Pucin abiacaje Łukašenku AES lepšuju za japonskija

Padpisańnie damovy pra biełaruskuju AES adbudziecca ŭ złaviesny dzień. Padziei na AES u Fukusimie blizkija da najhoršaha scenaru. Novyja vybuchi, pažar, vialiki vykid radyjacyi.

U rajonie treciaha reaktara AES «Fukusima-1» siońnia ŭranku možna było za hadzinu atrymać 400 hadavych dozaŭ apramieńvańnia, paviedamlaje japonskaje ahienctva Kyodo.

Raniej, pierš čym u čaćviortym enierhabłoku adbyŭsia pažar i vybuch vadarodu, ahienctva paviedamlała ab pieravyšeńni hetaha pakazčyka na terytoryi stancyi ŭ vosiem razoŭ.

Pry hetym uzharańnie ŭ čaćviortym enierhabłoku AES udałosia łakalizavać.

Kiraŭnictva AES evakujavała sa stancyi ŭvieś piersanał, akramia 50 rabotnikaŭ, jakija niepasredna zajmajucca astudžeńniem reaktaraŭ.

Zafiksavany ŭzdym radycyi ŭ susiednich sa stancyjaj rehijonach i navat u Tokia, jakoje lažyć za 260 km ad stancyi (heta prykładna jak Minsk ad Hrodna; budučaja Astravieckaja AES — udvaja bližej ad Minska).

Ułady zabaranili avijapaloty nad stancyjaj, praciahvajuć evakuacyju ludziej.

Jašče nikoli atamnyja enerhietyki nie sutykalisia z adnačasovymi prablemami na takoj kolkaści reaktaraŭ. Kali śpiekłaje atamnaje paliva prapalić mietaličnyja abałonki reaktara, vializnuju terytoryju Japonii i prylehły akijan čakaje jašče bolš mocnaje radyjacyjnaje zabrudžvańnie.

Padpisańnie damovy pra biełaruskuju AES adbudziecca ŭ złaviesny dzień. Čakajecca, što jaje padpišuć biełaruski i rasijski premjery siońnia ŭ Minsku. Učora damovu ŭchvaliŭ Alaksandr Łukašenka. Budaŭnictva AES było jahonaj idejaj. Niekatoryja ekśpierty śćviardžajuć, što za prajektam staić nie stolki ekanamičnaja matyvacyja, kolki ambicyja ŭźvieści Biełaruś u ranh atamnych dziaržavaŭ.

Ukaz ab adabreńni damovy z Rasijaj byŭ padpisany Łukašenkam 14 sakavika.

U mai baki majuć padpisać kantraktnaje pahadnieńnie, a nie paźniej za červień — kredytnaje pahadnieńnie pamiž ministerstvami finansaŭ dźviuch krain.

Miarkujecca, što ŭ vieraśni 2011 hoda pačniecca budaŭnictva katłavana pad AES.

Astravieckaja AES maje budavacca ŭ rajonie Michališak, za 50 km ad staražytnaj Vilni i za 30 km ad Naračanskich azior.

Uzrovień abaronienaści na biełaruskaj AES budzie značna vyšejšy, čym u Japonii. Pra heta siońnia na sustrečy z Łukašenkam viaščaŭ prem'jer-ministr Rasii Uładzimir Pucin.

«Tyja prajekty, jakija my z vami abmiarkoŭvajem i źbirajemsia realizoŭvać, jany, viadoma, prajekty samaha apošniaha pakaleńnia, i ŭzrovień abaronienaści našmat vyšejšy, niahledziačy navat na toje, što Biełaruś nie znachodzicca ŭ takoj siejśmičnaj zonie, jak Japonija», — zajaviŭ Pucin.

Pavodle jaho słoŭ, u Japonii dziejničajuć amierykanskija reaktary 40-hadovaj daŭniny. «My havorym pra zusim novych technałohijach i siońnia z vami padrabiazna budziem heta abmiarkoŭvać», — dadaŭ rasijski premjer.

• 0
• 0
• 0
• 0
• 0
• 0
• 0
• 0