Minharvykankam nie dazvoliŭ pravieści pikiet za zachavańnie parku 40-hodździa Kastryčnika

Pra heta paviedamiła aktyvistka ekałahičnaha tavarystva «Zialonaja sietka» Maryna Dubina.

Pavodle jaje słoŭ, zajaŭka na pikiet była padadziena 2 studzienia. U adkazie, datavanym 26 studzienia, havorycca: «U suviazi z tym, što padadzienaja vami zajava ab praviadzieńni pikietavańnia nie adpaviadaje patrabavańniam častki 5 i častki 6 artykuła 5 zakona Respubliki Biełaruś „Ab masavych mierapryjemstvach“, Minharvykankam nie dazvalaje praviadzieńnie pikietavańnia».

Jak rastłumačyła Dubina, u častcy 5 artykuła 5 zakona «Ab masavych mierapryjemstvach», na jakuju spasyłajucca staličnyja ŭłady, pieraličany źviestki, jakija pavinny być ukazany ŭ zajavie. «Akramia daty, času, miesca, kolkaści ŭdzielnikaŭ, ad arhanizataraŭ patrabujecca nazvać krynicu finansavańnia, a taksama miery pa zabieśpiačeńni hramadskaha paradku i miery, źviazanyja ź miedycynskim absłuhoŭvańniem i prybirańniem terytoryi paśla praviadzieńnia na joj masavaha mierapryjemstva. Hetych źviestak u zajavie nie było. Zaraz rychtujecca paŭtornaja zajaŭka na pikiet z vykanańniem usich farmalnaściaŭ», — skazała Dubina.

Akramia taho, adznačyła jana, rychtujecca paŭtorny list u Administracyju prezidenta pa pytańni vysiečki parku.

Jak paviedamlałasia raniej, u parku 40-hodździa Kastryčnickaj revalucyi płanujecca pabudavać hatelny kompleks «Piekin». Prajekt praduhledžvaje źniščeńnie bolš jak 300 dreŭ i zabudovu prykładna 70% terytoryi parku. Vysiečka pačałasia 26 śniežnia, źniščana ŭžo prykładna dva dziasiatki dreŭ.

Miascovyja žychary i ekołahi pratestujuć suprać źniščeńnia parku. Žychary prapanujuć uładam i inviestaram pieranieści kompleks «Piekin» na terytoryju raźmieščanaha pobač niedabudavanaha zavoda imia Kirava, a park zachavać. Abaroncy parku ŭžo źviartalisia z hetym pytańniem u Administracyju prezidenta, asabista da staršyni Minharvykankama Mikałaja Ładućki, u Kamitet dziaržaŭnaha kantrolu, administracyju Leninskaha rajona, Dziaržaŭnuju inśpiekcyju achovy žyviolnaha i raślinnaha śvietu, Biełaruskaje tavarystva Čyrvonaha Kryža, da deputata Pałaty pradstaŭnikoŭ Nacyjanalnaha schodu Valanciny Lavonienki. Bolš za 400 čałaviek padpisalisia pad adpaviednym zvarotam na imia Alaksandra Łukašenki.

• 0
• 0
• 0
• 0
• 0
• 0