Piacikłaśnik straciŭ pamiać paśla poŭchi nastaŭnicy

Kanflikt u ružanskaj škole skončycca sudom.

Tak vyhladajuć nastupstvy niepiedahahičnych pavodzinaŭ vykładčycy matematyki Ružanskaj siaredniaj škoły Iryny Pałujanskaj z punktu hledžańnia baćkoŭ Nikifara Stajanaviča. Nastaŭnica ŭžo straciła pracu. Ciapier joj jašče pahražaje i administracyjnaja adkaznaść.

Namieśnik dyrektara pa navučalna‑vychavaŭčaj rabocie Nina Michalčuk była śviedkaj zdareńnia. Pavodziny kalehi jana nie apraŭdvaje, ale i vielmi sumniajecca, što taja poŭcha mahła mieć takija nastupstvy.

Nina Michalčuk: «Heta było na pierapynku. Adnakłaśniki ŭziali jaho spartyŭnuju formu i pačali kidać jaje pa kłasie. Jon vyjšaŭ ź siabie, pačaŭ kryčać, kidać knihi, raźbiŭ vazon z kvietkami. Vučni vybiehli ŭ kalidor i paskardzilisia nastaŭnicy. Jana na jaho nakryčała. Jon u adkaz staŭ na jaje niecenzurna łajacca. Jana šturchnuła jaho rukoj. Jon straciŭ raŭnavahu i stuknuŭsia hałavoj ab ścianu. Vyskačyŭ huzak».

Na nastupny dzień baćki chłopčyka pryjšli ŭ škołu z patrabavańniem, kab nastaŭnicu zvolnili pavodle artykułu. A kali daviedalisia, što tyja syšła z pracy pa pahadnieńni bakoŭ, maci vučnia, Anžeła Stajanavič, napisała skarhu ŭ rajonny sud.

Anžeła Stajanavič: «Zaraz chłopiec na praciahu hodu budzie znachodzicca pad nazirańniem u nieŭrołaha, vypisali leki, jakija jamu nieabchodna prymać try miesiacy. Chłopiec ad strasieńnia i šoku straciŭ pamiać. Ja chaču, kab hetuju nastaŭnicu pakarali tak, kab inšym niepanadna było. U mianie troje dziaciej i ja chaču, kab jany vučylisia. A ŭ nas tolki adna škoła».

U nastaŭnicy Iryny Pałujanskaj taksama troje dziaciej. Muž užo doŭhi čas nie moža znajści pracy ŭ miastečku. Ciapier biez pracy zastałasia i jana. Jak śćviardžaje načalnik upraŭleńnia adukacyi Pružanskaha rajvykankamu Mikałaj Kudraviec, uładkavacca pa śpiecyjalnaści joj u bližejšy čas nie dazvolać.

Mikałaj Kudraviec: «Heta — nastaŭnik, i heta — dzieci. Joj davieranyja čužyja losy, i nichto nie daŭ nastaŭniku prava tak siabie pavodzić».

Niahledziačy na heta, vinavataj na ŭsie sto adsotkaŭ Iryna Pałujanskaja siabie nie ličyć.

Iryna Pałujanskaja: «Ja liču, što vučań niecenzurna łajacca na nastaŭnika nie maje nijakaha prava. I z majho boku pavinna była być niejkaja reakcyja. Zaraz paluboŭna razyjścisia jany nie chočuć. Ja sama razmaŭlała z baćkami chłopčyka, sudździa i advakat prapanoŭvali damovicca, ale jany kateharyčna suprać».

U hetaj situacyi vyklikaje ździŭleńnie toje, jak źmianiaŭsia dyjahnaz atrymanaj Nikifaram Stajanavičam traŭmy. Hałoŭny doktar Ružanskaj balnicy Mikałaj Maksimaŭ vyznačyŭ u jaho «ŭdar miakkich tkaniaŭ». Kažučy prosta, zvyčajny huzak. Ale baćki chłopčyka pradstavili ŭ sud miedycynskuju daviedku ź inšym, značna bolš ciažkim dyjahnazam. Čamuści — sa Słonimskaj lakarni, što ŭ susiedniaj Hrodzienskaj vobłaści. Sudździa Pružanskaha suda Alena Ładaha patłumačyła, što pry składańni pratakołu da ŭvahi prymali dyjahnaz, jaki pastavili daktary adrazu paśla zvarotu da ich paciarpiełaha.

Alena Ładaha: «Pratakoł składzieny pa artykule 9.1 Administracyjnaha kodeksu. «Naŭmysnaje naniasieńnie cialesnaha paškodžańnia, jakoje nie paciahnuła za saboj karotkaterminovaha razładu zdaroŭja albo niaznačnuju stratu pracazdolnaści»; karajecca štrafam ad 10 da 30 bazavych vieličyń albo administracyjnym aryštam. Jakoje pakarańnie budzie pryznačana — vyznačyć sud. Pry ŭmovie, što vina budzie dakazanaja».

Na pieršaje pasiedžańnie, jakoje pavinna było adbycca niekalki dzion tamu, baćki Nikifara nie pryvieźli. Matyvavali heta tym, što jon usio adno ničoha nie pamiataje. Nastupnaje pasiedžańnie pryznačana na 19 krasavika. Prachodzić jano budzie biez prysutnaści paciarpiełaha.

• 0
• 0
• 0
• 0
• 0
• 0
• 0
• 0