KDK: Paśla 1 kastryčnika kolkaść pravierak źnizicca, a štrafaŭ — pavialičycca

Pra heta 28 vieraśnia na pres-kanfierencyi zajaviła načalnik adździeła kaardynacyi dziejnaści kantralujučych orhanaŭ Kamiteta dziaržaŭnaha kantrolu Danuta Ryžykava. Pres-kanfierencyja była pryśviečana ŭkazu prezidenta № 332 «Ab niekatorych mierach pa ŭdaskanaleńni kantrolnaj dziejnaści ŭ Respublicy Biełaruś», što nabudzie moc 1 kastryčnika.

Dakumient praduhledžvaje skaračeńnie kolkaści kantralujučych orhanaŭ i adpaviedna pravierak.

Pavodle słoŭ Ryžykavaj, užo ciapier z kaardynacyjnaha płana pravierak na druhoje paŭhodździe hetaha hoda vyklučana 390 pravierak. «Ukaz skiravany mienavita na skaračeńnie pravierak i kantralujučych orhanaŭ, ale heta praca nie adnamomantnaja, a pastajannaja, i jana zaraz budzie davać praktyčnyja vyniki», — ličyć śpiecyjalist.

Jak adznačyŭ načalnik hałoŭnaha ekśpiertna-pravavoha ŭpraŭleńnia KDK Vasil Hierasimaŭ,

na ŭzhadnieńni znachodzicca prajekt zakona ab uniasieńni źmianieńniaŭ u Administracyjny kodeks, «jaki praduhledžvaje kardynalnyja źmianieńni, u tym liku ŭ častcy padatkaŭ».

«My miarkujem, što ŭ suviazi z ukazam № 322 kolkaść štrafaŭ pavialičycca, tamu što my atrymali mahčymaść štrafavać słužbovych asob, jakija parušyli paradak pryznačeńnia pravierak, u niezaležnaści ad taho, pryznana ci nie pravierka niezakonnaj, paskardziŭsia subjekt pradprymalnictva ci nie», — adznačyła Ryžykava.

Pavodle danych KDK, za studzień-žnivień 2012 hoda kolkaść pravierak źniziłasia ŭ 1,5 razu ŭ dačynieńni da anałahičnaha pieryjadu minułaha hoda, a kolkaść pastupleńniaŭ hrašovych srodkaŭ u biudžet pavialičyłasia ŭ 1,2 razu.

Pavodle mierkavańnia staršyni Biełaruskaha sajuza pradprymalnikaŭ Alaksandra Kalinina, ukaz ab udaskanaleńni kantrolnaj dziejnaści palepšyć dziełavoje asiarodździe.

Pavodle jaho słoŭ, pradstaŭniki dziełavoj supolnaści brali ŭdzieł u raspracoŭcy dakumienta, «vykazvali vielmi šmat zaŭvah». «U vyniku pryniaty dakumient, jaki zachoŭvaje bałans pamiž intaresami dziaržavy i pradprymalnickich kołaŭ. Asobna adznaču skiravanaść kantrolnaj dziejnaści na praduchileńnie i prafiłaktyku pravaparušeńniaŭ. Stvarajecca asablivy spryjalny režym dla dobrasumlennych pradprymalnikaŭ», — ličyć kiraŭnik sajuza.

Pavodle mierkavańnia Kalinina, «stanovicca biessensoŭnym utojvać vyručku i zanižać padatki». «Dobrasumlennym pradprymalnikam stanie lahčej, žulikam — bolš składana», — kanstatavaŭ jon.

• 0
• 0
• 0
• 0
• 0
• 0
• 0
• 0