Marat Abramoŭski pačynaŭ razam ź Viačasłavam Dzijanavym, ale skancentravaŭsia na zabaŭlalnych fłeš-mobach.
«Nidzie bolš, jak u našaj krainie, niama stolki niezaniatych «rynkavych nišaŭ» dla dziejnaści», — ličyć stvaralnik moładzievaj supołki «Avanhard» Marat Abramoŭski.
U bolšaści moładzi «Avanhard» asacyjujecca z fłeš-mobami. Chto nie ŭ temie: ujavicie, što častka ludziej u niejkim miescy raptam pačynaje vykonvać adnolkavyja dziejańni. Naprykład, abdymacca, kidacca śniežkami ci puskać niabiesnyja lichtaryki. Dyk voś heta i jość fłeš-mob.
Značnym etapam raźvićcia «Avanharda» staŭ fłeš-mob «Mokryja vojny» la Opiernaha teatra, jaki adbyŭsia minułym letam na 3 Lipienia.Bolš za 1000 udzielnikaŭ akcyi viesieła ablivali vadoj adzin adnaho. A voś jaje arhanizatara vyklikali na dopyt. Kali Abramoŭskamu skazali «raźviazvać šnurki» i adpravili ŭ trochdzionny «tur» na Akreścina, jon zrazumieŭ: treba lehalizavacca. Zakon pra masavyja mierapryjemstvy nichto nie admianiaŭ. Jak kažuć, choć i «dura», ale «lex».
Nastupnyja fłeš-moby pravodzilisia z dazvołu haradskich uładaŭ.
Pieršaj lehalnaj akcyjaj stali fry-chahs («biaspłatnyja abdymanki»).«Dabro» na jaje praviadzieńnie atrymali ź piataha razu (što značyć nastojlivaść!). Zatym — tancavalny fłeš-mob u handlovym-centry «Stalica» i masavaje puskańnie niabiesnych lichtarykaŭ na płoščy Banhałor u znak baraćby sa ŚNIDam.
Asnoŭnaja meta «Avanharda» — adukacyjnaja.Udzielniki «Anhlijskaha kłuba» vyvučajuć movu, vykarystoŭvajučy elemienty hulni. A zadača niadaŭna stvoranaha «Knižnaha kłuba» — vychoŭvać intelihientaŭ. «Avanhard» skiravany na tych, chto maje ŭłasnyja idei i žadaje ich ažyćciavić.
Ciapier idzie prajekt pa «ŭpryhožvanii» haradskich śmietnic. «Minsk ličycca čystym horadam i adnačasova šerym. Hulajučy sa słovami «čyścinia» i «šery», źjaviłasia ideja razmaŭloŭvać śmietnicy. Naprykład, u vyhladzie cmoka», — kaža Abramoŭski.
«Naša Niva»: Adkul u «Avanharda» hrošy na realizacyju prajektaŭ?
Marat Abramoŭski: Ja sam spansaruju «Avanhard». A krynica maich prybytkaŭ — siamiejny biznes (vałodajem nievialikaj kandytarskaj). Z sakavika my ŭvodzim simvaličnyja siabroŭskija zbory — 10 tysiač rubloŭ. Nu i šukajem alternatyŭnyja krynicy dachodaŭ.
«NN»: Ci padtrymlivaješ suviaź z byłymi paplečnikami z «Ruchu budučyni»?
MA: «Avanhard» vyjšaŭ z «Ruchu budučyni» ŭ 2010. Dzijanava ciahnuła na palityku. Majo bačańnie było inšym. Ciapier časam pierapisvajemsia, ale my razyšlisia.
«NN»: Z BRSMam nie supracoŭničajecie?
MA: «Avanhard» — heta alternatyva BRSM, i moładź usprymaje heta pazityŭna. Metavaja hrupa ŭ nas adnolkavaja. My nie ŭłazim u palityku, i ŭ nas dastatkova paśpiachovyja realizavanyja prajekty. BRSM taksama moh by arhanizavać tancavalny fłeš-mob, ale hetaha nie zrabiŭ.
«NN»: To bok leźci ŭ palityku ty nie chočaš?
MA: Jašče ŭ dziacinstvie ja chacieŭ stać prezidentam. Heta maja žyćciovaja meta, ale nie na siońniašni dzień. Moža, hod praz 10—15. Takuju pasadu treba zasłužyć. Nie dastatkova vyjści pakryčać na płošču, treba rabić realnyja spravy. Dla mianie «Avanhard» — heta zarabić «punkty» na pierśpiektyvu. Ja pakazvaju, što ja mahu. My adychodzim ad čysta zabaŭlalnaj dziejnaści, pieraklučajemsia na sacyjałku.
«NN»: Nakolki realna dasiahnuć pośpiechu ŭ biełaruskich realijach?
MA: Jakraz u Biełarusi stać «kimści» našmat praściej. Mnie dziŭna, čamu bolšaść maładych ludziej choča źjechać. Kaniečnie, umovy nie samyja spryjalnyja. Ale i niezaniatych nišaŭ pabolej. Biary — nie chaču.
Kamientary