Pradprymalniki staličnaha Červieńskaha rynku abjavili pieradzabastovačny stan

Jak paviedamiŭ BiełaPAN indyvidualny pradprymalnik Vasil Baranoŭski, jaki handluje na rynku, prapanova ab zabastoŭcy ŭchvalena 23 listapada na schodzie z udziełam prykładna 350 pradprymalnikaŭ. Prysutnyja pryniali rezalucyju, u jakoj abjavili ab pieradzabastovačnym stanie ź siońniašniaha dnia ŭ suviazi z tym, što «haradskija ŭłady ihnarujuć spraviadlivyja patrabavańni pradprymalnikaŭ i prostych ludziej».

Pradprymalniki taksama patrabujuć čarhovaj sustrečy sa staršynioj Minharvykankama Mikałajem Ładućkam i pradstaŭnikami kampanii-zabudoŭščyka «Dydas Internešnł Hrup» (Iran).

«Zhodna z damoŭlenaściu z departamientam pradprymalnictva Ministerstva ekanomiki patrabujem arhanizavać i pravieści na jaho bazie pieramovy ź minskimi ŭładami i ŭsimi zacikaŭlenymi asobami z metaj vypracoŭki i pryniaćcia rašeńnia pa prablemie našaha rynku i pravieści ahulny schod arandataraŭ, na jakim buduć pryniaty rašeńni ab dalejšych dziejańniach», — havorycca ŭ rezalucyi.

Nahadajem, 21 červienia na sustrečy z pradprymalnikami Ładućka zajaviŭ, što haradskija ŭłady razhladajuć dva varyjanty novych placovak u Leninskim rajonie stalicy, kudy možna pieranieści rynak. «My abmiarkoŭvali varyjant u mikrarajonie Łošyca, ale pryjšli da vysnovy, što tam placoŭka nie zusim uładkavana, tam adsutničajuć inžyniernyja kamunikacyi», — skazaŭ Ładućka.

Jon abaviazaŭsia na praciahu tydnia prainfarmavać pradprymalnikaŭ ab kankretnym miescaznachodžańni novaj placoŭki i paviedamiŭ, što častku rabot pa arhanizacyi novaj placoŭki hatova ŭziać na siabie administracyja Kamaroŭskaha rynku, u čyim padparadkavańni znachodzicca i Červieński rynak. Aprača taho, pavodle słoŭ Ładućki, častka srodkaŭ, jakija pieraličyć iranskaja kampanija «Dydas», budzie vykarystana dla ŭładkavańnia novaj terytoryi rynku.

Adnak 31 kastryčnika pradstaŭniki rajonnaj i haradskoj ułady paviedamili pradprymalnikam, što pieramiaščacca im niama kudy: budaŭnictva novaj placoŭki ŭzamien Červieńskaha rynku jašče nie raspačata, bo na heta nie byli praduhledžany biudžetnyja srodki. Čynoŭniki paraili pradprymalnikam pierajści na inšyja handlovyja abjekty — rynak «Ždanovičy», Kamaroŭski rynak i h.d., adnak bolšaść arandataraŭ handlovych punktaŭ heta prapanova nie zadavoliła.

Na pres-kanfierencyi 18 listapada Ładućka paviedamiŭ, što rynak u Łošycy ŭzamien Červieńskaha budzie pabudavany praz paŭtara-dva hady.

Jak zajaviŭ paśla siońniašniaha schodu Vasil Baranoŭski, pradprymalniki ličać siabie padmanutymi. Na ich dumku, budaŭnictva trochpaviarchovaha rynku ŭ Łošycy, a nie na adkrytaj placoŭcy, paciahnie šmatrazovaje pavieličeńnie zatrat i arendnaj płaty. «Za košt minimalnaj arendnaj płaty składvalisia i ceny na rynku», — zaznačyŭ pradprymalnik.

Aprača taho, zaznačyŭ jon, pradprymalnikam Červieńskaha rynku ŭłady abiacali skidki z arendnaj płaty na inšych rynkach, adnak na spravie heta abiacańnie nie vykonvajecca.

Baranoŭski paviedamiŭ, što sabrany podpisy 3,5 tysiačy žycharoŭ rajona suprać znosu Červieńskaha rynku i budaŭnictva ŭzamien jaho handlova-zabaŭlalnaha centra.

«Ludzi vielmi razzłavanyja za toje, što ich padmanuli, — zajaviŭ u kamientaryi BiełaPAN staršynia hramadskaha abjadnańnia „Pierśpiektyva“ Anatol Šumčanka. — Siońnia hučali prapanovy ab praviadzieńni zabastovak. Kali ŭłady nie vykanajuć toje, što abiacali raniej, zabastoŭka na Červieńskim rynku adbudziecca adnaznačna».

Šumčanka paviedamiŭ, što ŭ chutkim časie projdzie pres-kanfierencyja, na jakoj budzie padrabiazna paviedamlena pra situacyju vakoł rynku.

«Minčanam treba pastavić pytańnie rubam: čamu haradskija ŭłady pravodziać antynarodnuju palityku i nie ŭličvajuć mierkavańnie bolšaści žycharoŭ stalicy? Heta tyčycca znosu kijoskaŭ, likvidacyi rynkaŭ. Takoha niama ŭ rehijonach i tyčycca tolki Minska. Raźvićcio pradprymalnictva ŭ Minsku nie idzie, jano zastoparyłasia, i z hetaj situacyi treba vychodzić», — upeŭnieny staršynia RHA «Pierśpiektyva».

• 0
• 0
• 0
• 0
• 0
• 0
• 0
• 0