Zamiatalinski vianočak na mahiłku “Biełaruśfilmu”

Pałkoŭnik Zamiatalin – dyrektar “Biełaruśfilmu”! I heta najlepšaje kadravaje pryznačeńnie za ŭsie hady łukašenkaŭskaha kiravańnia. Narešcie, režym vyrašyŭ kiravacca vysłoŭjem “Čym horaj, tym lepiej” (chacia mianie j nie pakidaje ŭražańnie, što heny pryncyp zakładzieny ŭ padmurak prezydentury). Najbolš padychodnaj kandydatury, kab kančatkova dabić “Biełaruśfilm” i ŭjavić niemahčyma.

Pałkoŭnik Zamiatalin naradziŭsia 14 traŭnia 1948 hodu ŭ Tule (Rasieja), zajmaŭsia palityčnym nahladam u biełaruskich vojskach. U 1994 hodzie ŭvachodziŭ u pieradvybarčy štab Kiebiča. Mienavita Zamiatalinu prypisvajuć prydumku z “abakradzienaj ściuardesaj” (niaščasnaja paviedamiła, što sama harłasty kandydat u prezydenty vykraŭ u jaje fen i falaimitatar).

Ale heta nie pieraškodziła Zamiatalinu, jak kaštoŭnamu ideolahu, z 1995 hodu zajmać pasady ŭ Administracyi prezydenta. U 2000-2001 hadoch Zamiatalin – namieśnik kiraŭnika Administracyi prezydenta.

Zamiatalin prasłaviŭsia, jak arhanizatar referendumu 95-aha hodu – i nienaviśnik usiaho biełaruskaha. Z 2001 hodu, kali była ŭviedzienaja “idealohija biełaruskaj dziaržavy”, samo isnavańnie jakoj u Zamiatalina vyklikaje ździŭleńnie, – pałkoŭnik u adstaŭcy.

Ale ciapier pałkoŭnik ačoliŭ “Biełaruśfilm”.

Kino jość mastactvam – i industryjaj (zusim nie padobnaj na vajskovuju baraćbu z vorahami). Ad naradžeńnia biełaruskaje kino isnavała tolki za dziaržaŭnyja hrošy, što na pačatku pierałomnych 90-ych hadoŭ pryviało da kalapsu. Vyjściem z kryzisu mahło stacca stvareńnie pryvatnaj kinavytvorčaści. Ale praz ekanamičnyja j palityčnyja čyńniki henyja inicyjatyvy byli spynienyja.

Siońnia nierefarmavany “Biełaruśfilm”, jaki nia zdolny pradać nat tyja karciny, što prynieśli jamu słavu – znachodzicca ŭ stanie komy. I, jak padkreślivaje Andrej Kudzinienka, “lepiej adklučyć štučnaje siłkavańnie, kab nie praciahvać kliničnuju śmierć”.

Jašče adzin režyser – imia jakoha nie padaju – kazaŭ pra strupianiełaść biełaruskaje kinafabryki – i niepaźbiežnuju śmierć sastarełaj systemy.

Ideolah Zamiatalin – dałakop dla “Biełaruśfilmu”. I inšaj roli ŭ jaho być nie moža.

Kino – mastactva darahoje. Filmy kaštujuć pad miljony dalaraŭ – i, kab jany akupilisia, prakatu pa Biełarusi zaŭždy zamała. Ale chto budzie kuplać za miažoj idealahičnyja padrobki pra ščaślivaje žyćcio pad dohladam Baćki? (A tolki na takija prajekty j zdolny pałkoŭnik).

Tym bolej, chto z zamiežnikaŭ – va ŭmovach ekanamičnaha samadurstva j idejnaha kantrolu – pažadaje biełaruskaje kino finansavać?

Namiakajuć na Rasieju. Ale pra Rasieju zaŭždy havorać na “Biełaruśfilmie” – i jakija vyniki? Rasiejskija seryjały j niščymnyja drynduški apošnich hadoŭ.

Inšy šlach, akramia sumiesnaj pradukcyi – nizkabiudžetnaje aŭtarskaje kino. Ale z prychodam Zamiatalina hety padychod tym bolej uniemahčymleny. Aŭtarskaje kino patrabuje pavahi da aŭtara. A jakaja pavaha moža być va ŭmovach "vajskovaha" cisku?

Pryhadvaju historyju z “Akupacyjaj”. Stužka Kudzinienki zdymałasia z udziełam maładziovaj “Studyi XXI”, što była zasnavanaja pry “Biełaruśfilmie”. Sychodziačy z hetaha, čynoŭniki ŭsialak patrabavali idealahičnaj pravierki karciny (a pra hrošy na stužku daremna było zaikacca).

Režym daŭno nia zdolny zaachvočvać kino hrašyma (što było abaviazkovym dla savieckich časoŭ) – ale šče pniecca ŭsio kantralavać Nia viedaju, jakija hrošy daduć na studyju tavaryšu Zamiatalinu. U lubym vypadku – henych hrošaj ledźvie chopić na zamienu avaryjnych unitazaŭ, ramont praciekłaha dachu i ŭtrymańnie na studyi tych, chto jašče nie raźbiehsia.

Pra narmalnuju vytvorčaść karcinaŭ hutarki vieści nielha.

I, badaj, najvažniejšaje. Zamiatalin – kiraŭnik-ideolah. Ale mienavita z “idealohijaj” praduhledžvajecca najvialikšy prakoł.

Ludzi daŭno ŭžo nia stolki pracujuć na studyi, kolki ličacca pracoŭnymi (dyj na jakich karcinach im pracavać!?). Na studyi lažać tolki pracoŭnyja knižki.

Ale bolšaja častka tvorcaŭ syšli ŭ “šeraje” videa – zdymki viasiellaŭ, reklamnyja prajekty na zamovu j h.d. Niechta, uvohule, emihravaŭ. (Tak amal całkam pa-za studyjaj niadaŭnija vypuskniki-režysery Akademii mastactvaŭ). Najtalenaviciejšy małady kamedyjohraf Alaksandar Kananovič kolki hadoŭ pracuje ŭ Rasiei.

Z prychodam Zamiatalina “emihracyja ŭ šeraje videa” moža stacca tatalnaj i kančatkovaj. Pry hetym nieabaviazkova buntavać i zvalniacca. Tvorcy prosta pa-za miežami studyi buduć rabić svajo, pazasystemnaje kino. Na svaim abstalavańni. Technalohii ličbavych kameraŭ – i chatnich kamputaraŭ hetaje dazvalajuć. I, naturalna, anijaki idealahičny kantrol tut niemahčymy.

Amal sucelnaja padpolnaść biełaruskaha kino ažyvić jaho – i kančatkova ŭzłamaje sparachniełuju kinasystemu.

A Zamiatalin pakładzie vianočak na mahiłku “Biełaruśfilmu”.

Usie kinapadziei

• 0
• 0
• 0
• 0
• 0
• 0
• 0
• 0