Indulhiencyja na hłupstva

I čamu b, naprykład, nie padzialić sport i ekanomiku? Mahčyma, reč u tym, što sport, asabliva ŭ Biełarusi, staŭ prytułkam dla mnohich eskapistaŭ — ludziej, jakija sprabujuć choć niejak schavacca ad zadušlivaj realnaści. Tamu lubaja sproba parušyć ich spakoj (naprykład, pytańniem Domračavaj pra bieł-čyrvona-bieły ściah) vyklikaje samuju žorstkuju reakcyju.

Na pres-kanfierencyi pa vynikach siezona Darji Domračavaj zadali pytańnie pra bieł-čyrvona-bieły ściah.

U Biełarusi zadavać spartsmienu pytańnie navat z dalokim namiokam na palityku — mavieton.

Padzialić palityku i sport siońnia niemahčyma navat čysta paniatkava. Tamu što kłuby viaduć «tranśfiernuju palityku». A taksama cenavuju, markietynhavuju i h.d.

Čuć razmovy pra toje, što «sport — pa-za palitykaj», asabliva paciešna ŭ našaj krainie. Ź biłbordaŭ spartsmieny ahitujuć za kvitniejučuju Biełaruś. A jak tolki skančajucca hrošy, jany biahuć da dziaržavy. U sielsaviety, vykankamy, ministerstvy i h.d. Prasić i vyprošvać. Hałoŭnaja vartaść biełaruskaha spartyŭnaha funkcyjaniera — umieć raskazać čynoŭnikam, jaki ich kłub/vid sportu cudoŭny. I čamu mienavita ŭ hety kłub/vid sportu varta ŭkinuć (spuścić na jaho) niekalki socień tysiač ci miljonaŭ dalaraŭ. Da čynoŭnikaŭ my pryraŭnoŭvajem i kiraŭnikoŭ dziaržpradpryjemstvaŭ, jakija źjaŭlajucca asnoŭnymi donarami kamand. Tamu kali ŭ Biełarusi sport budzie pa-za palitykaj, jon apyniecca i pa-za ekanomikaj.

Spartsmieny vydatna razumiejuć, chto ich kormić. I imknucca trymać rot na zamku pa hetaj temie. Kali «za» jašče čas ad času čujecca, to «suprać» — nikoli.

Palityčny składnik vyklikaje chvaravituju reakcyju nie tolki ŭ spartsmienaŭ, ale i ŭ amataraŭ sportu. Niekatoryja ź ich, zdajecca, nie suprać adabrać u kumiraŭ prava być hramadzianami. Mabyć, ličać, što tyja nie pavinny mieć dumki pa palityčnych pytańniach, ekanamičnych, sacyjalnych. Byccam spartsmieny žyvuć nie ŭ adnoj z nami krainie i nie zaležać ad tych ža pracesaŭ, što i my. Moža, pazbavić ich k čortu vybarčaha prava? Choć reakcyja na devalvacyju pakazała, što spartsmieny vydatna razumiejuć našy prablemy.

Šmatlikimi prychilnikami chakieistam, futbalistam i inšym niby vydajecca indulhiencyja na hłupstva i abyjakavaść. Vy hulajcie, zabivajcie, a ŭsio astatniaje ŭsio roŭna.

Časam spartsmienam taki stereatyp vyhadny, kab uniknuć adkazu (vyhladaje heta prykładna tak: «A čo, hy-hy, ja nie dumaju pra heta. Maja sprava — vychodzić na placoŭku i zmahacca»). Ale starańniej za inšych za hety vobraz trymajucca tyja, chto baicca žyćcia, chto sprabuje schavacca ŭ sporcie ad taho, što adbyvajecca vakoł ich, u krainie. Ad palityki — u tym liku. Ci navat pierš za ŭsio. Bo ŭ sporcie ŭsio tak prosta, usio tak zrazumieła (kali, viadoma, nie ŭličvać praviły omniuma). Chto akazaŭsia najlepšym, toj i maje racyju. Nie treba dumać, chto manić, a chto kaža praŭdu. Tut niama apazicyi, sielektarnych narad, pabitaha škła Doma ŭrada, pravakataraŭ, padtasovak, «nahinańniaŭ», sudovych pracesaŭ i inšaha.

Spartyŭnyja eskapisty bajacca, što spartsmieny zahavorać nie tolki pra ački i siekundy. I tady ŭ ich ujaŭnuju chatku ŭvarviecca žyćcio ŭ roznych svaich prajavach.

Źmiešvańnie palityki i sportu — nie biełaruskaje noŭ-chaŭ. Va ŭmieranym spałučeńni takaja sumieś moža być vielmi navat ničoha. Jaramir Jahr u pamiać pra padziei Pražskaj viasny vybiraje 68-y hulniavy numar. Chiba heta nie palityka i chiba ŭ hetym jość niešta drennaje? I ci nie tamu Jahr — hieroj nacyi? A ŭspomnicie, jakim było supraćstajańnie chakiejnych zbornych SSSR i Čechasłavakii. Ci lehiendarnyja sieryi SSSR — Kanada. Biez palityčnaha składnika hetyja hulni naŭrad ci pakinuli b taki śled u historyi. Sustreča zbornych ZŠA i Iraka na futbolnym mundyjali mała kaho moža zacikavić. Ale z ulikam niekatorych abstavinaŭ atrymlivajecca jašče taja intryha. A jak zabaŭna nazirać za ŭsim, što spadarožničaje pajadynkam rasijskich i ŭkrainskich futbalistaŭ. Takich prykładaŭ možna pryvieści dziasiatki.

Moža, nie varta nam i spartsmienam tak užo bajacca palityki?

• 0
• 0
• 0
• 0
• 0
• 0
• 0
• 0