Novuju elektracentral u Breście zbudujuć italjancy

Za niekalki dzion da Novaha hoda było padpisanaje dadatkovaje pahadnieńnie pamiž Bresckim abłvykankamam i pryvatnaj italjanskaj kampanijaj — ZAAT «Biełenierha».

Novaja elektrastancyja budzie składacca ź dźviuch turbin, enierhietyčnaja mahutnaść jakich składzie 400 MVt. Hetaha dastatkova, kab zabiaśpiečyć elektraenierhijaj nie tolki Brest, ale i častku terytoryi vobłaści. Kala 70% elektraenierhii płanujecca ekspartavać u jeŭrapiejskija krainy. Akramia taho, novaja CEC, u adpaviednaści z prajektam, zdolnaja vypracoŭvać da 150 miehavat-hadzin ciepłavoj enierhii.

U svoj čas aktyŭna viałasia prapracoŭka inšaha varyjantu — budaŭnictva ŭ Breście CEC, dzie ŭ jakaści enierhanośbita vykarystoŭvaŭsia b polski vuhal. Prajekt nieadnaznačny pa mnohich paramietrach, u tym liku ekałahičnym składniku, byŭ uklučany ŭ pieralik respublikanskich mierapryjemstvaŭ pa budaŭnictvie abjektaŭ enierhietyki. Ale zatym akcenty zrušylisia ŭ bok prajekta, prapanavanaha italjancami.

Adzin z arhumientaŭ na jaho karyść: novaja elektrastancyja daść mahčymaść vyrašyć prablemu zabiaśpiečańnia horada ciapłom i pry hetym značna zekanomić srodki, jakija mierkavałasia patracić na ramont dziejnych hienieryravalnych krynic — VRK-1 i VRK-2.

Akramia taho, enierhietyčnaja ŭstanoŭka, jakaja pracuje na hazie, nie nanosić škody ekałohii. U 2008 hodzie abłvykankam padpisaŭ pratakoł ab namierach, a ŭ śniežni 2010 hoda — inviestycyjnuju damovu z ZTAA «Biełenierha» ź italjanskim kapitałam.

Hetaje pačynańnie maje pryncypovaje značeńnie nie tolki dla Bresta. Upieršyniu kiraŭnikom dziaržavy ŭchvalenaja prysutnaść doli pryvatnaj ułasnaści ŭ enierhasistemie krainy. Niahledziačy na heta, išoŭ doŭhi i dosyć niaprostaj pieramoŭny praces z udziełam Ministerstva enierhietyki. Pieršapačatkovy prajekt, prapanavany italjanskim bokam, źviedaŭ istotnyja źmieny. Ceły hod doŭžyłasia ŭzhadnieńnie pazicyj pamiž zacikaŭlenymi bakami: Bresckim abłvykankamam, Minenierhietyki i italjanskimi inviestarami. Narešcie padpisanaje na dniach dadatkovaje pahadnieńnie rasstaviła kropki nad i, i źjaviłasia mahčymaść prystupić da realizacyi prajekta.

Jak adznačyŭ namieśnik staršyni abłvykankama Mikałaj Kryviecki, paśpiachovaja realizacyja hetaha prajekta adnović status-kvo Bresckaj vobłaści jak samaha sučasnaha i mahutnaha enierhietyčnaha kompleksu ŭ Respublicy Biełaruś (da ŭvodu atamnaj elektrastancyi). Sumarnaja mahutnaść hienieravalnych krynic (Biarozaŭskaj DRES, novaj CEC, jakaja budujecca ŭ Biełaaziorsku kitajskimi śpiecyjalistami, i novaj Bresckaj CEC — PDU) składzie kala 2 tysiač MVt i budzie supastaŭnaja z mahutnaściu AES, jakaja budujecca ŭ Astraŭcy (2,4 MVt).

Hienieralny katraktar — italjanskaja kampanija AnsaldoEnergia, jakaja zajmajecca vytvorčaściu turbin i enierhaabstalavańnia, pryciahvaje dla budaŭnictva Bresckaj CEC najnoŭšyja jeŭrapiejskija technałohii. Na vytvorčaść adnoj kiłavat-hadziny elektraenierhii novaja elektrastancyja budzie zatračvać 230 hramaŭ umoŭnaha paliva, što dazvolić na 30% skaracić jaho vydatki ŭ paraŭnańni ź dziejnymi hienieryravalnymi krynicami ŭ Biełarusi. AnsaldoEnergia harantuje budaŭnictva abjekta pad kluč i nadziejnuju pracu na praciahu 40 hadoŭ.

Važnym aśpiektam realizacyi prajekta było dasiahnieńnie damoŭlenaści z rasijskim «Hazpramam» pa ŭmovach pastaŭki i canie na haz. Klučavuju rolu ŭ niaprostym pierahavornym pracesie adyhraŭ adzin z najbujniejšych jeŭrapiejskich bankaŭ — «Bank Inteza» (praz svajo pradstaŭnictva ŭ Rasii — «Bank Inteza ZAT Maskva»).

Ciapier praca nad prajektam viadziecca ŭ Italii, dzie ŭ jaje ŭciahnutaja vialikaja kolkaść śpiecyjalistaŭ, i ŭ Breście.

U enierhietyčny prajekt italjanski bok płanuje inviestavać, pavodle papiarednich dadzienych, kala 415 młn jeŭra (ź jakich 50 młn jeŭra — u spadarožnuju infrastrukturu).

Kali ŭsio pojdzie, jak zadumana, i prajekt adbudziecca, heta stanie surjoznym arhumientam «za» dla inšych bujnych inviestaraŭ. A značyć, daść impuls dla rostu naŭprostych zamiežnych inviestycyj u Respubliku Biełaruś.

• 0
• 0
• 0
• 0
• 0
• 0
• 0
• 0