Top-9 aryštaŭ u haradskich administracyjach: a vašaha mera jašče nie pasadzili?

Dziejučyja stanoviacca byłymi, a byłyja iduć pad sud. Sioleta zaviali niekalki kryminalnych spraŭ suprać kiraŭnikoŭ rajonaŭ i ich namieśnikaŭ.

Ihar Vasiljeŭ

Były pieršy namieśnik staršyni Minharvykankama. Jaho zatrymali ŭ lipieni ŭ pracoŭnym kabiniecie pry sprobie atrymać chabar u 250 tysiač dalaraŭ — pałova ad sumy, jakuju jon, na dumku śledstva, vymahaŭ u jeŭrapiejskaha inviestara. Ličba prosta fantastyčnaja dla Biełarusi. Hetyja hrošy pavinny byli zabiaśpiečyć inviestaru vyrašeńnie pytańnia na jaho karyść, źviazanaha z zaklučeńniem inviestycyjnaj damovy na ahulnuju sumu bolš za $30 młn.

Viktar Pilipiec

Byłoha mera Homiela ŭsio-tki aryštavali. Pa infarmacyi Śledčaha kamiteta, jaho zatrymali 19 vieraśnia ŭ miežach rasśledavańnia kryminalnaj spravy ŭ adnosinach da słužbovych asobaŭ upraŭleńnia kapitalnaha budaŭnictva Homielskaha harvykankama. Padstava — pieravyšeńnie ŭłady albo słužbovych paŭnamoctvaŭ.

Na «Dažynkach» u Horkach pra spravu eks-mera ŭskosna paviedamiŭ i Alaksandr Łukašenka. «Niekatoryja čynoŭniki, jak heta zdaryłasia ŭ Homieli, brali dziasiatkami kvatery i pierapradavali… Za 20 tysiač kuplali ŭ dziaržavy, a za 50 pierapradavali, a hrošy ŭ kišeniu».

Kresła mera Pilipiec pakinuŭ za miesiac za aryštu — pierajšoŭ na miesca namieśnika dyrektara instytuta «Homielahrapramprajekt». Źviazvali pierachod z aryštam čatyroch supracoŭnikaŭ upraŭleńnia kamunalnaha budaŭnictva Homielskaha harvykankama.

Uładzimir Tačyła i kalehi

Eks-mer Połacka byŭ zatrymany ŭ mai. Jon choć paŭtara hoda jak były, ale i aryštavali za spravy minułyja. Niadaŭna nazvali proźviščy jaho padzielnikaŭ. Heta namieśnik Tačyły Siarhiej Kuksaŭ, byłyja staršynia Połackaha rajvykankama Valeryj Palidaviec i jaho namieśnik Aleh Jermakovič. Pavodle śledčych, u 2009 jany niezakonna vydzialali dla siabie i svaich blizkich ziamielnyja ŭčastki ŭ Połacku ŭ zonie achoŭvanaha łandšaftu, na terytoryi, prylehłaj da Spasa-Jefrasińnieŭskaha žanočaha manastyra. Abvinavačvańni vystaŭlenyja pa artykułach «Naŭmysnaje źniščeńnie abo paškodžańnie historyka-kulturnych kaštoŭnaściaŭ abo materyjalnych abjektaŭ, jakim moža być prysvojeny status historyka-kulturnych kaštoŭnaściaŭ» i «Złoŭžyvańnie ŭładaj abo słužbovymi paŭnamoctvami». Jašče padčas śledstva škoda ad niezakonnaj dziejnaści pakrytaja ŭ poŭnym abjomie.

Mikałaj Kaleśnikaŭ

Sioleta zaviali kryminalnuju spravu suprać eks-namieśnika staršyni Rečyckaha rajvykankama. Padstavaj stała vydzialeńnie jamu ziamielnaha nadzieła. Pa materyjałach Upraŭleńnia baraćby z ekanamičnymi złačynstvami, u listapadzie 2010 Kaleśnikaŭ nibyta daŭ niezakonnaje ŭkazańnie vydzialić jamu ŭčastak pad budaŭnictva doma ŭ Rečycy. Kali letaś hetaja historyja ŭspłyła, rašeńnie admianili, a Kaleśnikava pazbavili pasady. Sioleta abvinavacili ŭ pieravyšeńni ŭłady albo słužbovych paŭnamoctvaŭ asobaj, jakaja zajmaje adkaznyja pasady.

Dźmitryj Janoŭski

U sud pieradadzienaja sprava suprać byłoha pieršaha namieśnika kiraŭnika Maskoŭskaj administracyi Minska. Jaho abvinavačvajuć u atrymańni chabaru ad prad-prymalnikaŭ za vyrašeńnie peŭnych pytańniaŭ. Suma chabaru skłała 90 młn rubloŭ. Padčas śledstva naniesienaja škoda była kampiensavanaja.

Michaił Krukoŭski

Eks-pieršaha namieśnika staršyni Uździenskaha rajvykankama padazrajuć u kradziažy budaŭničych materyjałaŭ sumiesna z kiraŭnikom adnaho kamunalnaha pradpryjemstva (kradziež šlacham złoŭžyvańnia słužbovymi paŭnamoctvami, ździejśnieny hrupaj asob pa papiaredniaj zmovie). Pa infarmacyi «Ježiednievnika», fihuruje nikčemnaja suma — 800 tysiač rubloŭ. Mahčyma, heta nie adziny złačynny fakt u spravie.

***

Pažuryli, ale nie pasadzili

U 2009 staršyniu Stolinskaha rajvykankama Alaksieja Dziamko pažuryŭ tahačasny kiraŭnik Administracyi prezidenta Uładzimir Makiej za siamiejnaść u pracy. Maŭlaŭ, sam kiruje rajonam, u rajvykankam uładkavaŭ syna, adkaznyja pasady na Stolinščynie zajmali inšyja svajaki. Ale ni da čaho krytyka nie paciahnuła: ni da rasśledavańnia, ni da adstaŭki.

Tolki sioleta, u lutym, Dziamko pazbaviŭsia kresła mera z padačy staršyni Bresckaha abłvykankama Kanstancina Sumara — «za pravały ŭ pracy». Ale ŭžo ŭ sakaviku jaho abrali ŭ rajonny Saviet deputataŭ pa Alšanskaj vybarčaj akruzie, deputat jakoj skłaŭ svaje paŭnamoctvy. A zatym Dziamko abrali jašče i staršynioj savieta.

• 0
• 0
• 0
• 0
• 0
• 0
• 0
• 0