Biełarusu ź siaredniaj zarpłataj banki mohuć pazyčyć na 3 kvadratnyja mietry

U toj čas jak kryzis u Jeŭropie prymušaje tamtejšyja centrabanki rabić kredyty tańniejšymi, biełaruski Nacbank pryniaŭ čarhovaje rašeńnie ab pavyšeńni staŭki refinansavańnia. Nahadajem, učora pakazčyk, ad jakoha skačuć pracenty pa kredytach i ŭkładach, znoŭ padniali na 5%.

Ciapier u nas staŭka refinansavańnia 45%, a ŭ Jeŭropie — 1%.

Naturalna, čym vyšejšy pracent pa kredycie, tym bolšuju sumu treba budzie kožny miesiac addavać banku. A značyć, uzrastuć i patrabavańni bankaŭ da patencyjnych pazyčalnikaŭ — prablemnyja pazyki i niaviernutyja kredyty nikomu nie patrebnyja.

«Kamsamołka» vyrašyła pahladzieć, kolki hrošaj na roznyja kupli biełaruskija banki mohuć pazyčyć biełarusu, jaki atrymlivaje siaredniuju zarpłatu — 2,3 młn rubloŭ.

Na kvateru: «Maksimalnaja suma kredytu — «0»!

Kupić kvateru na svaje źbieražeńni praktyčna nierealna. Navat na adnapakajoŭku ŭ staličnaj panelcy ź siaredniaha zarobku treba adkładać 18,5 hadoŭ! Pry hetym adkładać treba budzie ŭsiu zarpłatu da kapiejki. Słovam, kredyt — dobraja zapamoha ŭ vyrašeńni kvaternaha pytańnia.

Sadžusia abzvońvać banki, jakija ciapier zajmajucca kredytavańniem nieruchomaści.

— Razhlad zajaŭki kaštuje 750 tysiač rubloŭ. Maksimalnaja suma, jakuju vydaje naš bank pa kredytach na nieruchomaść, — 1 młrd rubloŭ, — ščabieča supracoŭnica adnaho z kamiercyjnych bankaŭ. Naturalna, kančatkovaja suma dla kožnaha klijenta budzie zaležać ad kankretnaj zarpłaty, a taksama taho, ci jość u vas inšyja kredyty, jakaja suma pieršapačatkovaha ŭznosu pry kupli kvatery.

U našym vypadku na siaredniuju zarpłatu bank hatovy pazyčyć dzieści 20 miljonaŭ rubloŭ. I heta pry ŭmovie, što kala pałovy koštu kvatery vy ŭniesiacie svaimi srodkami.

U inšym kamiercyjnym banku prapanavali pazyčyć kala 25 młn rubloŭ. Hetych hrošaj amal chopić na try kvadratnych mietry!

Zachodžu na sajt jašče adnaho banka. U raździele «Kredytny kalkulatar» uvodžu siaredni dachod kredytaatrymalnika — 2,3 młn rubloŭ. Paśla siekundnaj paŭzy atrymlivaju adkaz: «Prybytak niedastatkovy dla atrymańnia kredytu».

Kalkulatar u nastupnym banku ŭ hrafie «Maksimalnaja suma kredytu na kuplu žylla» prosta i kateharyčna napisaŭ «0».

Na mašynu: jeździć daviadziecca na 10-hadovym aŭto.

Z kredytami na mašyny situacyja vyhladaje krychu lepš. Pa-pieršaje, ich pakul jašče daje bolšaść bankaŭ. Adnak ŭładalniku siaredniaj zarpłaty pa krainie na kuplu novaj mašyny raźličvać nie varta.

— Pry zarpłacie ŭ 2,3 miljona rubloŭ, maksimalnaja suma kredytu składzie kala 47 młn rubloŭ, — padličyli ŭ adnym z kamiercyjnych bankaŭ, jakija kredytujuć kuplu aŭtamabilaŭ. — Štomiesiačny płaciež — 1,9 młn rubloŭ.

Ceny na mašyny ŭ nas pa-raniejšamu tolki ŭ valucie. Atrymlivajecca, što na hetuju sumu možna kupić aŭto niedzie za 5,6 tys. dalaraŭ. U aŭtasałon z takimi hrašyma chadzić nie maje sensu. A voś karystany aŭtamabil nahledzieć možna. Heta budzie, naprykład, «Ford Fokus» 1999 hoda vypusku, «Opiel Amieha» 1998 hoda abo navat «Piežo 306» 2000 hoda vypusku. Paśla vypłaty kredytu na žyćcio budzie zastavacca tolki 400 tysiač rubloŭ. Chopić na 70 litraŭ bienzinu. Tak što daloka na takim kredytnym aŭto nie źjedzieš.

Darečy, biada ciapierašnich aŭtakredytaŭ u tym, što banki časta vydajuć hrošy nie na ruki (ci kartku), a pieravodziać pa bieznajaŭnym raźliku na rachunak pradaŭca.

Heta značyć kupić mašynu z ruk nie zaŭsiody atrymajecca.

— Kali vy źbirajeciesia nabyvać aŭtamabil u fizičnaj asoby, to 20% ad koštu treba ŭnieści svaimi hrašyma, — prapanavali varyjant u inšym banku. — Staŭka pa kredycie budzie 51% hadavych. Jana pryviazanaja da staŭki refinansavańnia. Maksimalnaja suma — kala 32 młn rubloŭ. Štomiesiačny płaciež składzie kala 1,4 młn rubloŭ.

Darečy, kredyty na aŭto ŭ mnohich bankach zaviazanyja mienavita na staŭku refinansavańnia, heta značyć płaciažy pa ich mohuć źmianicca.

Na spažyvieckija vydatki: pierapłata moža być u dva razy bolšaj za toje, što vam pazyčyli.

Vyhada spažyvieckich kredytaŭ siońnia vielmi sumnieŭnaja. Voś prosty raźlik: u adnym z kamiercyjnych bankaŭ čałavieku ź siaredniaj zarpłataj u 2,3 młn rubloŭ na kuplu noŭtbuka (termin — paŭhoda) mohuć prapanavać u doŭh 4 młn rubloŭ. Kožny miesiac treba budzie addavać banku kala 780 tysiač rubloŭ.

Pavodle raźlikaŭ partała InfoBank.by pierapłata pa spažyvieckich kredytach moža być bolšaj za pałovu sumy kredytu ŭ hod! Naprykład, bieracie u doŭh 5 młn rubloŭ (na kuplu bytavoj techniki abo śviatkavańnie Novaha hoda), a addaście banku ad 2,5 młn da 4,5 młn rubloŭ zvyš hetaj sumy.

Dy i pazyčyć čałavieku ź siaredniaj zarpłataj banki ciapier mohuć niašmat. Maksimum, na jaki možna raźličvać, 8–10 młn rubloŭ, to bok tysiača dalaraŭ. Ni na ramont, ni na kuplu mebli takich hrošaj nie chopić. Pry hetym kožny miesiac treba budzie addavać banku kala 1 młn rubloŭ.

Jak daviedacca, kolki nasamreč kaštuje kredyt?

Naohuł pa zakonie poŭnuju pracentnuju staŭku banki pavinnyja nazvać svajmu klijentu. Ale zusim nie abaviazanyja adrazu zajaŭlać ich u rekłamie.

Niekatoryja banki navat u rekłamie na sajcie adrazu pišuć, kolki kaštuje kredyt z ulikam usich kamisij i płaciažoŭ. Adsiul i staŭki, jakija pałochajuć svaimi pamierami — u rajonie 80–100% hadavych.

A voś na staŭki, nižejšyja za staŭku refinansavańnia, varta źviarnuć pilnuju ŭvahu.

Na što źviarnuć uvahu, kali vy navažylisia ŭziać kredyt ciapier.

— Asabliva ŭvažlivymi da štomiesiačnych płaciažoŭ treba być pry atrymańni kredytaŭ na mašyny i kvatery, — rekamienduje analityk partała Info. Bank.by Kaciaryna Śmirnova. — 

Sumy pa takich kredytach značnyja, terminy praciahłyja, tamu navat maleńkaja kamisija moža ŭ vyniku vylicca ŭ vialikuju pierapłatu.

Akramia taho, čym chutčej bank prymaje rašeńnie i vydaje kredyt, čym mienš jon patrabuje dakumientaŭ i daručalnikaŭ (abo naohuł nie patrabuje), tym bolš vysokaj budzie poŭnaja pracentnaja staŭka i tym daražejšym budzie kredyt. Vyklučeńniem z hetaha praviła mohuć być ovierdraftnyja kredyty da zarobkavych kartak.

Taksama nieabchodna źviartać uvahu na toje, jakim sposabam vam prapanujuć pahasić kredyt — anuitetnym płaciažom (kali suma štomiesiačnaha płaciažu zaŭsiody budzie adnolkavaj), abo pamier płaciažu budzie pastupova pamianšajecca. Pierapłata pa kredycie ŭ pieršym vypadku budzie adnaznačna bolšaj, čym u druhim.

• 0
• 0
• 0
• 0
• 0
• 0
• 0
• 0