiraŭnictva zahaniajuć u kut.
Ciapier čytajuć
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty26
Kamientary