Prablema davieru

Vybary 19 śniežnia pakazali, što ŭłada straciła istotnuju častku svajoj elektaralnaj bazy — piensijanieraŭ u haradach.

U pryvatnaści, u starych namienkłaturnych kvartałach Minska, dzie žyvuć pieravažna byłyja čynoŭniki, hałoŭny čynoŭnik nie nabraŭ i 40 adsotkaŭ hałasoŭ.

Ciapierašnija piensijaniery — heta ŭžo nie «savok» 1990-ch. Pamiataju čerhi pry kancy minułaha hoda, kali ŭłada amal štomiesiac pavyšała piensii.

«Novyja piensijaniery», jakija ŭžo viedajuć, što takoje inflacyja, deflacyja, stahnacyja i ŭsiakija inšyja defołty, kpili z ułady: chočuć nas padkupić i nie zadumvajucca, što budzie paśla vybaraŭ.

Piensijaniery ŭchvalna hladzieli na maładych, jakija, dačakaŭšysia svajoj čarhi, prasili apieratarak pieravieści rublovyja depazity ŭ dalaravyja: razumnaja moładź. A niekalki starejšych za mianie mužčyn vyrašyli zabrać svaje dalary z banka: chto ich viedaje, naščadkaŭ kamisaraŭ, mohuć ža i siekviestr na valutnyja rachunki nakłaści.

Valutna-finansavy i — šyrej —

ekanamičny kryzis nie staŭ dla bolšaści hramadzian niečakanaściu. Kryzis pakazaŭ: bolšaść hramadzian uładzie nie vieryć.

Hałoŭnaja dumka Ł. Zaiki vyłučana va ŭrezcy da intervju: kožny biełarus, kali jon žadaje lepšaha svajo krainie, pavinien svabodnyja hrošy trymać u adnym ź finansavych instytutaŭ. Ekanamist narakaje, što ŭ našych ludziej «niama zvyčki, tradycyi i, kali chočacie, kultury pracy sa svaimi hrašovymi źbieražeńniami», h.zn. zachoŭvać hrošy ŭ bankach. Na pytańnie karespandenta, «kolki prykładna ŭ našaha nasielnictva nazapašana svabodnaj valuty ŭ dołaravym ekvivalencie», jon nie adkazvaje. Nazyvaje sumu, jakaja niadaŭna miełasia na bankaŭskich rachunkach hramadzian: ad čatyroch da piaci miljardaŭ. Za prafiesara Ł. Zaiku adkazaŭ čynoŭnik M. Ładućka: u hramadzian Biełarusi ciapier zachoŭvajecca ad 12 da 14 miljardaŭ dalaraŭ. Takim čynam,

suma, jakaja zachoŭvajecca ŭ «pančochach», amal utraja bolšaja za sumu, jakaja znachodzicca ŭ bankach.

Padčas kryzisu hramadzianie Paŭdniovaj Karei nieśli svaje źbieražeńni, zołata, płacinu i bryljanty ŭ banki. Paśla žachlivaha cunami svaje źbieražeńni z «pančochaŭ» dastali i panieśli ŭ banki japoncy.

Biełarusy, upeŭnieny, nie paniasuć. Bo niama davieru da ŭłady. Savieckaja ŭłada zaŭsiody abkradała narod. Niama ŭpeŭnienaści, što nie padmanie hramadzian i sučasnaja ŭłada. Nam abiacali, što buduć kampiensavanyja ŭkłady hramadzian u Aščadny bank SSSR. Prajšło amal dvaccać hadoŭ paśla raspadu Sajuza, ale ŭłada ničoha nie zrabiła, kab napoŭnicu vykanać svajo abiacańnie.

Z druhoha boku, «novyja piensijaniery» i ludzi siaredniaha vieku (a asnoŭnaja masa źbieražeńniaŭ u ich) mohuć skazać: dobra,

my pryniasiem hrošy ŭ banki, ale na što vy ich patracicie? Na ŭtrymańnie siłavych strukturaŭ i stvareńnie novych atradaŭ AMAPu, na zarpłaty i premii čynoŭnikam ci na strukturnyja reformy? Dzie płan hetych reformaŭ?

I narešcie:

chto harantuje, što našy hrošy viernucca da nas z pracentami? Tyja ludzi, jakija abiacali nam kampiensavać straty, paniesienyja ŭ 1991 hodzie? Ludzi, jakija abiacajuć nam jeŭrapiejski standart žyćcia, a sami topčuć jeŭrapiejskija pryncypy?

• 0
• 0
• 0
• 0
• 0
• 0
• 0
• 0