Dziciačaje charčavańnie moža być niebiaśpiečnym

Niebiaśpiečnaja dla zdaroŭja dziciačaja kaša izrailskaj handlovaj marki Remedia ŭ vypadku jaje pastupleńnia ŭ handlovuju sietku Biełarusi budzie vymacca. U rastvaralnaj kašy vyjaŭlenyja chvarobatvornyja bakteryi.

Havorka idzie pra rysavyja kašy Remedia (biezmołočnyja, rastvaralnyja) dla charčavańnia dziaciej z 4-ch miesiacaŭ (vytvorca — Galam Pagingag Ricultural Cooperativ Esociety Ltd, Izrail), u jakoj vyjaŭleny bakteryi Enterobacter (Cronobacter) sakazakii.

Hetyja bakteryi źjaŭlajucca ŭzbudžalnikami charčovych taksikainfiekcyj u dziaciej rańniaha ŭzrostu. Kliničnyja prajavy charaktaryzujucca najaŭnaściu sieptyčnych infiekcyj (mieninhit, sepsis) i niekratyzujučaha enterakalita ŭ dziaciej pieršaha hoda žyćcia, u pieršuju čarhu niedanošanych, novanarodžanych ź nizkaj masaj cieła abo ź niedastatkovym imunitetam. Latalny zychod składaje 33%, a pa niekatorych dadzienych u dziaciej da 1 hoda — ad 40% da 80%.

«Uličvajučy, što pastaŭki nazvanaj pradukcyi ažyćciaŭlalisia rasijskaj arhanizacyjaj, majecca vialikaja vierahodnaść znachodžańnia pradukcyi ŭ abarocie i na terytoryi Biełarusi», — havorycca ŭ paviedamleńni Ministerstva handlu Biełarusi.

Minhandlu spasyłajecca na infarmacyju Fiederalnaj słužby pa nahladzie ŭ śfiery abarony pravoŭ spažyŭcoŭ i dabrabytu čałavieka Rasijskaj Fiederacyi (Rasspažyŭnahlad), a taksama Ministerstva achovy zdaroŭja Biełarusi i Biełaruskaha dziaržaŭnaha instytutu mietrałohii.

Pryncypovy momant: Rasspažyŭnahlad apublikavaŭ infarmacyju pra škodnuju kašu jašče 29 sakavika, a Minhandal Biełarusi — 27 krasavika.

Pry hetym na sajtach Ministerstva achovy zdaroŭja Biełarusi i Instytuta mietrałohii — ni słova ab niebiaśpiečnym izrailskim dziciačym charčavańni. I heta pry tym, što biełarusy za miesiac, jaki prajšoŭ z momantu atrymańnia infarmacyi ad Rasspažyŭnahladu, całkam mahli kali nie kupić rysavuju kašku ŭ Biełarusi, to pryvieźci jaje z Rasii abo inšych krain.

U ciapierašni čas u Minsku ŭzrovień zachvorvańnia kišečnymi infiekcyjami nižej siarednich šmathadovych značeńniaŭ, paviedamiła Naviny.by zahadčyca epidemijałahičnaha adździeła Minskaha haradskoha centra hihijeny i epidemijałohii Alena Fisienka.

Jana padkreśliła, što kali b našy dzieci jeli niebiaśpiečnuju kašu i zachvareli, heta było b adrazu vidać pa dadzienych statystyki. Prapuścić dyjareju ŭ maleńkaha dziciaci, vyklikanuju enterrbakteryjami, niemahčyma: u kale dziciaci bačnaja kroŭ. Heta ciažkaje zachvorvańnie, jakoje vyklikaje razbureńnie kišečnika.

Paśla ŭspyški epidemii ŭ Jeŭropie, vyklikanaj raspaŭsiudžvańniem enterahiemarahičnaj kišečnaj pałački minułym letam, bakteryjałahičny nahlad u Biełarusi ŭzmocnieny.

U respublikanskaj sansłužbie i Ministerstvie achovy zdaroŭja atrymać infarmacyju na hety kont nie ŭdałosia. Zastajecca tolki spadziavacca, što niebiaśpiečnaja impartnaja kaša da našaha spažyŭca nie dajšła.

• 0
• 0
• 0
• 0
• 0
• 0
• 0
• 0