Rašeńnie adnosna vizitu ŭ Biełaruś nastupnaj misii MVF jašče nie pryniataje

Rašeńnie adnosna vizitu ŭ Biełaruś nastupnaj misii Mižnarodnaha valutnaha fondu (MVF) dla pieramoŭ z uładami ab novaj prahramie stand-by jašče nie pryniataje. Pra heta BiełaPAN zajaviła pastajanny pradstaŭnik MVF u Biełarusi Natalla Kaladzina.

«Dla taho kab takoje rašeńnie było pryniataje, fondu nieabchodna mieć upeŭnienaść, što ŭłady majuć ćviordy namier zabiaśpiečyć stabilnaść i praviadzieńnie reform u nastupnym hodzie. Pryčym, hetyja namiery pavinny być prademanstravanyja na ŭsich uzroŭniach ułady, u tym liku i na samym vysokim», — rastłumačyła Kaladzina.

Jana nahadała, što apošniaja misija MVF pracavała ŭ Biełarusi ŭ kastryčniku. «Tady my nie płanavali praviadzieńnie misii ŭ śniežni. Ale pakolki ŭłady vykazali zacikaŭlenaść u pačatku pieramoŭ pa novaj prahramie sioleta, to, kali my ŭbačym, što hety namier zastajecca ŭ sile, i adnačasova budziem upeŭnienyja ŭ namierach uładaŭ pravodzić palityku makraekanamičnaj stabilizacyi jak sioleta, hetak i na nastupny hod, i pačać strukturnyja pieraŭtvareńni, to, ja miarkuju, što isnavała b mahčymaść taho, što misija pryjechała b da kanca hetaha hoda dla pačatku pieramoŭ», — skazała pastajanny pradstaŭnik MVF.

Natalla Kaladzina nahadała, što zaraz biełaruskija ŭłady pracujuć nad asnoŭnymi ekanamičnymi dakumientami na 2012 hod i heta šyroka abmiarkoŭvajecca ŭ presie. «Miarkuju, my zmožam sfarmiravać svoj ułasny pohlad adnosna taho, jakoj ekanamičnaj palityki buduć prytrymlivacca ŭłady ŭ nastupnym hodzie», — zaznačyła pastajanny pradstaŭnik MVF.

17 kastryčnika pa vynikach pracy apošniaj misii MVF u Biełarusi jaje kiraŭnik Krys Džarvis zajaviŭ, što dla pačatku pieramoŭ ab prahramie finansavaj padtrymki z boku fondu biełaruskimi ŭładami pavinny być zroblenyja pierakanaŭčyja kroki ŭ ekanamičnaj palitycy. Aprača taho, ekśpierty MVF chacieli b viedać, jakuju hrašova-kredytnuju palityku ŭrad i Nacbank prapanoŭvajuć na nastupny hod i ci buduć hetyja rekamiendacyi padtrymanyja prezidentam Biełarusi.

«My pakul što nie padyšli da etapu, pry jakim abmiarkoŭvałasia b kankretnaja suma kredytu», — padkreśliŭ Džarvis padčas kastryčnickaj misii. «Tyja sumy, jakija raniej nazyvalisia (ad 3 da 7 młrd. dołaraŭ), — heta była acenka ŭrada», — dadaŭ jon.

Kiraŭnik Nacbanka Nadzieja Jermakova ŭ pačatku kastryčnika zajaviła, što kredyt MVF patrebny Biełarusi «dla refinansavańnia tych kredytaŭ, pa jakich chutka nadyduć terminy viartańnia», heta značyć dla viartańnia asnoŭnaha doŭhu fondu na praciahu 2012–2013 hadoŭ.

Na pres-kanfierencyi 20 kastryčnika Jermakova zajaviła, što atrymańnie kredytu MVF abciažarvajecca pa palityčnych matyvach. «Kredytu MVF moža i nie być. Navat kali my na 100% usio vykanajem (umovy dla pačatku kredytnaj prahramy. — BiełaPAN.), zastajucca palityčnyja momanty, i heta hałoŭny faktar pa ŭzajemaadnosinach z MVF. Nie z hetaj misijaj, a z pradstaŭnikami šerahu krain, što ŭvachodziać u Saviet dyrektaraŭ MVF. Dla ich bolš važnaja palityka, a nie ekanomika», — skazała Jermakova.

22 listapada ŭ Alaksandra Łukašenki projdzie narada pa prajektach prahnozu, biudžetu i asnoŭnych kirunkaŭ hrašova-kredytnaj palityki na 2012 hod. Na naradzie 10 listapada prezident Biełarusi raskrytykavaŭ refarmisckija płany ŭrada i zapatrabavaŭ ad Savieta ministraŭ vykonvać prahramu, uchvalenuju hod tamu Usiebiełaruskim narodnym schodam.

• 0
• 0
• 0
• 0
• 0
• 0
• 0
• 0