Paśla novych vybuchaŭ na japonskaj AES «Fukusima-1» padskočyŭ uzrovień radyjacyi

Paśla vybuchaŭ, što prahrymieŭ u aŭtorak u druhim i čaćviortym enierhabłokach japonskaj AES «Fukusima-1», rezka padskočyŭ uzrovień radyjacyi ŭ rajonie atamnaj stancyi. Jon pieravyšaje hadavuju normu ŭ 400 razoŭ,

Kala treciaha enierhabłoka avaryjnaj AES, na jakim napiaredadni adbylisia dva vybuchi vadarodu, uzrovień radyjacyi składaje 400 miliziviertaŭ u hadzinu, a heta ŭžo niebiaśpiečna dla zdaroŭja, paviedamiŭ hienieralny sakratar urada Japonii Jukia Edana ŭ aŭtorak na pres-kanfierencyi. «Pamiž druhim i trecim błokam radyjacyja skłała 30 miliziviertaŭ. Kala treciaha błoka — 400 miliziviertaŭ. Kala čaćviortaha — 100 miliziviertaŭ», — skazaŭ jon.

Hienieralny sakratar źviarnuŭsia da evakujavanych žycharoŭ 20-kiłamietrovaj zony z prośbaj nie viartacca ŭ svaje damy.

Akramia taho, vakoł avaryjnaj AES urad akreśliŭ zonu, zakrytuju dla palotaŭ, radyusam 30 km. Dla kantrolu nad situacyjaj ułady Japonii i dyrekcyja Takijskaj enierhakampanii (Tokyo Electric Power Co) stvaryli abjadnany kaardynacyjny štab. Jaho ŭznačaliŭ prem'jer-ministr Naota Kan. U štab uvajšoŭ taksama ministr ekanomiki, pramysłovaści i handlu Banry Kaieda.

Prem'jer-ministr pryznaŭ na pres-kanfierencyi, što niebiaśpieka dalejšaj uciečki radyjacyi z AES pastajanna raście, adnak prasiŭ nasielnictva nie panikavać. Jon taksama asabliva adznačyŭ mužnaść rabotnikaŭ atamnaj stancyi, jakija, ryzykujučy žyćciom, praciahvajuć padavać vadu ŭ reaktar i astudžać jaho. Jak pieradaje Reuters, śpiecyjalistam udałosia ŭžo źnizić cisk u druhim reaktary paśla vybuchu.

Jak stała viadoma ŭ aŭtorak, ekipaž viertalota i hrupa supracoŭnikaŭ pažarnaha ŭpraŭleńnia Japonii, jakija ŭdzielničali ŭ vyratavalnych apieracyjach u rajonie avaryjnych AES, atrymali dozu apramieńvańnia. Pra heta paviedamili ŭ pažarnaj častcy horada Fukuoka, jakaja raniej nakiravała viertalot u rajon biedstva.

«Šeść ratavalnikaŭ, uklučajučy ekipaž viertalota, atrymali nievialikija dozy apramieńvańnia padčas palotu nad horadam Ivaki (prefiektura Fukusima), — adznačyli ŭ pažarnaj słužbie. — Niebiaśpiečnaha ŭździejańnia dla ich zdaroŭja niama».

Vybuch na druhim enierhabłoku paškodziŭ kantejnier z reaktaram

Miž tym u enierhakampanii — apieratary atamnaj stancyi TEPCO adznačajuć, što ciapierašniaja situacyja moža vyklikać krytyčnaje raspłaŭleńnie paliŭnych elemientaŭ u jadziernych reaktarach, bo vybuch na druhim enierhabłoku «Fukusimy-1» paškodziŭ kantejnier, u jakim znachodzicca reaktar.

Śpiecyjalisty praciahvajuć astudžać reaktar marskoj vadoj i sprabujuć pieraduchilić dalejšaje razbureńnie kantejniera.

Zrešty, pakul ekśpierty śćviardžajuć, što «druhoha Čarnobyla» nie budzie. Situacyja na «Fukusimie-1» składaniejšaja, čym na amierykanskaj AES Try-Majł-Ajłend u 1979 hodzie, ale mienš krytyčnaja, čym u vypadku z Čarnobylem, ličać u MAHATE, piša The Daily Telegraph.

Radyjacyja raspaŭsiudžvajecca ŭ susiednija z AES prefiektury i dakaciłasia da Tokia

U prefiektury Ibaraki, raźmieščanaj na poŭdzień ad prefiektury Fukusima, dzie znachodzicca avaryjnaja AES, uzrovień radyjacyi ŭ 100 razoŭ vyšejšy za normu. U Kanahavie na paŭdniovy zachad ad Tokia vyjaŭlenaje pieravyšeńnie radyjacyjnaha ŭzroŭniu ŭ dzieviać razoŭ. U horadzie Maebasi, jaki znachodzicca za 100 km na poŭnač ad Tokia ŭ prefiektury Huma, uzrovień radyjacyi pieravyšany ŭ 10 razoŭ.

Ułady japonskaj stalicy paviedamili taksama, što ŭ samim Tokia vyjaŭlenaja nievialikaja kancentracyja ŭ pavietry radyjeaktyŭnych rečyvaŭ, takich jak jod i cezij. Izatopy ceziju i jodu, miarkujučy pa ŭsim, pryniesienyja paŭnočnym vietram, jaki dźmie z boku avaryjnaj AES «Fukusima-1», dzie adbyvajecca vykid radyjacyi ŭ niebiaśpiečnych dla čałavieka pamierach. Atamnaja stancyja znachodzicca za 240 km na poŭnač ad Tokia.

U susiedniaj z Tokia prefiektury Sajtama adznačanaje nievialikaje pavyšeńnie ŭzroŭniu radyjacyi. Pra heta abviaścili siońnia ŭłady prefiektury. «Pa dadzienych na 11:00 miascovaha času (04:00 minskaha), uzrovień radyjacyi ŭ pavietry horada Sajtama pieravysiŭ zvyčajny ŭzrovień amal u 40 razoŭ i skłaŭ 1222 nanazivierty ŭ hadzinu», — udakładniła administracyja prefiektury.

Radyjeaktyŭny fon u susiedniaj z Tokia prefiektury Ciba pieravyšaje narmalny ŭ 2–4 razy. Pieravyšeńnie ŭzroŭniu radyjacyi ŭ 33 razy ŭ paraŭnańni z narmalnym zafiksavanaje ŭ prefiektury Tatyhi. Pakazčyk składaje 1318 mikraziviertaŭ u hadzinu.

Hramadskaje telebačańnie NHK pieradaje ŭ efiry rekamiendacyi ab tym, jak pavodzić siabie va ŭmovach niebiaśpieki jadziernaha zaražeńnia. TB raić jak maha radziej vychodzić z domu, pa mahčymaści nie karystacca kandycyjanieram i zaklikaje nasielnictva zachoŭvać maksimalny spakoj.

Pavyšanuju radyjacyju niasuć ćviordyja drabniutkija čaścinki, u tym liku pył,

Vielmi niebiaśpiečna, papiaredžvaje telebačańnie, traplańnie radyjeaktyŭnych čaścinak u arhanizm razam z dychańniem. Tamu na vulicy rajać nadziavać marlevuju masku abo zakryvać rot i nos zmočanaj u vadzie tkaninaj.

Telebačańnie rekamienduje ničoha nie jeści na vulicy, nie pić vadapravodnaj vady. Pažadana nasić adzieńnie z rukavami, jašče lepš apranać na vulicy ŭ luboje nadvorje lohki daždžavik z kapiušonam. Adnak pry hetym vielmi niebiaśpiečna trapić pad realny doždž i pramoknuć. Paśla prychodu dadomu rekamiendujuć prymać duš i myć hałavu.

Adnak japoncy, miarkujučy pa ŭsim, nie vierać uładam i ździŭlajucca z nahody ich paradaŭ. «Heta padobna da filmu žachaŭ. Našyja budynki razburanyja, a jany kažuć nam zastavacca doma», — zajaviŭ Kijoka Nambu, čyj dom byŭ zmyty cunami. Jon taksama dadaŭ, što nichto nie razumieje, što adbyvajecca nasamreč: «My možam ubačyć razburanyja damy, ale jak my zaŭvažym radyjacyju? My nie viedajem, što adbyvajecca. Mnie vielmi strašna».

Staličny miehapolis achapiła panika: adny biahuć z horada, inšyja robiać zapasy

Paśla paviedamleńniaŭ ab pavyšeńni radyjacyjnaha ŭzroŭniu ŭ Tokia pačałasia panika. Ludzi sprabujuć albo jak maha chutčej źjechać z horada ŭ bolš biaśpiečnyja rehijony, albo robiać zapasy na vypadak, kab nie vychodzić z domu. U niekatorych kramach užo skončylisia radyjoprymačy, śviečki, kanistry i spalnyja miaški.

Šerah pasolstvaŭ paraiŭ svaim supracoŭnikam, a taksama hramadzianam svaich dziaržavaŭ pakinuć patencyjna niebiaśpiečnyja terytoryi, turystam pierapynić adpačynak,

Niekatoryja zamiežnyja žurnalisty, jakija aśviatlali padziei ŭ najbolš paciarpiełym ad cunami rehijonie vakoł horada Sendaj, pakidajuć hetyja terytoryi.

Miž tym haradskija ŭłady sprabujuć supakoić žycharoŭ. «Pavyšeńnie fonu nie stvaraje prablemy», — zajaviŭ pradstaŭnik administracyi Tokia. Śćviardžajecca, što i situacyja ŭ prefiekturach Sajtama i Kanahava, jakija prymykajuć da japonskaj stalicy adpaviedna z poŭnačy i paŭdniovaha zachadu i dzie pieravyšany ŭzrovień radyjacyi, taksama nie ŭjaŭlaje niebiaśpieki.

Ź japonskaj mietearałahičnaj słužby ŭ toj ža čas prychodziać niesuciašalnyja paviedamleńni. Pavodle dadzienych sinoptykaŭ, viecier pieranosić radyjeaktyŭnyja elemienty ŭ paŭdniova-zachodnim kirunku ad avaryjnych AES u Fukusimie, heta značyć, u bok Tokia. Pakul chutkaść vietru małaja — usiaho 2–3 m/s, ale jana budzie pavyšacca i da sierady dasiahnie 3–5 m/s. Zatym kirunak vietru pavinien źmianicca: viecier z chutkaściu 5–12 m/s budzie dźmuć na ŭschod i vynosić pavietranyja masy ad AES u bok Cichaha akijana.

Raście kolkaść zahinułych: morhi nie spraŭlajucca. U balnicach zakančvajucca leki

Miž tym pastajanna abnaŭlajecca infarmacyja ab kolkaści zahinułych i źnikłych bieź viestak. Pa apošnich dadzienych palicyi, achviarami ziemletrusu i cunami stali 2475 čałaviek. 3611 čałaviek ličacca źnikłymi bieź viestak. Pry hetym tolki 1 060 apaznanyja. Ź ich kala 420 ciełaŭ zmahli viarnuć svajakam.

Miarkujecca, što tysiačy tych, chto vyžyŭ, apynulisia adrezanymi ad vonkavaha śvietu i nie mohuć znajści prytułak. Tak, kala 1,3 tysiačy čałaviek byli znojdzienyja žyvymi na vostravie Ašyma, pavodle paviedamleńniaŭ miascovych ŚMI.

Kala 7–8 tysiač čałaviek, pa papiarednich padlikach, schavalisia ŭ budynkach škoł, adnak nie mohuć atrymać dapamohu. Pa niekatorych dadzienych, bolš za 500 tysiač čałaviek pazbavilisia svaich damoŭ.

U balnicach zakančvajucca leki, i miedyki nie mohuć akazać nieabchodnuju dapamohu ciažka paranienym. A kolkaść zahinułych pastajanna raście, i morhi ŭžo nie spraŭlajucca, nie chapaje trunaŭ.

• 0
• 0
• 0
• 0
• 0
• 0
• 0
• 0