«Płatforma» atrymała jašče adno paćviardžeńnie masavaha źbivańnia źniavolenych u ivacevickaj kałonii

Infarmacyjna-aśvietnickaja ŭstanova «Płatforma» atrymała čarhovaje paćviardžeńnie masavaha źbivańnia źniavolenych u ivacevickaj kałonii № 5 (Bresckaja vobłaść). Pra heta BiełaPAN paviedamiŭ dyrektar «Płatformy» Andrej Bandarenka.

Raniej z prośbaj ab dapamozie źviarnułasia maci asudžanaha Ramiza Mamiedava, jaki znachodzicca ŭ hetaj kałonii. «Na siońnia nie ŭsie detali paviedamleńnia ŭdałosia pravieryć, adnak dakładna viadoma, što 27 lipienia ŭ PKT (pamiaškańnie kamiernaha typu) supracoŭniki kałonii žorstka źbili šaściarych źniavolenych. Dvoje źniavolenych byli dastaŭleny ŭ haradskuju balnicu, adzin ź ich — na nasiłkach. Astatnim paciarpiełym dapamohu akazvali ŭ kałonii», — paviedamiŭ Bandarenka.

«28 žniŭnia ŭstanova „Płatforma“ źviarnułasia ŭ Hienprakuraturu Biełarusi, departamient vykanańnia pakarańniaŭ (DVP) i va ŭpraŭleńnie ŭłasnaj biaśpieki MUS z patrabavańniem pravieści detalovuju pravierku ŭkazanych faktaŭ i pryciahnuć da adkaznaści vinavatych. Nijakich adkazaŭ my nie atrymali, zatoje atrymali paćviardžeńnie faktaŭ źbivańnia. Heta stała viadoma z ananimnaha telefanavańnia ŭ redakcyju „Radyjo Svaboda“. U tym, što źniavolenych u ivacevickaj kałonii źbili, my ni na siekundu nie sumniavalisia. Telefanavańnie stała jašče adnym paćviardžeńniem», — skazaŭ Bandarenka.

«Płatforma» rychtuje čarhovuju adozvu ŭ Hienieralnuju prakuraturu z hetaj nahody. «Dva sihnały śviedčać ab tym, što fakt źbivańnia byŭ. Tamu my patrabujem ad Hienprakuratury pravieści nie pravierku, a detalovaje rasśledavańnie hetaj spravy», — padkreśliŭ Bandarenka.

Jon adznačyŭ, što fakt źbivańnia Ramiza Mamiedava ŭklučany ŭ zvarot u Kamitet suprać katavańniaŭ AAN. «Kali najbližejšym časam nie pačniecca rasśledavańnie, daviadziecca dapaŭniać zvarot i biaździejnaściu prakurorskich orhanaŭ», — skazaŭ dyrektar «Płatformy».

Pavodle jaho słoŭ, siońnia niama dakumientalnaha paćviardžeńnia tamu, jakija mienavita cialesnyja paškodžańni byli naniesieny asudžanym, u tym liku niama paćviardžeńnia, što ŭ Mamiedava była złamana klučyca. «Administracyja budzie rabić usio, kab utaić hety fakt, a DVP nie dazvolić nam naviedać kałoniju. Tym nie mienš sam fakt źbivańniaŭ schavać nie atrymajecca, i my prykładziem maksimum namahańniaŭ, kab vinavatyja ŭ złačynstvie apynulisia pobač z tymi, da kaho jany prymianiali katavańni», — zajaviŭ Bandarenka.

Jak raniej paviedamlaŭ BiełaPAN, u kałonii infarmacyju pra źbivańnie abvierhli i nazvali jaje nie adpaviednaj sapraŭdnaści.

• 0
• 0
• 0
• 0
• 0
• 0
• 0
• 0