Łukašenka raźličvaje na dapamohu Rasii ŭ pytańni ŭvachodžańnia ŭ SHA

Biełaruś raźličvaje na ŭvachodžańnie krain Mytnaha sajuza ŭ Suśvietnuju handlovuju arhanizacyju ź minimalnym časavym razryvam. Ab hetym Alaksandr Łukašenka zajaviŭ 19 śniežnia na pasiadžeńni Vyšejšaha jeŭrazijskaha ekanamičnaha savieta ŭ Maskvie, paviedamlaje pres-słužba prezidenta.

«Uvachodžańnie ŭsich členaŭ Mytnaha sajuza ŭ SHA ź minimalnym časavym razryvam jašče bolš umacuje naša abjadnańnie i pavysić jaho mižnarodny aŭtarytet», — skazaŭ jon.

Łukašenka padkreśliŭ, što Biełaruś vitaje členstva Rasii ŭ SHA i raźličvaje na akazańnie sadziejańnia Biełarusi va ŭvachodžańni ŭ arhanizacyju. «Miarkuju, što status paŭnapraŭnaha člena SHA daść dadatkovyja mahčymaści našamu stratehičnamu partnioru dla sadziejańnia Biełarusi va ŭvachodžańni ŭ hetuju arhanizacyju», — zajaviŭ biełaruski kiraŭnik.

Rasija akaža Biełarusi ŭsiebakovuju padtrymku pa najchutčejšym uvachodžańni ŭ Suśvietnuju handlovuju arhanizacyju. Abiacańnie zamacavana ŭ Miemarandumie ab parazumieńni pa pytańniach uvachodžańnia ŭ SHA, padpisanym Alaksandram Łukašenkam i Dźmitryjem Miadźviedzievym. Baki damovilisia, što

Rasija budzie sadziejničać źniaćciu palityčnych pieraškod na šlachu arhanizacyi pieramoŭnaha pracesu Biełarusi ŭ SHA.

Akramia taho, Rasija pradastavić kansultacyjna-ekśpiertnaje sadziejańnie pry padrychtoŭcy biełaruskim bokam dakumientaŭ u ramkach pieramoŭnaha pracesu pa ŭvachodžańni ŭ SHA i pry nieabchodnaści razhledzić mahčymaść vydzialeńnia dadatkovaj techničnaj dapamohi na hetyja mety.

Baki ŭmovilisia, što paśla aficyjnaha ŭvachodžańnia ŭ SHA Rasija nie budzie vyłučać novyja patrabavańni ŭ kantekście dvuchbakovych i šmatbakovych pieramoŭ pa dałučeńni Biełarusi da SHA. Pry hetym baki zabiaśpiečać «adpaviednuju svoječasovuju kaardynacyju pazicyj i ŭstaranieńnie roznahałośsiaŭ na asnovie miechanizmaŭ i z ulikam intaresaŭ stvoranych ź ich udziełam intehracyjnych abjadnańniaŭ».

Baki paćvierdzili «prefierencyjny charaktar dvuchbakovych handlova-ekanamičnych adnosinaŭ», adznačyŭšy pryjarytetnaść zabieśpiačeńnia spryjalnych umoŭ supracoŭnictva ŭ ramkach sumiesnych intehracyjnych abjadnańniaŭ.

Baki «zychodziać ź niedapuščalnaści paharšeńnia ŭmoŭ uzajemnaha handlu tavarami i pasłuhami ŭ suviazi z dałučeńniem da SHA» i buduć «pastupova ŭzajemadziejničać z členami SHA z metaj zabieśpiačeńnia aŭtamatyčnaha zamacavańnia taryfnych abaviazacielstvaŭ biełaruskaha boku pierad SHA na ŭzroŭni adpaviednych harmanizavanych rasijska-kazachstanskich paramietraŭ».

• 0
• 0
• 0
• 0
• 0
• 0
• 0
• 0