Ekanamičny kryzis u Biełarusi adbiŭsia na płaciežazdolnaści studentaŭ EHU i na pracy VNU
Ab hetym zajaviła prarektar pa pytańniach administracyi i infrastruktury EHU Irena Vajšviłajte ŭ videaintervju, raźmieščanym na sajcie EHU.
Jak paviedamiła Vajšviłajte, kiraŭnictva EHU pradbačyła mahčymyja nastupstvy kryzisu ŭ Biełarusi i vyrašyła z novaha navučalnaha hoda na 50% pavialičyć dapamohu studentam. «Heta raściahvaje nam biudžet.
Davodzicca ekanomić, my ŭžo zrazajem niekatoryja artykuły raschodaŭ — prykładna na 100 tysiač jeŭra»,— adznačyła prarektar.
«Z druhoha boku, — pradoŭžyła jana, — my prapanavali studentam vybirać pamiž dvuchrazovaj apłataj i płataj pamiesiačna, biez usialakich pracentaŭ, majučy na ŭvazie ciažkaści z dostupam da valuty. My razumiejem, što asablivyja ciažkaści buduć nieści studenty, jakija sami zarablajuć na svaju adukacyju. My budziem havaryć ab hetym z našymi donarami, ale nie dumajem, što chtości ryniecca nas ratavać, chutčej za ŭsio, daviadziecca prymać unutranyja miery».
Vajšviłajte taksama paviedamiła, što pa mižnarodnaj prahramie abmienaŭ «Erazmus» EHU atrymaŭ «vialikaje finansavańnie». «Amal 90 tysiač jeŭra — heta vielmi vialikija mahčymaści. Ale ŭvaha studentaŭ da hetych mahčymaściej pakul niedastatkovaja», — zaŭvažyła jana.
EHU taksama płanuje pierajechać u inšy budynak.Pavodle słoŭ prarektara, užo pačalisia raboty pa rekanstrukcyi «pryhožaha staroha budynka XVII stahodździa». «Jon źjaŭlajecca ŭłasnaściu litoŭskaj dziaržavy i nie vykarystoŭvaŭsia apošnija 20 hadoŭ, a dahetul tam byŭ skład», — skazała Vajšviłajte. Pieršy miljon lit na rekanstrukcyju budynka «tolki što vydzieleny praz uradavy fond Ministerstvu adukacyi». Čakajecca, što raboty buduć doŭžycca dva z pałovaj — try hady.
***
Jeŭrapiejski humanitarny ŭniviersitet byŭ adkryty ŭ Minsku ŭ 1992 hodzie. U 2004 hodzie biełaruskija ŭłady, niezadavolenyja samastojnaściu kiraŭnictva EHU, jaho imknieńniem da niezaležnaści, zakryli VNU. U 2005 hodzie EHU adnaviŭ pracu ŭ Vilniusie ŭ statusie biełaruskaha ŭniviersiteta ŭ vyhnańni. Asnoŭnuju častku studentaŭ EHU składajuć biełarusy.
Kamientary