Jak kaža sam Kośvincaŭ, jahonaje rašeńnie pakinuć Rasieju źviazanaje ź niespraviadlivymi pieraśledami z boku kiemieraŭskich uładaŭ. U mihracyjnuju słužbu žurnalist źviarnuŭsia ŭ Lvovie.
Kiemieraŭski žurnalist Alaksandar Kośvincaŭ źviarnuŭsia ŭ emihracyjnuju słužbu Ŭkrainy z prośbaj pra palityčny prytułak. Pra heta paviedamlaje rasiejskaje «Radyjo Svaboda».
Jak kaža sam Kośvincaŭ, jahonaje rašeńnie pakinuć Rasieju źviazanaje ź niespraviadlivymi pieraśledami z boku kiemieraŭskich uładaŭ. Pavodle jahonych słoŭ, abvinavačańni vyklikanyja jahonymi «žurnalisckimi raśśledavańniami nakont złačynnaj dziejnaści kiemieraŭskaha hubernatara Amana Tulejeva».
Ciapier Kośvincaŭ znachodzicca ŭ Lvovie, dzie i vyrašyŭ źviarnucca z svajoj prośbaj u rehijanalnaje adździaleńnie mihracyjnaj słužby. «Ja nie zrabiŭ hetaha ŭ Kijevie, Daniecku ci Łuhansku, bo tam vielmi mocnyja prarasiejskija nastroi j maja zajava nia mieła b naležnaha dziejańnia», — zajaviŭ jon.
Da letaś Kośvincaŭ pracavaŭ hałoŭnym redaktaram kiemieraŭskaj hazety «Rośsijskij rieportier». Aproč taho, jon uznačalvaŭ miascovaje adździaleńnie «Abjadnanaha hramadzianskaha frontu» Hary Kasparava.
Na pačatku 2006 hodu hubernatar rehijonu Aman Tulejeŭ źviarnuŭsia ŭ prakuraturu z skarhaj na Kośvincava. Tulejeŭ śćviardžaŭ, što na staronkach hazety «Rośsijskij rieportier» publikavałasia niepraŭdzivaja infarmacyja, jakaja dyskredytavała miascovyja orhany ŭłady.
Jak paviełamlaje Kasparov.Ru, u adnoj z publikacyjaŭ, jakaja najbolš vyklikała niezadavolenaść uładaŭ, paviedamlałasia pra pieravozku jadavitych adkidaŭ zołatazdabyčy ŭ vobłaści i rastratu miascovymi čynoŭnikami 150 miljonaŭ rasiejskich rubloŭ.
Ad Kośvincava patrabavali taksama raskazać pra jahony ŭdzieł u akcyjach AHF, piša «Novaja hazieta». Supracoŭniki prakuratury patrabavali ad žurnalista paviedamić źviestki pra jahony ŭdzieł u arhanizacyi i prynieści dakumanty AHF.
5 krasavika 2006 hodu pieršy namieśnik prakurora Centralnaha rajonu Kiemarava Dušyn napisaŭ Kośvincavu list z patrabavańniem źjavicca ŭ prakuraturu «dla dačy tłumačeńniaŭ pra pryčyny nievykanańnia rašeńniaŭ sudu pra zabaviazańnie apublikavać abviaržeńnie nie adpaviednych sapraŭdnaści i źniesłaŭlalnych dla honaru i hodnaści orhanaŭ dziaržaŭnaj ułady Kiemieraŭskaj vobłaści źviestak».
Spravaj žurnalista i jahonaha vydańnia zajmałasia ŭ tym liku Ŭpraŭleńnie FSB pa Kiemieraŭskaj vobłaści. Abłasnaja prakuratura pravodziła pravierku pravilnaści zasnavańnia i dziejnaści hazety «Rośsijskij rieportier».
Dziejnaść hazety nieadnarazova praviarałasia padatkovymi dy inšymi kantrolnymi orhanami. Nijakich parušeńniaŭ vyjaŭlena nie było. Adnak letaś vydańnie pierastała vychodzić ź finansavych pryčynaŭ.
Kamientary