Sud nad Niaklajevym. Prakuror prosić umoŭnyja terminy. Była havorka pra hrošy «Havary praŭdu»

Praciah sudovaha pracesa nad eks-kandydatami ŭ prezidenty Uładzimiram Niaklajevym i Vitalom Rymašeŭskim, a taksama Alaksandram Fiadutam, Andrejem Dźmitryjevym, Siarhiejem Vaźniakom, Nastaj Pałažankaj.

19.20

Abvieščany pierapynak da 10-j ranicy 18 maja.

17.00

Prakuror paprasiŭ pakarać abvinavačanych: Niaklajeva — 3 hadami pazbaŭleńnia voli z adterminoŭkaj na 2 hady.

Dźmitryjeva — 3 hady pazbaŭleńnia voli ŭmoŭna z vyprabavaŭčym terminam 2 hadami, Fiadutu — 2 hadami ŭmoŭna z vyprabavaŭčym terminam 2 hady, Vaźniaka — 2 hadami abmiežavańnia voli z nakiravańniem u papraŭčuju ŭstanovu adkrytaha typu z adterminoŭkaj na 2 hady, Rymašeŭskaha — 2 hadami pazbaŭleńnia voli ŭmoŭna z vyprabavaŭčym terminam 2 hady, Pałažanku — 1 hodam 6 miesiacami ŭmoŭna z vyprabavaŭčym terminam na 1 hod.

Maksimalnaje pakarańnie pavodle art. 342 KK RB, jaki inkryminujecca abvinavačanym — 3 hady pazbaŭleńnia voli. Za ŭdzieł u Płoščy ŭžo asudžanyja 30 čałaviek, u tym liku eks-kandydat u prezidenty A. Sańnikaŭ na 5 hadoŭ kałonii ŭzmocnienaha režymu.

15.50

U sudzie — pierapynak, paśla jakoha pačnucca sudovyja sprečki.

14.50

Prakuror začytvaje pakazańni Dźmitryjeva, dadzienyja padčas papiaredniaha śledstva. Jany paŭtarajuć pakazańni Fiaduty. U pryvatnaści, taksama paviedamlaje, što ŭdzielničaŭ u sieminarach pa abmierkavańni Płoščy, jakija pravodzilisia ŭ Litvie. Taksama nastojvaje na mirnym charaktary akcyi. Advakat Dźmitryjeva źviarnuła ŭvahu sudździ na toje, što ŭsie zajavy jaje padabaronnaha nasili dekłaratyŭny charaktar.

14:25

Prakuror zajaviŭ, što maje pytańni nie tolki da Fiaduty, ale taksama i da Dźmitryjeva z Vaźniakom. Zaraz jon udakładniaje ŭ A.Dźmitryjeva, jakija analityčnyja materyjały jon rychtavaŭ. Prakuror śćviardžaje, što raniej Dźmitryjeŭ nastojvaŭ na tym, što «Havary praŭdu» nie zajmałasia płanavańniem raźvićcia palityčnaj situacyi padčas prezidenckich vybaraŭ, adnak padčas papiaredniaha rasśledavańnia było vyśvietlena, što ŭdzielniki kampanii «HP» zajmalisia analizam mahčymaha raźvićcia padziej padčas vybaraŭ.

Taksama prakuror zajaviŭ, što A.Dźmitryjeŭ, jak i Fiaduta, składaŭ vusnyja partrety. A.Dźmitryjeŭ zajaviŭ, što davać pakazańniaŭ ab hetym nie budzie.

14:20

Pasiedžańnie adnaviłasia. Sudździa admoviła ŭ zadavalnieńni chadajnictvaŭ advakataŭ. Taksama zajaviła, što materyjały, datyčnyja dziejnaści «Havary praŭdu», mohuć być vykarystanyja i pry razhladzie dadzienyaj kryminalnaj spravy, tak jak mohuć utrymlivać važnuju infarmacyju.

Los kanfiskavanaj 18 maja techniki, jakuju lidaram «Havary praŭdu» tak i nie viarnuli, budzie vyrašany pry vyniasieńni pryhavoru.

13:15

Sudździa abviaściła pierapynak da 14:00

12:37

Advakat Niaklajeva: «Vysoki sud, 18 tamoŭ kryminalnaj spravy, datyčnyja dziejnaści „Havary praŭdu“, majuć dačynieńnie da pracesu, a pastanova ab spynieńni spravy pavodle hetych 18 tamoŭ — nie maje. Jak heta možna zrazumieć?». Zajava advakata vyklikała pratesty z boku prakurora. Jon paličyŭ, što jana ŭtrymlivaje cisk na jaho asobu.

Sudździa Žukoŭskaja abviaściła čarhovy pierapynak na 10 chvilin.

12:30

Prakuror ahučyŭ materyjały, pavodle jakich A.Fiaduta padčas śledstva zajaŭlaŭ śledčamu, što «Niaklajeŭ sam nijakich finansavych srodkaŭ nie atrymoŭvaŭ i ab krynicach finansavańnia kampanii „Havary praŭdu“ ničoha nie viedaŭ».

Advakaty i abvinavačanyja praciahvajuć pratestavać suprać ahučvańnia materyjałaŭ, datyčnych «Havary praŭdu». Pryčyna — spynieńnie spravy, jakaja była raspačataja 18 maja 2010 hoda ŭ suviazi ź dziejnaściu kampanii.

12:25

Pavodle materyjałaŭ śledstva, A.Fiaduta pryznavaŭ, što šeście pa praśpiekcie Niezaležnaści było zapłanava. Mierkavałasia, što takim čynam možna budzie pieramiaścić ludziej da Doma uradu z metaj pieradačy rezalucyi S.Sidorskamu.

12:15 — 12:20

Sudździa Žukoŭskaja zadavoliła chadajnictva prakurora. Zaraz jon začytvaje pakazańni Fiaduty, dadzienyja padčas śledstva. Tam viadziecca pra finansavańnie kampanii «Havary praŭdu». Pavodle pratakoła, A.Fiaduta havoryć pra sustreču z donarami na terytoryi Polščy i nazyvaje sumu ŭ 4,5 młn. amierykanskich dołaraŭ.

Akramia hetaha, havorycca pra mahčymyja scenary raźvićcia situacyi padčas prezidenckich vybaraŭ u śniežnia 2010 hodu. A.Fiaduta pryznaje, što źmiena prezidenta padčas vybaraŭ niemahčymaja, adpaviedna bolš vierahodny scenar dziejańniaŭ — pieramovy z pradstaŭnikami ŭładaŭ. U pryvatnaści, S.Sidorskim.

11:57

Prakuror vystupiŭ z žadańniem začytać niekatoryja dakumienty spravy, datyčnyja dziejnaści kampanii «Havary praŭdu». Suprać hetaha vystupiła advakat A.Fiaduty i Nasta Pałažanka. «Ja nie razumieju, navošta my pavinny heta słuchać», — zajaviła jana.

Sudździa abviaściła pierapynak 10 chvilin.

11:45

Na ekranie demanstrujecca partret čałavieka, namalavany sa słovaŭ A.Fiaduty. Sam A.Fiaduta zajaviŭ, što padčas śledstva na jaho akazvaŭsia raznastajny cisk, čulisia pahrozy raspačać spravu zusim pa inšym, bolš ciažkim artykule. Ź jaho słovaŭ, na rozdum jamu dali ŭsiaho 15 chvilin. «Tamu ja vyrašyŭ, što maju prava havaryć hetym ludziam niapraŭdu. Mnie pradjavili adzin ź nikaŭ z majho skajpa. Paśla hetaha adbyŭsia šerah pracedur, uklučajučy razmovy z supracoŭnikami KDB biez advakata. Mnie prapanavali stvaryć partret (majecca na ŭvazie čałaviek pad pradjaŭlennym nikam sa skajpa) hetaha čałavieka z maich słovaŭ… Mnie pahražali artykułami „Zdrada Radzimie“, „Špijanaž“ i inšymi. Tym, što demanstrujecca zaraz, zakładvajecca asnova pad zaviadzieńnie novaj spravy. Zakładvajecca asnova pad „špijonski praces“. Prašu albo spynić heta, albo dazvolić mnie pakinuć zału da momantu sprečak u suviazi sa strataj davieru da suda», — zajaviŭ A.Fiaduta.

Prakuror pačaŭ demanstravać nastupnyja partrety. A.Fiaduta zajaviŭ, što paznaje ŭ adnym ź ich amierykanskaha akciora. A taksama paprasiŭ prakurora pakazać jamu nie malunki, a fatazdymki, a lepš uvohule zaprasić u sud na pasiedžańnie hetych ludziej.

11:40

Dyskusija pamiž prakuroram Kažeŭnikavym i abvinavačanym A.Fiadutam praciahvajecca. Prakuror zhadvaje ab tym, što padčas śledstva A.Fiaduta składvaŭ subjektyŭnyja partrety niekatorych asobaŭ. A.Fiaduta hety fakt paćviardžaje, havoryć ab hatoŭnaści dać adpaviednyja tłumačeńni.

U dyskusiju uklučyłasia advakatka A.Fiaduty. Jana ličyć, što partrety nie majuć dačynieńnia da razhladu spravy. Adnak sudździa padtrymała prakurora ŭ jaho žadańni pakazać partrety na manitory televizara.

11:32

Pavodle materyjałaŭ śledstva, bolšaść dakumientaŭ štaba Niaklajeva była padrychtavana A.Fiadutam, A.Dźmitryjevym i S.Navumavaj. Ab hetym padčas dopytaŭ u śledčaha zajaviŭ sam A.Fiaduta.

Advakatka A.Fiaduty zaŭvažyła, što dadzienyja dokazy nie mohuć być pryniatyja, bo atrymanyja z parušeńniem kanstytucyjnych normaŭ. Jana śćviardžaje, što A.Fiaduta byŭ pazbaŭleny svaich pravoŭ padčas znachodžańnia ŭ SIZA. Advakatka paviedamiła sudździ, što nie mieła mahčymaści padrychtavać svajho padabaronnaha da dopytaŭ.

U dadatak U.Niaklajeŭ zajaviŭ, što ahučanyja prakuroram dakumienty datyčać dziejnaści kampanii «Havary praŭdu», sprava pa jakoj začynienaja. Niaklajeŭ taksama paviedamiŭ, što padčas śledstva 90% pytańniaŭ śledčych datyčyli mienavita dziejnaści kampanii «HP», a nie prezidenckaj kampanii Niaklajeva.

11:20

Pavodle pratakołu dopytu, A.Fiaduta pryznaje, što źjaŭlajecca adnym z aŭtaram dakumienta, jaki ŭtrymlivaje mahčymyja scenary praviadzieńnia prezidenckich vybaraŭ, a taksama miechanizmy realizacyi pastaŭlenych metaŭ.

A.Fiaduta taksama paviedamiŭ, što na pačatkovym etapie dziejnaści kampanii zakonnymi sposabami pryciahnuŭ finansavyja srodki ŭ pamiery 50 tys. amierykanskich dołaraŭ. U dalejšym jon nie zajmaŭsia krynicami finansavańnia. Hetyja zadačy, pavodle pratakołaŭ dopytaŭ u śledčaha, byli ŭskładzienyja na A.Dźmitryjeva.

«Chaciełasia b, kab prakuror pradastaviŭ inšyja dakumienty, jakija b padćviardžali dastaŭkaj mnoj hrašovych sumaŭ. Śledstva pavinna hruntavacca nie tolki na pakazańniach samoha abvinavačanaha. Tym bolš, što ja nie mieŭ mahčymaści kantaktavać sa svaim advakatam stolki, kolki mnie było nieabchodna», — zajaviŭ A.Fiaduta.

11:15

Prakuror Kažeŭnikaŭ zajaviŭ, što ŭ pakazańniach Fiaduty, dadzienych padčas śledstva i padčas sudovaha pasiedžańnia isnujuć surjoznyja roznahałośsi. Tamu jon ličyć, što varta ahučyć pratakoły dopytaŭ A.Fiaduty padčas śledstva. Advakat A.Fiaduty zapiarečyła, što dopyty ŭ SIZA KDB prachodzili z parušeńniem zakanadaŭstva (pry adsutnaści advakata i niemahčymaści kansultacyj z padabaronnym), a taksama datyčyli kryminalnaj spravy pa inšym artykule. Tamu jana vystupaje suprać ahučvańnie hetaj častki materyjałaŭ śledstva.

Sudździa zadavoliła chadajnictva prakurora. Ciapier jon pačynaje začytvać pratakoł dopytu A.Fiaduty, datavany 14 studzienia.

11:07

Fiaduta adkazaŭ prakuroru: «Ja jak palitołah pisaŭ šmat analityčnych zapisak, dzie razhladalisia samyja roznyja scenary raźvićcia padziej. Kali dziaržaŭny abvinavaŭca paviedamić, kali hety dakumient byŭ stvorany i ź jakoha nośbita jon byŭ źniaty, to ja zmahu adkazać». Prakuror adkazam nie zadavoliŭsia i praciahvaje raspytvać A.Fiadutu.

11:05

Advakaty Niaklajeva padali chadajnictva ab prahladzie na pasiedžańni videazapisu infarmacyjnaj kampanii BiełaPAN, zroblenaha na vulicy Kalektarnaj padčas napadu na kałonu Niaklajeva. Prakuror Kažeŭnikaŭ vystupiŭ suprać, matyvujučy heta tym, što krynicu videazapisu niemahčyma ŭstanavić. Sudździa Žukoŭskaja padtrymała pazicyju prakurora.

Zaraz prakuror zadaje pytańni padsudnym. U pryvatnaści — Alaksandru Fiaducie. Jaho cikavić, ci prymaŭ udzieł A.Fiaduta ŭ raspracoŭcy scenaru akcyi pratestu.

11:00

Prahlad zapisu teledebataŭ skončany. Sudździa paviedamiła, što isnuje mahčymaść prahladu filma BT «Žalezam pa škle». Adnak prakuror nie staŭ nastojvać na jaho prahladzie, padsudnyja i advakaty taksama. «Dziakujem. Užo bačyli», — zajaviŭ Uładzimir Niaklajeŭ.

10:45

Prahlad zapisu teledebataŭ praciahvajecca. Cikava, što zapis pačali demanstravać užo paśla taho momantu, kali Uładzimir Niaklajeŭ pakinuŭ zalu. Adpaviedna z padsudnych u zapisie debataŭ fihuruje tolki Vital RYmašeŭski.

10:25

Sudździa ŭsio ž prypyniła prahlad videa z płoščy Niezaležnaści. «Abvinavačany Rymašeŭski, vy ŭsio pabačyli, što chacieli», — zapytała jana. «Tak. My prosta raniej hetaha zapisu nie bačyli», — adkazaŭ sustaršynia BCHD.

Zaraz pačaŭsia prahlad zapisu teledebataŭ.

10:15

Prahlad videa praciahvajecca. Na im zafiksavanyja momanty bićcia škła ŭ voknach i dźviarach Doma urada. Nikoha z padsudnych na videa nie bačna. Prakuror Andrej Kažeŭnikaŭ navat prapanoŭvaŭ spynić prahlad hetaha rolika. Adnak prahlad byŭ praciahnuty na prośbu Vitala Rymašeŭskaha.

10:00

Pasiedžańnie pačałosia. U zale iznoŭ staić vialiki televizar. Sudździa Žanna Žukoŭskaja paviedamiła, što siońniašni dzień pačniecca z prahladu videazapisaŭ z płoščy Niezaležnaści.

Na videa bačna, jak Andrej Sańnikaŭ i Mikałaj Statkievič zaklikajuć «mianiać łysuju ryzinu». Taksama tam fihuruje Vital Rymašeŭski, jon patrabuje vyzvaleńnia palitviaźniaŭ i zaklikaje vyjści na płošču da ludziej kiraŭnikoŭ siłavych struktur. Ludzi hukajuć: «Svabodnyja vybary biez Łukašenki». Videa vielmi drennaj jakaści.

Zala suda zapoŭnienaja amal całkam. Značnuju častku prysutnych (kala 20 čałaviek) składajuć «studenty-praktykanty».

• 0
• 0
• 0
• 0
• 0
• 0
• 0
• 0