Litva pieradała Minsku infarmacyju pra rachunki biełarusaŭ

Ministerstva justycyi Litvy śćviardžaje, što infarmacyja pra bankaŭskija rachunki ŭ Litvie biełaruskich apazicyjnych arhanizacyj pradastaŭlena słužbam Biełarusi z-za zanadta vialikaha davieru da biełaruskich ustanovaŭ. Pratestujučy suprać vykarystańnia chadajnictvaŭ ab pravavoj dapamozie dla palityčnaj raspravy, ministerstva na nieabmiežavany čas prypyniaje pradastaŭleńnie pravavoj dapamohi režymu Łukašenki.

Pravaabaroncy śćviardžajuć, što takija dziejańni pryviali da zatrymańnia kiraŭnika biełaruskaha pravaabarončaha centra Alesia Bialackaha. Na praviedzienaj u čaćvier pres-kanfierencyi vice-ministr justycyi Tomas Vajtkiavičus pryznaŭsia žurnalistam, što heta praŭda.

Pavodle jaho słoŭ, u znak pratestu suprać dziejańniaŭ Biełarusi, pradastaŭleńnie pravavoj dapamohi prypyniajecca na nieabmiežavany čas, pakul buduć znojdzieny bolš nadziejnyja miechanizmy pravavoha supracoŭnictva.

«Palitviaźniaŭ nie pavinna być u Jeŭropie.

Pavodle jaho słoŭ, heta pieršy vypadak, kali

pradastaŭlenaja Litvoj pa damovie ab mižnarodnym supracoŭnictvie infarmacyja pryviała da takich vynikaŭ. Vice-ministr nazvaŭ dziejańni Biełarusi nieprystojnym.

Taksama jon vykazaŭ nadzieju, što prahały ŭ miechaniźmie pravavoj dapamohi ŭ chutkim časie buduć likvidavanyja, i pradastaŭleńnie pravavoj dapamohi Biełarusi možna budzie adnavić z upeŭnienaściu, što padobnaje nie paŭtorycca.

Pa śćviardžeńni Vajtkiavičusa, Miniust atrymaŭ chadajnictva ab pravavoj dapamohi, u jakim ukazvałasia proźvišča, ale

niedaacaniŭ mahčymaść taho, što infarmacyja, atrymanaja pa chadajnictvie ab pravavoj dapamozie, moža być vykarystana ŭ palityčnych metach.

«Kali b što-niebudź pakazvała, što pravavaja dapamoha moža być vykarystana ŭ palityčnych metach, my b jaje nie padavali. U nas jość prava nie pradastaŭlać takuju ​​dapamohu. My na heta (udzieł Bialackaha u pravaabarončaj dziejnaści) nie źviarnuli ŭvahi.

Heta proźvišča nie była identyfikavanaja jak proźvišča asoby, kirujučaha apazicyjnym rucham», - pryznaŭ vice-ministr.

Pavodle jaho słoŭ, nie była atrymana infarmacyja ab mahčymym vykarystańni instrumientaŭ pravavoj dapamohi z metaj raspravy ź dziejačam apazicyi. Pavodle śćviardžeńnia Vajtkiavičusa, «pavodle standartnaj pracedury» ministerstva pavinna atrymlivać takuju ​​infarmacyju, ale hety miechanizm nie spracavaŭ.

Kančatkovaje rašeńnie ab pradastaŭleńni infarmacyi słužbam Biełarusi pryniało kiraŭnictva Departamienta mižnarodnaha prava Miniusta.

Vajtkiavičus taksama skazaŭ, što sioleta Litva pieradała dla Biełarusi infarmacyju pra 400 čałaviek, a Biełaruś dla Litvy pieradała padobnuju infarmacyju pra 500 čałaviek. Siarod inšaha, Biełarusi była pieradadzienaja i infarmacyja ab pryvatnych rachunkach, adkrytych na imia pravabaroncy Alesia Bialackaha i niekatorych inšych biełaruskich pravaabaroncaŭ u litoŭskich bankach «DnB NORD» i «SEB». Banki mieli prava admovicca vydać hetuju infarmacyju, zajaviŭ vice-ministr. Pavodle jaho, ministerstva nakiravała ŭ banki rekamendacyju pieradać hetuju infarmacyju, ale heta nie było zahadam.

* * *

Padstavaj dla aryštu kiraŭnika pravaabarončaha centra «Viasna» Alesia Bialackaha i pieratrusaŭ u hetaj arhanizacyi stała infarmacyja ab bankaŭskich rachunkach, jakuju biełaruskamu boku pradastaviła Ministerstva justycyi Litvy,

Valancin Stefanovič, adkazvajučy na pytańni žurnalistaŭ u Domie pravoŭ čałavieka, rascaniŭ takija dziejańni litoŭskaha viedamstva jak nieparazumieńnie, jakoje, adnak, doraha abydziecca.

«Rasceńvaju jak nieparazumieńnie, ale jano budzie doraha nam kaštavać», — skazaŭ pravaabaronca.

Pavodle jaho słoŭ, infarmacyja ab rachunkach była pieradadzienaja ŭ sakaviku hetaha hoda. U pačatku lipienia V. Stefanovič i A. Bialacki byli vyklikanyja ŭ Padatkovuju inśpiekcyju, jakaja pradjaviła pravaabaroncam akt i razdrukoŭki bankaŭskich rachunkaŭ u bankach SEB i NORD, paviedamlaje ru.delfi.lt

Kiraŭnik pravaabarončaha centra «Viasna» Aleś Bialacki byŭ zatrymany viečaram 4 žniŭnia.

Na jaho kvatery, leciščy i ofisie «Viasny» prajšli pieratrusy. Na častku majomaści, jakaja znachodziłasia ŭ ofisie, byŭ nakładzieny aryšt. Z kvatery Bialackaha, dzie pieratrus prajšoŭ raniej, zabrali kampjutar.

Paśla dopytu ŭ Departamiencie finansavych rasśledavańniaŭ Kamiteta dziaržkantrolu Bialacki byŭ ŭziaty pad vartu. Jak paviedamiła pravaabaronca Taćciana Raviaka, jon zatrymany na troje sutak u jakaści padazravanaha pa kryminalnaj spravie, zaviedzienaj pa častcy 2 artykuła 243 Kryminalnaha kodeksa Biełarusi (uchileńnie ad vypłaty sum padatkaŭ, zboraŭ u asabliva bujnym pamiery). Maksimalnaje pakarańnie pa hetym artykule praduhledžvaje pazbaŭleńnie voli da siami hadoŭ z kanfiskacyjaj majomaści.

Ciapier Aleś Bialacki znachodzicca ŭ kamiery ŭ Departamiencie finansavych rasśledavańniaŭ KDK.

* * *

«Ja dumaju, heta źviazana z tym, što my akazvali nie tolki pravavuju, ale i materyjalnuju padtrymku achviaram represij. Dumaju, źviazana mienavita z hetym», — zajaviła supracoŭnica «Viasny» Taćciana Raviaka.

Aleś Bialacki — pavažany na ceły śviet pravaabaronca — byŭ abrany vice-prezidentam Mižnarodnaj federacyi pravoŭ čałavieka. Niekalki hod tamu Bialackaha vyłučali na Nobeleŭskuju premiju miru.

U Biełarusi pravaabaroncy «Viasny» akazali dapamohu sotniam, kali nie tysiačam represavanych.

• 0
• 0
• 0
• 0
• 0
• 0
• 0
• 0