Piva, BiełAZ, Kiežman, śpiecnaz

Čempijon

Bukmiekierskija kantory mohuć prosta nie prymać staŭki, chto budzie pieršym u čempijanacie Biełarusi. BATE staŭ najmacniejšym šosty raz zapar i vośmy ŭ historyi. Ciapier pa hetym pakaźniku barysaŭcy pierahnali minskaje «Dynama», pieramohi jakoha zastalisia ŭ 1990-ch.

Stabilnaść

U mai tradycyjna źmianiŭsia trenier minskaha «Dynama». Biźniesmien Jury Čyž nie ličyć da troch paraz. Adna-dźvie niaŭdačy — i tvajo kresła

zajmaje novy nastaŭnik. Rasijanina Aleha Vasilenku źmianiŭ suajčyńnik Siarhiej Aŭčyńnikaŭ. Praŭda, i jon užo biespracoŭny. «Dynama» ž zaniało ŭ čempijanacie tolki čaćviortaje miesca.

The best

Najlepšym trenieram čempijanatu byŭ Aleh Kubaraŭ, jaki pryvioŭ debiutanta «Homiel» da pieramohi ŭ Kubku i «bronzy» čempijanatu. Bramnik — Alaksandr Hutar (BATE), abaronca — Vadzim Jaŭsiejeŭ («Tarpieda-BiełAZ»), paŭabaronca — Renan Bresan (BATE), napadajučy — Jahor Zubovič («Biełšyna»). Bresan, da ŭsiaho inšaha, — najlepšy bambardzir druhi hod zapar.

Sychody

Darečy, aŭtar słavutaha «ch.j vam» u adras valijcaŭ Vadzim Jaŭsiejeŭ staŭ adnoj z razynak pieršynstva. Usie mierkavali, što ničoha vartaha tytułavany rasiejec u Biełaruś nie pryniasie. A jon byŭ sapraŭdnym žodzinskim važakom, na jakoha raŭnialisia svaje i čužyja. Navat BiełAZam nie pabajaŭsia kiravać. Praŭda, naleta Vadzima my nie pabačym. Jon vyrašyŭ zaviaršyć karjeru hulca. Jak i najlepšy snajpier u historyi našaha futboła Valery Strypiejkis.

Piva

Jaŭsiejeŭ, da słova, byŭ vielmi vysokaha mierkavańnia pra biełaruskaje ciomnaje piva. Toje samaje, jakoje pačali pradavać u minskaj Kuncaŭščynie na matčach «Dynama». Dazvoł na prodaž vybivali doŭha. Ciapier zaŭziatary mohuć prapuścić pierad pačatkam hulni ci ŭ pierapynku kufal chmialnoha napoju. U Jeŭropie heta daŭno norma. Da našych tolki pačało dachodzić.

Brend

Choć bresckaje «Dynama» prapisku ŭ elicie zachavała, naleta takoj kamandy moža ŭžo nie być. Sprava ŭ tym, što fizkulturna-spartyŭnaje tavarystva «Dynama» za svoj brend zapatrabavała 240 miljonaŭ rubloŭ na hod. U Breście ŭsio paličyli i pryjšli da vysnovy — doraha. Jak budzie nazyvacca kamanda, pakul nieviadoma. Niekali ŭ horadzie nad Buham kamandy zvalisia «Ruch» i «Pahonia». Čamu b nie viarnucca da karanioŭ.

Rasčaravańni

Zorny sierb Macieja Kiežman tak i nie zabiŭ u składzie BATE nivodnaha hoła. Zastavacca ŭ Biełarusi jon nie haryć žadańniem. Forvard biełaruskaj «maładziožki» Uładzimir Jurčanka ŭvieś siezon pravalaŭsia z traŭmami. Jurčanka, darečy, cyhanskaha pachodžańnia, a dziadźka jahony — baron.

Adkryćcio

17-hadovy vunderkind z Hrodna Pavieł Savicki. Jon staŭ najlepšym bambardziram i lidaram svajoj kamandy, ciapier za im palujuć BATE i picierski «Zienit». U «Niomanie» ŭvohule dastatkova šmat maładych i pierśpiektyŭnych. Budzie naleta kamanda, kali nie raskupiać.

Recikaŭ

Bojka pamiž fanatami «Dynama» i babrujskim śpiecnazam adbyłasia ŭ pieršaj pałovie čempijanatu. Praparščyk Recikaŭ, što puściŭ ślezaciečny haz na trybuny, pakarany nie byŭ. Paciarpieli tady nie tolki fany, ale i futbalist Afanaśjeŭ.

Niaŭdačnik

Letaś «Dniapro» pašumieŭ u Jeŭropie, pieramahajučy kamandy z Narviehii, Čechii. A sioleta vylecieŭ z vyšejšaj lihi. Mahiloŭcy — čaćviortaja kamanda-čempijon, jakaja apuskałasia z elity. Da jaho byli «Słavija», «Biełšyna» i «Homiel».

Pierformans

Fanaty minskaha «Dynama» čytali na trybunach haziety. Naviedvalnaść trybun zastajecca balučym miesca pieršynstva. Sioleta jana vyrasła tolki ŭ taho ž «Dynama» i žodzinskaha «Tarpieda». U Biełarusi na futboł chodziać tolki siamiora z tysiačy, u Niamieččynie — 79.

• 0
• 0
• 0
• 0
• 0
• 0
• 0
• 0