Kamu naležać praduktovyja kramy?

U śfiery roźničnaha prodažu ci, jak ciapier modna kazać, retejłu, idzie pracavać usio bolš biełarusaŭ. Tyja, chto, nie majučy adukacyi, raniej išoŭ u kanduktary ci pradaŭcy łatarejnych biletaŭ, usio čaściej abirajuć pracu ŭ supiermarkietach. Niekalki miesiacaŭ navučańnia — i jany kasiry ci pradaŭcy z zarobkam ad 2,5-3 miljony rubloŭ. I vakansii ŭsio adno zastajucca!

Jeŭrapiejskija karparacyi pakul jašče nie dajšli da Biełarusi. Praŭda, francuzskaja Carrefour i litoŭskaja Maxima ŭžo zajavili pra svaje płany. Ale kankurencyi chapaje i bieź ich. Retejłavyja sietki biełaruskich biznesoŭcaŭ bjucca za spažyŭca — hadavy zvarot hihantaŭ pieravyšaje $200—300 miljonaŭ. Chto ź ich dasiahnuŭ najbolšych pośpiechaŭ?

Najbujniejšaj sietkaj kramaŭ krainy možna ličyć Biełkaapsajuz — bolš za 10 tysiač abjektaŭ, bolšaść ź jakich raskidanaja ŭ vioskach.

Biznes z emihracyi

Što da čystych pryvatnikaŭ, to bolš za ŭsio kramaŭ maje «Jeŭraopt» (TAA «Jeŭrahandal»). U navinnyja stužki hetaja sietka trapiła na minułym tydni, kali jaje ŭłaśniki vykupili staličny ŭniviersam «Narač». Ciapier jon budzie pracavać pad žoŭta-siniaj šyldaj «Jeŭraopta», jak i 78 inšych kramaŭ pa ŭsioj Biełarusi. 19 ź ich adkrytyja ŭ stalicy.

Pradukty ŭ ich tańniejšyja, čym u kankurentaŭ, praŭda, časam koštam kamfortu klijentaŭ.

Rynkavyja dasiahnieńni «Jeŭraopta» pastajanna vykarystoŭvajuć dziaržaŭnyja prapahandysty. Pra pakazalnaje źmianšeńnie cenaŭ u pryvatnych kramach paviedamlaje navat BiełTA. A dyrektar kampanii Andrej Zubkoŭ zajaŭlaŭ, što minimalny zarobak kasiraŭ składaje 3,5 miljona rubloŭ, ale moža dasiahać navat 8 miljonaŭ. U kampanii pracuje ŭžo bolš za 8000 supracoŭnikaŭ, i ich kolkaść budzie raści — u płanach adkryćcio jak minimum 50 kramaŭ va ŭsioj krainie.

«Jeŭrahandal» kantralujuć biznesoŭcy Siarhiej Litvin i Uładzimir Vasilka. Ich prykład — adno sa śviedčańniaŭ taho, što lubić radzimu lepš z adlehłaści.

Paleskaja sietka

Druhaja pa vieličyni sietka krainy — «Rodnaja staronka» (AAT «NTS»). Va ŭsioj krainie naličvajecca 50 kramaŭ. Praŭda, hetaje ž akcyjaniernaje tavarystva kiruje jašče i sietkaj «Košyk» (17 kramaŭ), a taksama 14 «bieznazoŭnymi» kramami ŭ Baranavičach. Letaś retejł prynios kampanii bolš za $200 miljonaŭ.

Ułaśniki kramaŭ — biełarus Ihar Čarniaŭski i ŭkrainiec Mikałaj Łahun. Pieršy pačynaŭ impartam kansiervaŭ i ałkaholu. A voś ułasnaść apošniaha aceńvajecca sumaj $100 miljonaŭ. Jon vałodaje 99,9% «Delta-Banka» i strachavoj kampanijaj.

«Centr» sietki znachodzicca ŭ Homieli, ale, aproč taho, «NTS» — hałoŭny hulec na retejlevym rynku Mazyra, Babrujska i Bresta. Darečy, jak i kiraŭnictva «Jeŭraopta», Čarniaŭski i Łahun skuplajuć minskija ŭniviersamy — «Paŭnočny» i «Hrodna».

Ź mižnarodnaj dapamohaj

Sietka «Rubloŭski» skancentravanaja ŭ Minsku. Tut znachodzicca 34 z 38 kramaŭ z takoj nazvaj. Vypusknik maskoŭskaj škoły KDB Siarhiej Tkačuk i jaho kampańjon Alaksiej Łojka ŭznačalvajuć chołdynh RTL-Holding, kudy, aproč «Rubloŭskich», uvachodzić nievialikaja sietka kramaŭ, niekalki łahistyčnych kampanij i imparciory charčavańnia. Pavodle infarmacyi «Ježiednievnika», Tkačuk taksama vałodaje akcyjami minskich univiersamaŭ «Centralny» i «Pieršamajski». Niekalki hadoŭ tamu da raźvićcia sietki spryčyniłasia Mižnarodnaja finansavaja karparacyja, jakaja vydała biznesoŭcam kredyt bolš čym na $20 miljonaŭ.

Taja ž arhanizacyja dapamahła $16 miljonami i «Alfa-Hrupie», kali taja zasnoŭvała sietku «BiełMarkiet». Rasijskaja karparacyja na čale z aliharcham Michaiłam Frydmanam maje šmatmiljardny zvarot svaich padraździaleńniaŭ — ad naftahazavaj TNK da handlovych sietak «Piacioračka», mabilnych apierataraŭ i bankaŭ. 13 z 29 biełaruskich kramaŭ «Biełmarkieta» znachodziacca ŭ Mahilovie.

Rybnyja fłahmany

Svaje praduktovyja sietki majuć i try rybnyja miljaniery: ułaśnik «Vitalura» Alaksandr Jacuk, hienieralny dyrektar «Biełvilesdena» (kramy «Hipa») Aleh Baranoŭski i ich brescki kankurent Alaksandr Mašenski, uładalnik «Santa-Bremara» i «Savuškavaha pradukta». Pra apošniaha ź ich «Naša Niva» padrabiazna pisała ŭ №8 za 29 lutaha 2012 hoda, nahadajem tolki pra jahonyja niekalki dziasiatkaŭ kramaŭ, bolšaść ź jakich znacho-dziacca ŭ Breście.

Aleh Baranoŭski źjaŭlajecca dyrektaram anhlijskaj kampanii «Biełvilesden». Raniej jana była adnym z najbujniejšych imparcioraŭ ryby, adnak ciapier jaje asnoŭny profil — kramy. U skład sietki ŭvachodziać piać hipiermarkietaŭ «Hipa» (try ź ich u Minsku), a taksama čatyry supiermarkiety.

Vypusknik Instytuta fizkultury «vitaluraviec» Alaksandr Jacuk taksama maje status śpiecimparciora ryby i morapraduktaŭ, i, jak i Mašenski, realizuje pradukcyju praź sietku ŭłasnych kramaŭ. Ich u Minsku naličvajecca ŭžo 24, jašče try znachodziacca pa-za miežami stalicy. Biełaruskim spartyŭnym zaŭziataram Jacuk zapomniŭsia jak sponsar baskietbolnaj mužčynskaj kamandy «Vitalur», jakaja čatyry raz zapar vyjhravała čempijanat Biełarusi.

Pinčuk u Rasii

Spartyŭnuju maładość uzhadvaje i miljanier Alaksandr Michajłavič Zarybka. Jahonaje imia pa baćku ŭkazanaje niezdarma, bo mienavita jano, razam sa skaročanym imiem, dała nazvu jahonym 25 kramam «Ałmi». Aproč taho, jon vałodaje dźviuma kramami «Zakrama». Hipiermarkiet ź ich usich pakul što tolki adzin, jon znachodzicca ŭ Hrodnie. Nieŭzabavie pačniecca budaŭnictva vialikaj kramy ŭ Minsku, na miescy stajanki kala stancyi mietro «Kamiennaja Horka».

Zarybka naradziŭsia ŭ Pinsku, ale zrabiŭ biznes u Rasii. Jamu naležyć kala 33% akcyj hrupy kampanij «Viktoryja», jakaja kantraluje niekalki sotniaŭ kramaŭ va ŭsioj Rasii: «Kvartał», «Viktoryja», «Tanna», «Keš» i «Siamiejnaja skarbonka». Pinskaja maładość nahadała pra siabie, kali miljanier vyrašyŭ prafinansavać stvareńnie futbolnaj akademii ŭ svaim rodnym horadzie.

Apošni raz Zarybka traplaŭ u presu ŭ žniŭni 2011 hoda, paśla taho jak, znachodziačysia ŭ Maskoŭskaj vobłaści za styrnom «Miersedesa», pry pierastrajeńni začapiŭ matacykł. 24-hadovy matacyklist zahinuŭ na miescy…

Dziaržaŭnyja palityka vybudavanaja takim čynam, kab dapamahać supiermarkietam vyciaśniać rynki, pasłuhami jakich biełarusy karystalisia ŭ 1990-ja i 2000-ja. Układajučy ŭ raźvićcio svaich sietak, biznesoŭcy robiać pierśpiektyŭnyja inviestycyi. Z prychodam u krainu mižnarodnych karparacyj hetyja sietki mohuć być pradadzienyja zachodnikam za sotni miljonaŭ dalaraŭ.

• 0
• 0
• 0
• 0
• 0
• 0
• 0
• 0