18 vieraśnia ad ciažkaj chvaroby pamierła Halina Siamdzianava, deputat Apazicyi BNF u Viarchoŭnym Saviecie 12-ha sklikańnia.
18 vieraśnia ad ciažkoj chvaroby pamiorła Halina Siamdzianava, deputat Apazycyi BNF u Viarchoŭnym Saviecie 12-ha sklikańnia, adna ź lideraŭ biełaruskaj demakratyčnaj niezaležnickaj apazycyi, paviedamiŭ u svaim błohu Vincuk Viačorka.
Halina Hieorhijeŭna Siamdzianava naradziłasia 28 lutaha 1947 hodu ŭ Hdyni (Polšča), u siamji ŭdzielnikaŭ vajny — marskoha aficera i staršaj aperacyjnaj siastry vajennaha špitala. Ajčym Jakaŭ Ivanavič Kazłoŭ, jaki vychoŭvaŭ Halinu, byŭ vajennym lotčykam. U vajnu jahony samalot byŭ źbity, sam jon surjozna paranieny, adnak viarnuŭsia ŭ šycht. Paśla vajny słužyŭ taksama ŭ Biełarusi, zakončyŭ słužbu hienerał-majoram.
Halina Siamdzianava zakončyła Kujbyšaŭski politechničny instytut, pracavała ŭ abaronnaj pramysłovaści na inžynerskich pasadach. Ale sumavała pa Biełarusi, ź jakoj byli źviazanyja najlepšyja ŭspaminy dziacinstva.
Viarnuŭšysia ŭ Biełaruś, Halina Siamdzianava pačała pracu ŭ Kamitecie narodnaha kantrolu, uznačalvała Navahradzki rajonny KNK.
Jaje sumlennaść, čułaść da ludziej zabiaśpiečyli joj vialiki aŭtarytet, i ŭ 1990 hodzie Halina Siamdzianava była vybranaja narodnym deputatam Viarchoŭnaha Savietu Biełaruskaj SSR ad Navahradzkaj vybarčaj akruhi № 262.
U Viarchoŭnym Saviecie Halina Siamdzianava stała adnym z najbolš prafesijnych i zapatrabavanych deputataŭ. Jana zrabiła svoj idejny vybar: uvajšła ŭ Deputackuju hrupu BNF u Viarchoŭnym Saviecie, była staršynioj jaje Revizijnaj kamisii. Pracavała ŭ Kamisijach Viarchoŭnaha Savietu pa ekalohii i racyjanalnym vykarystańni pryrodnych resursaŭ; pa tavarach narodnaha spažyvańnia, handli i pasłuhach nasielnictvu; u Časovaj kamisii Viarchoŭnaha Savietu pa pryvilejach.
Halina Siamdzianava — adna z tych, chto damohsia abviaščeńnia niezaležnaści Biełarusi ŭ 1991 hodzie. Nieacennyja zasłuhi Haliny Siamdzianavaj u stvareńni zakanadaŭčaj bazy niezaležnaści našaj krainy. Jana suaŭtar Kancepcyi pierachodu Biełaruskaj SSR da rynkavaj ekanomiki (vosień 1990). Udzielničała ŭ raspracoŭcy i pryniaćci dziasiatkaŭ zakanadaŭčych aktaŭ, u tym liku Deklaracyi ab dziaržaŭnym suverenitecie Respubliki Biełarusi, zakonaŭ dla specyjalnaj sesii Viarchoŭnaha Savietu 24-25 žniŭnia 1991 hodu, kali była abvieščanaja niezaležnaść.
Jana była aŭtaram zakanadaŭčych prapanovaŭ, nakiravanych na stvareńnie armii Respubliki Biełarusi. Staršyniavała ŭ Biełaruskaj asacyjacyi vajskoŭcaŭ «Viartańnie», jakaja paśla raspadu Savieckaha Sajuzu dapamahła viarnucca ŭ Biełaruś bolš jak čatyrom tysiačam vajskoŭcaŭ, u tym liku z zonaŭ uzbrojenych kanfliktaŭ.
U 1996-1997 hadach uvachodziła ŭ Sakrataryjat Viarchoŭnaha Savietu 13-ha sklikańnia, jaki praciahvaŭ pracu paśla hvałtoŭnaha razhonu 1996 hodu.
U Partyi BNF Halina Siamdzianava była adnym z najbolš aŭtarytetnych lideraŭ i ekspertaŭ. Zajmała pasady namieśnicy staršyni (2002-2006), staršyni Jurydyčnaj kamisii, staršyni Revizijnaj kamisii (da 2010).
U 2008 hodzie była nakiravanaja ad BNF u Centralnuju kamisiju pa vybarach i respublikanskich referendumach, u 2010-m — u Mienskuju haradzkuju kamisiju pa vybarach prezydenta. Pryncypova adstojvała zakonnaść, prafesijna vykryvała falsyfikacyi, advažna zajaŭlała asobnuju dumku. Za heta nia raz ciarpieła pieraśled i sproby zapałochvańnia ad uładaŭ. Ale ź joj byli vymušanyja ličycca navat zaciatyja apanenty.
Ad nas adyšoŭ vydatny čałaviek, histaryčnaja postać. My žyviem u niezaležnaj krainie i dziakujučy Halinie Siamdzianavaj. Śvietłaja pamiać.
Infarmacyja pra miesca i čas pachavańnia Haliny Siamdzianavaj budzie paźniej.
Ciapier čytajuć
«Łukašenka pavinien panieści adkaznaść za saŭdzieł u rasijskaj ahresii». Ministr zamiežnych spraŭ Ukrainy raskazaŭ pra novuju palityku ŭ dačynieńni da Biełarusi2727
Kamientary