Dziaržaŭnyja i nabližanyja da ŭładaŭ ŚMI robiać usio mahčymaje, kab hetaje niavierje tolki ŭmacoŭvałasia.
Naviešvańnie jarłykoŭ, niedahavorki, manipulacyja faktami, a to i nieprychavanaja chłuśnia — aficyjnaja presa, nabližanyja da ŭładaŭ infarmahienctvy i štatnyja prapahandysty robiać usio mahčymaje, kab pasiejać niedavier da aficyjnaj ža viersii pryčyn trahiedyi ŭ minskim mietro. Prykładaŭ šmat, tamu spyniusia na samych śviežych.
«My žyli ŭ mirnaj, spakojnaj, radasnaj krainie»
Na piaty dzień suda pa spravie teraktaŭ dziaržaŭnaje ahienctva BiełTA źmiaściła kamientar pad zahałoŭkam «Jany ŭzarvali naša byćcio». Artykuł vielmi charakterny, bo tut jość usio z vyšejpieraličanaha — ad manipulacyj da jarłykoŭ. Aŭtar Maksim Hilevič pačynaje z taho, što naŭprost nazyvaje abvinavačanych Kavalova i Kanavałava terarystami. Choć prava takoje maje tolki sud. I nie daj boh "Našaj Nivie" takoje napisać -- nas by zaraz ža čakała papiaredžańnie i štraf.
«My žyli ŭ mirnaj, spakojnaj, radasnaj krainie. Vybuch u Viciebsku zdavaŭsia nam dziciačym svavolstvam. Vybuch u Minsku na Dzień niezaležnaści — chulihanstvam, chaj i zanadta žorstkim. Vybuch u mietro pastaviŭ kropku», — praciahvaje aŭtar. Śpiecyfičnaje, pryznajusia, ŭjaŭleńnie ŭ spadara Hileviča pra spakoj i radaść, kali paŭsotni paranienych u Viciebsku i hetulki ž ŭ Minsku padajucca jamu ŭsiaho tolki svavolstvam i chulihanstvam. Što tut kazać pra takuju «drobiaź», jak aryšt sotniaŭ demanstrantaŭ i pasadka ŭ turmu kandydataŭ u prezidenty ŭ dzień vybaraŭ. Chiba što heta ŭžo stała normaj dla «spakojnaj i radasnaj krainy».
Drobiaźziu dla aŭtara akazałasia i źlohku zmanić pra ŭviadzieńnie nadzvyčajnych mieraŭ biaśpieki na masavych mierapryjemstvaŭ. Jon śćviardžaje, što «kraina stała druhoj, padazronaj» paśla 11 krasavika. Nahadajem ža jamu, što turnikiety i mietałašukalniki źjavilisia ŭ 2008 hodzie, paśla «chulihanstva» kala steły na praśpiekcie Pieramožcaŭ.
Dalej Maksim Hilevič paraŭnoŭvaje vyniki rasśledavańnia ŭzarvanych u 1999 hodzie žyłych damoŭ u Maskvie i pośpiechi biełaruskich śledčych u spravie 11 krasavika. Jon cytuje žančynu, što žyvie ŭ adbudavanym na miescy maskoŭskaj trahiedyi domie. Jana kaža, što žyvie z pačućciom nieviadomaści, nie viedajučy, dzie rvanie ŭ nastupny raz. Aŭtar z honaram kaža, što «ŭ Minsku spracavali inakš». Što pamiž vybucham i pieršym dniom suda «ŭsiaho piać miesiacaŭ». Ja adzin čahości nie razumieju? A jak ža aficyjnaja viersija pra toje, što abvinavačanyja ŭžo bolš za dziesiać hadoŭ adtočvali svajo čornaje majsterstva?
«U 2006-m hałasavaŭ za Milinkieviča»
Uśled za BiełTA adznačyłasia infarmahienctva «Interfaks». Heta ź jahonaj padačy pajšła hulać na stužkach navinaŭ infarmacyja pra toje, za kaho ŭ 2006 hodzie hałasavaŭ abvinavačany Kanavałaŭ. Tut i pytańnie da śledčych, navošta pra heta pytali ŭ časie dopytu. Ale jašče bolš niezrazumieła, navošta było publikavać mienavita hety epizod z pratakoła dopytu, kali cudoŭna viadoma, što datyčnaści ni Milinkieviča, ni kahości ź jaho atačeńnia, ni ŭvohule apazicyi da trahiedyi ŭ mietro niama? Čamu nie nadrukavać, što Kanavałaŭ byŭ u BRSMie? Na minułym tydni žurnalist dziaržaŭnaha telekananała ŭžo abvinavaciŭ apazicyjnych aktyvistaŭ u spačuvańni da terarystaŭ. Składvajecca ŭražańnie, što chtości nie spyniaje sprobaŭ vykarystać terakt dla dyskredytacyi apanientaŭ. Ci moža adciahnuć uvahu i padazreńni ad siabie? U lubym vypadku, usio heta padazrona.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary