Dylery prypynili prodaž novych aŭtamabilaŭ

Biełaruskija aŭtadylery prypynili prodažy novych aŭtamabilaŭ. Na taki krok jany byli vymušanyja pajści ad niapeŭnaści na valutnym rynku.

Adnaŭleńnie prodažaŭ čakajecca ŭ pačatku krasavika, kali dla dyleraŭ, mahčyma, prajaśnicca situacyja z nabyćciom valuty.

Pavodle słovaŭ staršyni praŭleńnia Biełaruskaj aŭtamabilnaj asacyjacyi Siarhieja Michnieviča, u apošnija dva tydni mała kamu z dyleraŭ udałosia nabyć jakuju-niebudź valutu dla apłaty aŭtamabilaŭ. Bokam dla aŭtadyleraŭ vyleźli valutnyja abmiežavańni, uviedzienyja Nacbankam.

«U takoj situacyi aŭtadylery byli vymušanyja pryniać rašeńni ab prypynieńni prodažaŭ aŭtamabilaŭ», — tłumačyć Michnievič.

Niejki praśviet dla aŭtadyleraŭ moža nastupić užo na nastupnym tydni. Z 1 krasavika znoŭ ŭvodzicca sproščany režym kupli valuty dla bankaŭ na tarhach Biełaruskaj valutna-fondavaj biržy.

Pastanovaj ad 22 sakavika hałoŭny bank krainy admianiŭ raniej uviedzienaje 30-dzionnaje reziervavańnie srodkaŭ u biełaruskich rublach na kuplu zamiežnaj valuty. Heta značyć z 1 krasavika reziervavańnie bankami srodkaŭ na kuplu valuty budzie ažyćciaŭlacca ŭ raniejšym režymie — za adzin pracoŭny dzień da praviadzieńnia tarhoŭ.

Aŭtadylery raźličvajuć, što heta daść mahčymaść nabyvać valutu ŭ abjomie, nieabchodnym dla viadzieńnia biźniesu.

«1 krasavika dylery pačnuć raźmiaščać zajaŭki na kuplu valuty i hladzieć, jakim čynam i pa jakim kursie jaje buduć pradavać banki. Kali ŭsio narmalizujecca, to, adpaviedna, dylery narmalizujuć svaje prodažy. Kali znoŭ ŭźniknuć ciažkaści z kuplaj valuty,

to prodažy nie buduć adnoŭlenyja da tych časoŭ, pakul prablema z nabyćciom valuty nie budzie vyrašana», — kanstatuje staršynia BAA.

Charaktaryzujučy situacyju z prodažami aŭtamabilaŭ na fonie prablem na valutnym rynku, Siarhiej Michnievič adznačaje, što palityka Nacbanka pa stabilizacyi nie pryvodzić da čakanaha efiektu.

Situacyja, naadvarot, paharšajecca.

«Abmiežavańni pa valucie dla imparcioraŭ, a taksama panika na ŭnutranym rynku pryviała da taho, što imparciory nie ŭ stanie zabiaśpiečyć popyt nie tolki na aŭtamabili, ale i ŭsioj zapatrabavanaj na rynku impartujemaj pradukcyi.

U vyniku hramadzianie vyvoziać valutu, kab kupić patrebnyja im tavary impartnaj vytvorčaści ŭ susiednich krainach.

Važnaja detal. Imparciory na ŭvoz hetaj pradukcyi patracili b u 1,5 razu mienš valuty, tak jak kuplajuć pradukcyju pa aptovym zavodskich cenach. Adpaviedna, hramadzianie vyvoziać valuty ŭ 1,5 razy bolš, bo kuplajuć tavary pa roźničnych cenach».

Da deficytu valuty na ŭnutranym rynku, pa mierkavańni Michnieviča, pryviała ŭ tym liku niedalnabačnaja palityka pa pošlinach na impartnyja aŭtamabili.

«U minułym hodzie z-za roźnicy ŭ pošlinach dla fizičnych i jurydyčnych asob hramadzianie zavieźli kala 200 tysiač aŭtamabilaŭ. Pry siaredniaj canie aŭtamabila nie mienš 7,5 tysiačy dalaraŭ ahulny abjom vyviezienaj za miažu valuty skłaŭ nie mienš za 1,5 młrd. dalaraŭ. U situacyi, jakaja skłałasia ŭ suviazi z čakanym pavyšeńniem pošlin dla fizičnych asob z 1 lipienia hetaha hoda za miežy krainy budzie vyvieziena nie mienš pałovy hetaj sumy, a to i bolš».

Hety prahnoz całkam apraŭdany. Pa dadzienych Biełstat, tolki za studzień u krainu było ŭvieziena bolš za 15 tysiač aŭtamabilaŭ, što ŭ 2,18 razy bolš, čym u studzieni 2010 hoda. Pry takoj dynamicy ŭvozu adtok valuty za miažu moža pieraadoleć letašniuju płanku ŭ 1,5 młrd. dalaraŭ.

Miž tym vializny popyt pa boku nasielnictva na aŭtamabili z-za čakanaha pavyšeńnia pošlin pryvioŭ nie tolki da adtoku valuty za miažu, ale i rostu koštaŭ na ŭnutranym rynku.

«Na aŭtarynku ŭ Ždanovičach BMV 5-j sieryi 2001 hoda kaštuje kala 13 tysiač dalaraŭ. Paŭhoda tamu hety aŭtamabil kaštavaŭ kala 7 tysiač dalaraŭ. U siarednim ceny na aŭtamabili vyraśli na 1–2 tysiačy dalaraŭ», — apisvaje situacyju ekśpiert aŭtamabilnaha rynku Dźmitryj Navicki.

Košty vyraśli taksama z-za vonkavaha popytu. Pa słovach ekśpierta, aktyŭnaść pa nabyćci aŭtamabilaŭ na terytoryi Biełarusi vykazvajuć, u pryvatnaści, hramadzianie Rasii.

U aŭtasałonach ceny na aŭtamabili taksama pajšli ŭvierch prykładna na 5% z-za niavyznačanaści na valutnym rynku, u tym liku z kursam rubla ŭ karotkaterminovaj pierśpiektyvie.

Jak padkreślivaje Siarhiej Michnievič, aŭtadylery buduć farmiravać svaju kursavuju palityku zychodziačy z kursu kupli valuty na pazabiržavym rynku.

Jon nie vyklučaje, što košty ŭ zaležnaści ad koštu valuty mohuć vyraści i na 20%.

Situacyja na valutnym rynku niehatyŭna adbiłasia i na raźvićci aŭtaservisu, jaki ŭ minułym hodzie z-za padzieńnia prodažaŭ dapamoh mnohim aŭtadyleram ŭtrymacca na płavu.

Jak tłumačyć Michnievič, z-za valutnych abmiežavańniaŭ aŭtadylery nie mohuć kupić valutu na nabyćcio filtraŭ, paliŭnych pompaŭ, pryboraŭ kiravańnia, amartyzataraŭ i šerahu inšych važnych pazicyj, jakija patrebnyja navat pry prachodžańni zvyčajnaha techničnaha absłuhoŭvańnia.

«Kali situacyja nie źmienicca, to ŭ bližejšyja miesiacy dylery buduć vymušanyja admaŭlać klijentam u absłuhoŭvańni ŭ suviazi z adsutnaściu mahčymaści kupić valutu dla nabyćcia zapčastak. Heta pryviadzie da jašče bolšamu adtoku valuty za miažu, kudy hramadzianie buduć vymušanyja jechać dla nabyćcia zapčastak abo dla absłuhoŭvańnia na zamiežnych STA. Akramia taho, takaja situacyja spravakuje rost nielehalnaha aŭtaservisu ŭnutry krainy», — ličyć staršynia BAA.

Dziŭna, ale na fonie poŭnaj niestabilnaści dylery prahnazujuć nievialiki rost rynku novych aŭtamabilaŭ pa vynikach pieršaha kvartała.

• 0
• 0
• 0
• 0
• 0
• 0
• 0
• 0