U čaćvier u Minsk pryjedzie Pucin

18–19 maja ŭ Minsk prybuduć prem'jer-ministry šerahu krain SND dla ŭdziełu ŭ pasiadžeńniach Savieta kiraŭnikoŭ uradaŭ SND, Miždziaržsavieta JeŭrAzES i vyšejšaha orhana Mytnaha sajuza. Pasiadžeńni projduć 19 maja.

Prem'jer-ministr Armienii Tyhran Sarkisian užo prybyŭ u Minsk. Čakajecca, što praź niekalki hadzin adbudziecca jaho sustreča z Alaksandram Łukašenkam.

Taksama siońnia pavinny prybyć kiraŭniki ŭradaŭ Tadžykistana Akił Akiłaŭ, Kyrhyzstana — Ałmaźbiek Atambajeŭ, Uźbiekistana — Šaŭkat Mirzijojeŭ, Kazachstana — Karym Masimaŭ i namieśnik prem'jer-ministra Małdovy Valeryj Łazer.

19 maja čakajecca prybyćcio namieśnika prem'jer-ministra Turkmienistana Nakierhuły Šahułyjeva, prem'jer-ministra Ukrainy Mikałaja Azarava, vice-premjera Azierbajdžana Jahuba Ejubava i prem'jer-ministra Rasii Uładzimira Pucina.

Na pasiadžeńni kiraŭnikoŭ uradaŭ SND budzie razhledžany prajekt dahavora ab zonie svabodnaha handlu, u miežach jakoha płanujecca zafiksavać dziejnyja vyklučeńni z režymu svabodnaha handlu, a taksama abaviazacielstvy nie pašyrać ich pieralik i pačać pieramovy pa paetapnaj admienie ekspartnych pošlin.

Prem'jer-ministry abmiarkujuć źmiest miždziaržaŭnaj prahramy inavacyjnaha supracoŭnictva da 2020 hoda. Inicyjataram raspracoŭki hetaj prahramy vystupiła Biełaruś.

Adnym z klučavych punktaŭ paradku dnia Savieta kiraŭnikoŭ uradaŭ SND źjaŭlajecca pryniaćcie ramačnaj prahramy pa supracoŭnictvie ŭ halinie mirnaha vykarystańnia atamnaj enierhii.

Akramia taho, u miežach Miždziaržaŭnaha savieta JeŭrAzES kiraŭniki ŭradaŭ abmiarkujuć pracu Mytnaha sajuza i farmiravańnie Adzinaj ekanamičnaj prastory. Asablivaja ŭvaha budzie nadadziena vykanańniu mierapryjemstvaŭ płana sumiesnych mier pa pieraadoleńni nastupstvaŭ suśvietnaha finansavaha kryzisu. Akramia hetaha, prem'jer-ministry razhledziać arhanizacyjnyja aśpiekty stvareńnia Suda JeŭrAzES — pravavoha miechanizmu vyrašeńnia sprečak u ramkach JeŭrAzES i Mytnaha sajuza. Sud budzie raźmiaščacca ŭ Minsku i pačnie pracu 1 studzienia 2012 hoda.

Zapłanavana padpisańnie troch mižnarodnych dahavoraŭ u śfiery supracoŭnictva mytnych orhanaŭ i orhanaŭ siertyfikacyi. Buduć taksama razhledžany vyniki vykanańnia mierapryjemstvaŭ pa pieranosie ŭzhodnienych vidaŭ dziaržaŭnaha kantrolu na źniešni kontur Mytnaha sajuza. Užo siońnia na biełaruska-rasijskaj miažy nie ažyćciaŭlajecca pahraničny, mytny, transpartny, sanitarny, fitasanitarny i karancinny kantrol.

Asobny błok pytańniaŭ budzie tyčycca dalejšaha raźvićcia zakanadaŭstva Mytnaha sajuza ŭ śfiery techničnaha rehulavańnia i prymianieńnia sanitarnych, vieterynarnych i karancinnych mier.

• 0
• 0
• 0
• 0
• 0
• 0
• 0
• 0