Pravaabaroncy z «Viasny» adznačyli 15-hodździe

«Niahledziačy na ciažkija časy, pravaabaroncy buduć pracavać u lubych umovach», — zajaviŭ lidar pravaabaroncaŭ «Viasny» Aleś Bialacki.

— Śviata ŭ nas nie asabliva radasnaje. I biełaruskaje hramadstva, i naša arhanizacyja pieražyvajuć dramatyčnyja časy, — adznačyŭ na sustrečy z žurnalistami Aleś Bialacki. — U toj čas, kali prachodziać sudy nad udzielnikami mitynhu 19 śniežnia 2010 h., śviatkavać nie čas.

Pravaabaronca adznačyŭ, što ni razu apazicyja i hramadstva nie adčuvali takoha presinhu z boku ŭładaŭ, jak za piać miesiacaŭ, što prajšli paśla vybaraŭ.

— Adnak, nie budziem zabyvać, što «Viasna» źjaviłasia ŭ nie mienš dramatyčny dla Biełarusi pieryjad. Viasna 1996 hoda była vielmi ciažkaj. Mienavita jana abaznačyła adkrytaje supraćstajańnie hramadzian i vykanaŭčaj ułady. Pieršaja kryminalnaja sprava suprać aktyvistaŭ apazicyi była raspačataja mienavita suprać udzielnikaŭ akcyi 14 sakavika, pryśviečanaj Dniu Kanstytucyi. Tady pačalisia pieršyja zatrymańni, — uspomniŭ Aleś Bialacki hod stvareńnia arhanizacyi. — 26 krasavika 1996 hoda ŭłada ŭpieršyniu pasprabavała razahnać masavuju akcyju — «Čarnobylski šlach». Aryšt bolš jak dvuchsot udzielnikaŭ šeścia byŭ šokam dla ŭsich.

— Niahledziačy na ciažkija časy, pravaabaroncy buduć pracavać u lubych umovach. Za 15 hadoŭ pracy my akazali dapamohu dziasiatkam tysiač čałaviek, — adznačyŭ Aleś Bialacki. — Pravaabaroncy i žurnalisty znachodziacca na pieršaj linii supracivu antydemakratyčnym režymam, jakija cynična parušajuć pravy čałavieka. U dziaržavie adbyvajecca poŭnamaštabny kryzis, ale, jak pakazvaje praktyka, mienavita ŭ kryzisnyja momanty vyrašaŭsia los krainy.

Napiaredadni 15-hodździa «Viasny» pravaabaroncy padrychtavali ekśpiertnuju acenku kryminalnych pracesaŭ nad udzielnikami akcyi prastestu 19 śniežnia.

— Padziei 19 śniežnia nasili charaktar mirnaj akcyi pratestu. Jaje ŭdzielniki mieli mirnyja mety, kandydaty ŭ prezidenty padčas svaich publičnych vystupleńniaŭ zaklikali ludziej na mirnuju akcyju. Tak, niekatoryja demanstranty ździejśnili supraćpraŭnyja dziejańni, ale aceńvać ich jak masavyja biesparadki nielha. Śledstva prachodziła z najhrubiejšymi parušeńniami. Nie było realizavana prava na abaronu, prezumpcyja nievinavataści. Da padazravanych užyvalisia katavańni, — adznačyŭ pravaabaronca Valancin Stefanovič. — Usich asudžanych pa hetych spravach my ličym palityčnymi viaźniami.

Da 15-hodździa «Viasny» padrychtavany ahlad-chronika parušeńniaŭ pravoŭ čałavieka ŭ Biełarusi ŭ 2010 hodzie.

— Nakolki efiektyŭna nam udajecca naša dziejnaść sudzić ciažka, ale, miarkujučy pa reakcyi na nas aficyjnych ŚMI i dziaržaŭnaj prapahandy, my bačym, što našy dziejańni ŭładu zakranajuć, i jana vymušana na nas reahavać, — reziumavaŭ Aleś Bialacki.

Daviedka

U 1998 hodzie pravaabarončy centr «Viasna» byŭ zarehistravany jak Minskaja haradskaja arhanizacyja, a ŭžo ŭ 1999-m — jak respublikanskaje pravaabarončaje hramadskaje abjadnańnie. U kastryčniku 2003 hoda centr byŭ likvidavany rašeńniem Viarchoŭnaha suda. Pryčynaj staŭ udzieł členaŭ arhanizacyi ŭ nazirańni za prezidenckimi vybarami 2001 hoda. 6 sakavika 2004 h. likvidavany centr «Viasna» byŭ pryniaty ŭ Mižnarodnuju fiederacyju pravoŭ čałavieka. Kamitet pa pravach čałavieka AAN 24 červienia 2007 hoda pryznaŭ, što, likvidavaŭšy «Viasnu», biełaruskija ŭłady parušyli punkt 1 artykuła 22 Mižnarodnaha pakta ab hramadzianskich i palityčnych pravach. Aficyjny Minsk hetaje rašeńnie AAN praihnaravaŭ.

• 0
• 0
• 0
• 0
• 0
• 0
• 0
• 0