Siryjski ŭrad pieražyvaje skandał z pryčyny jašče adnoj uciečki.
Katarski telekanał Al Jazeera atrymaŭ ad uciekača za miažu, vysokapastaŭlenaha analityka, kanfidencyjnyja dakumienty, jakija raskazvajuć ab stratehii padaŭleńnia paŭstańnia suprać režymu prezidenta Bašara Asada. Raniej chakiery ŭzłamali asabistuju poštu Asada i jaho blizkich, pakazaŭšy, što kiraŭnik dziaržavy naśmichajecca z prapanavanych im samim demakratyčnych reformaŭ.
Krynicaj uciečki staŭ były vysokapastaŭleny funkcyjanier kiroŭnaj u Siryi partyi BAAS Abdel Madžyd Barakat, jaki ŭ minułym miesiacy ŭciok z krainy ŭ Turcyju. Da ŭciokaŭ u jaho abaviazki ŭvachodziŭ zbor i analiz infarmacyi, jakaja pastupała z roznych raźviedvalnych słužbaŭ ab chodzie paŭstańnia suprać asadaŭskaha režymu. Barakat, jaki byŭ stałym udzielnikam sakretnych sustreč uradavaj antykryzisnaj hrupy, niekalki miesiacaŭ dapamahaŭ siryjskaj apazicyi, ale «ŭrešcie trapiŭ pad padazreńnie i zrazumieŭ, što pavinien vybracca ź Siryi, kab vyratavać ŭłasnaje žyćcio», paviedamlaje Al Jazeera.
Abjom sakretnych dakumientaŭ, jakija trapili ŭ rasparadžeńnie Al Jazeera, składaje niekalki sotniaŭ staronak.
Za ich aŭtentyčnaść katarski telekanał, jaki staŭ adnym z ruparaŭ antyasadaŭskaj apazicyi, ručajecca: dźvie niezaležnyja kamandy ekśpiertaŭ praviarali ich sapraŭdnaść niekalki dzion. Dakumienty, sabranyja Barakatam padčas sustreč pradstaŭnikoŭ raźviedstruktur, jakija prachodzili štodnia ŭ 19.00 pavodle damaskskaha času, pakazvajuć, što «ŭrad adčajna sprabuje zachavać kantrol nad Damaskam», addajučy adnaznačnyja zahady nie dapuścić praniknieńnia praciŭnikaŭ Asada ŭ stalicu. Vykanańniu hetaj zadačy słužać jak viernyja ŭradu vojski, tak i śpiecyjalnyja atrady praŭradavych družyńnikaŭ, viadomyja jak «šabicha» (duchi), što čaściakom uklučajuć partyjnych aktyvistaŭ BAAS. Častka hetych atradaŭ achoŭvaje ŭsie 35 ujezdaŭ u horad, hatovaja ŭ vypadku abvastreńnia situacyi adrezać Damask ad vonkavaha śvietu. U horadzie niasuć słužbu pradstaŭniki ŭžo rehularnaha siłavoha aparatu, u tym liku ŭpraŭleńnia raźviedki VPS krainy, viadomaha jak samaje žorstkaje ŭradavaje padraździaleńnie. Siłaviki trymajuć pastajanny kantrol za kožnaj bujnoj płoščaj stalicy.
U malitoŭny dzień, piatnicu, kali pa haradach Blizkaha Uschodu ŭžo tradycyjna prakatvajucca masavyja demanstracyi, prysutnaść siłavikoŭ na vulicach horada robicca jašče bolšaj.
Siarod dakumientaŭ jość i asabista padpisany Asadam dekret ab uzmacnieńni žorstkaści palityki ŭ dačynieńni da demanstrantaŭ,jakim udzieł u akcyjach pratestu moža abyścisia ŭ turemnaje źniavoleńnie na termin ad miesiaca da hoda.
Inšaja častka fajłaŭ datyčyć apieracyj pa padaŭleńni buntu ŭ bujnych siryjskich haradach Alepa i Idlib. U pryvatnaści, u ich apisvajecca, jakim čynam pavinnaja akazvacca finansavaja i maralnaja padtrymka łajalnych Asadu hrup nasielnictva ŭ Alepa: dla zaspakajeńnia horada byli addadzienyja rasparadžeńni zmahacca z manapolnymi handlarami i pryniać miery dla supakajeńnia studentaŭ miascovaha ŭniviersiteta. Źmiest inšaha fajła pakazvaje, jak pravodziłasia sačeńnie za členami Naziralnickaj misii Lihi arabskich dziaržavaŭ, jakija prybyli ŭ Siryju ŭ kancy minułaha hoda. U jašče adnym fajle, apublikavanym Al Jazeera, pradstaŭniki siryjskaha ŭrada skardziacca na toje, što spartyŭnyja kłuby i relihijnyja hurtki mała robiać, kab prapahandavać viersiju mižnarodnaj zmovy ŭ dačynieńni da Siryi, vynikam jakoha i stali chvalavańnia.
«Kožny, chto pračytaje hetyja dakłady, budzie šakavany, jon zrazumieje, što Siryja pieražyvaje sapraŭdny kryzis — zabojstva, kryminał, padaŭleńnie pratestaŭ, — zajaviŭ Barakat telekanału. — Adnak načalniki słužbaŭ biaśpieki malujuć u svaich dakładach idyličnuju karcinu: jany ihnarujuć mnohija značnyja fakty prosta dla taho, kab padtrymać prezidencki duch». Usie dakumienty paśla źvierki i analizu pieradavalisia na ranicu nastupnaha dnia Asadu, śćviardžaje pierabiežčyk, usie asnoŭnyja rasparadžeńni adnosna mier biaśpieki i śpiecapieracyj addavaŭ ŭžo asabista prezident.
Aficyjny Damask na raspaŭsiudžanuju Al Jazeera infarmacyju nie adreahavaŭ.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA5
Kamientary