Pieramovy ab prahramie avijapalotaŭ pamiž Biełaruśsiu i Rasijaj praciahvajucca

30 sakav

ika ŭ Maskvie praciahvajucca pieramovy ab prahramie avijapalotaŭ pamiž Biełaruśsiu i Rasijaj, paviedamiŭ BiełaPAN namieśnik hienieralnaha dyrektara nacyjanalnaj avijakampanii «Biełavija» Ihar Čarhiniec.

Pieramovy avijacyjnych uład Rasii i Biełarusi pačalisia 29 sakavika. Rasijskuju delehacyju ŭznačalvaŭ namieśnik ministra transpartu RF Valeryj Akułaŭ, biełaruskuju — dyrektar departamienta pa avijacyi Ministerstva transpartu i kamunikacyj Vadzim Mielnik.

Viečaram u čaćvier Mintrans RF raspaŭsiudziŭ paviedamleńnie ab tym, što biełaruski i rasijski baki na pieramovach paćvierdzili dziejnuju prahramu avijapalotaŭ pamiž krainami da 10 maja.

Adnak, jak śćviardžaje Ihar Čarhiniec, havaryć pra dasiahnutyja damoŭlenaści zaŭčasna, lubyja kamientary mohuć źjaŭlacca tolki paśla padviadzieńnia vynikaŭ pieramoŭ.

«Na jakoj padstavie Mintrans RF apublikavaŭ takuju navinu — nieviadoma», — zajaviŭ namieśnik hiendyrektara «Biełavija». Padobnyja paviedamleńni mohuć raspaŭsiudžvacca tolki paśla padpisańnia dakumienta pa vynikach pieramoŭ. «Inakš heta možna rascanić jak nacisk na adzin z bakoŭ padčas pieramoŭ», — padkreśliŭ Čarhiniec.

Jak paviedamiŭ napiaredadni Mintrans RF, rasijski bok na pieramovach prapanavaŭ vyklučyć z dvuchbakovych damoŭlenaściaŭ abmiežavańni pa kolkaści pryznačanych avijapradpryjemstvaŭ, pa častacie vykanańnia palotaŭ na avijalinijach i pa pravaznych jomistaściach.

Rasijskaja delehacyja taksama prapanavała ŭnieści ŭ dadatak da pahadnieńnia ab pavietranych znosinach źmianieńni ab źniaćci abmiežavańniaŭ pa vybary punktaŭ na terytoryi Rasii dla ekspłuatacyi biełaruskimi pryznačanymi avijakampanijami.

Nahadajem, ranicaj 26 sakavika avijaznosiny pamiž Minskam i Maskvoj byli spynienyja na čatyry hadziny. Fiederalnaje ahienctva pavietranaha transpartu (Rasavijacyja) adklikała dazvoł na vykanańnie kampanijaj «Biełavija» rejsaŭ ź Minska i Maskvy.

Na ekstrannaj pres-kanfierencyi Ihar Čarhiniec paviedamiŭ: prablema ŭźnikła ŭ suviazi z žadańniem rasijskaha boku parušyć parytet i vykonvać piać rejsaŭ na dzień zamiest čatyroch. Adnak, adznačyŭ jon, jość pahadnieńnie pamiž uradami Biełarusi i Rasii ad 1997 hoda, jakoje praduhledžvaje kamiercyjny parytet u avijaznosinach pamiž Minskam i Maskvoj. Na pytańnie, čamu «Biełavija» nie moža taksama arhanizavać piać rejsaŭ u dzień, jak choča taho rasijski bok, Čarhiniec rastłumačyŭ, što hety napramak ciapier «kamiercyjna nieefiektyŭny». Siaredniaja zahružanaść rejsaŭ, pavodle jaho słoŭ, składaje 55%, što viadzie da strat avijakampanii, a dalejšaje pavieličeńnie kolkaści rejsaŭ jašče bolš źnizić ich efiektyŭnaść.

U svaju čarhu Mintrans RF ličyć, što dziejnaje pamiž Rasijaj i Biełaruśsiu pahadnieńnie ab pavietranych znosinach nie adpaviadaje pahadnieńniu ab ahulnaekanamičnaj prastory i normam Mytnaha sajuza, zajaviŭ 27 sakavika namieśnik ministra Valeryj Akułaŭ.

U adkaz na heta hiendyrektar «Biełavija» Anatol Husaraŭ zajaviŭ: biełaruski bok ličyć nieprymalnymi ŭmovy, jakija dyktujucca Rasijaj. «Ličym, što niečakanaje adklikańnie Rasavijacyjaj raniej vydadzienaha dazvołu, jaki pryvioŭ da spynieńnia rehularnych pavietranych znosin pamiž dźviuma stalicami, byŭ spravakavany AAT „Aerafłot“ z metaj atrymańnia pieravahi na biełaruskim rynku avijapieravozak, — padkreśliŭ jon. — My hatovyja da kankurencyi, i heta paćviardžaje prysutnaść na biełaruskim avijarynku značnaj kolkaści mižnarodnych avijakampanij. Adnak umovy, jakija dyktujucca nam rasijskim bokam, nieprymalnyja, bo ŭ pieršuju čarhu farmirujuć na rynku niezdarovuju kankurencyju, jakaja vyciaśniaje inšych udzielnikaŭ rynku i ŭ kančatkovym vyniku adabjecca na intaresach pasažyraŭ».

• 0
• 0
• 0
• 0
• 0
• 0
• 0
• 0