Топ-9 арыштаў у гарадскіх адміністрацыях: а вашага мэра яшчэ не пасадзілі?

Дзеючыя становяцца былымі, а былыя ідуць пад суд. Сёлета завялі некалькі крымінальных спраў супраць кіраўнікоў раёнаў і іх намеснікаў.

Ігар Васільеў

Былы першы намеснік старшыні Мінгарвыканкама. Яго затрымалі ў ліпені ў працоўным кабінеце пры спробе атрымаць хабар у 250 тысяч даляраў — палова ад сумы, якую ён, на думку следства, вымагаў у еўрапейскага інвестара. Лічба проста фантастычная для Беларусі. Гэтыя грошы павінны былі забяспечыць інвестару вырашэнне пытання на яго карысць, звязанага з заключэннем інвестыцыйнай дамовы на агульную суму больш за $30 млн.

Віктар Піліпец

Былога мэра Гомеля ўсё-ткі арыштавалі. Па інфармацыі Следчага камітэта, яго затрымалі 19 верасня ў межах расследавання крымінальнай справы ў адносінах да службовых асобаў упраўлення капітальнага будаўніцтва Гомельскага гарвыканкама. Падстава — перавышэнне ўлады альбо службовых паўнамоцтваў.

На «Дажынках» у Горках пра справу экс-мэра ўскосна паведаміў і Аляксандр Лукашэнка. «Некаторыя чыноўнікі, як гэта здарылася ў Гомелі, бралі дзясяткамі кватэры і перапрадавалі… За 20 тысяч куплялі ў дзяржавы, а за 50 перапрадавалі, а грошы ў кішэню».

Крэсла мэра Піліпец пакінуў за месяц за арышту — перайшоў на месца намесніка дырэктара інстытута «Гомельаграпрампраект». Звязвалі пераход з арыштам чатырох супрацоўнікаў упраўлення камунальнага будаўніцтва Гомельскага гарвыканкама.

Уладзімір Тачыла і калегі

Экс-мэр Полацка быў затрыманы ў маі. Ён хоць паўтара года як былы, але і арыштавалі за справы мінулыя. Нядаўна назвалі прозвішчы яго падзельнікаў. Гэта намеснік Тачылы Сяргей Куксаў, былыя старшыня Полацкага райвыканкама Валерый Палідавец і яго намеснік Алег Ермаковіч. Паводле следчых, у 2009 яны незаконна выдзялялі для сябе і сваіх блізкіх зямельныя ўчасткі ў Полацку ў зоне ахоўванага ландшафту, на тэрыторыі, прылеглай да Спаса-Ефрасіннеўскага жаночага манастыра. Абвінавачванні выстаўленыя па артыкулах «Наўмыснае знішчэнне або пашкоджанне гісторыка-культурных каштоўнасцяў або матэрыяльных аб’ектаў, якім можа быць прысвоены статус гісторыка-культурных каштоўнасцяў» і «Злоўжыванне ўладай або службовымі паўнамоцтвамі». Яшчэ падчас следства шкода ад незаконнай дзейнасці пакрытая ў поўным аб’ёме.

Мікалай Калеснікаў

Сёлета завялі крымінальную справу супраць экс-намесніка старшыні Рэчыцкага райвыканкама. Падставай стала выдзяленне яму зямельнага надзела. Па матэрыялах Упраўлення барацьбы з эканамічнымі злачынствамі, у лістападзе 2010 Калеснікаў нібыта даў незаконнае ўказанне выдзяліць яму ўчастак пад будаўніцтва дома ў Рэчыцы. Калі летась гэтая гісторыя ўсплыла, рашэнне адмянілі, а Калеснікава пазбавілі пасады. Сёлета абвінавацілі ў перавышэнні ўлады альбо службовых паўнамоцтваў асобай, якая займае адказныя пасады.

Дзмітрый Яноўскі

У суд перададзеная справа супраць былога першага намесніка кіраўніка Маскоўскай адміністрацыі Мінска. Яго абвінавачваюць у атрыманні хабару ад прад-прымальнікаў за вырашэнне пэўных пытанняў. Сума хабару склала 90 млн рублёў. Падчас следства нанесеная шкода была кампенсаваная.

Міхаіл Крукоўскі

Экс-першага намесніка старшыні Уздзенскага райвыканкама падазраюць у крадзяжы будаўнічых матэрыялаў сумесна з кіраўніком аднаго камунальнага прадпрыемства (крадзеж шляхам злоўжывання службовымі паўнамоцтвамі, здзейснены групай асоб па папярэдняй змове). Па інфармацыі «Ежедневніка», фігуруе нікчэмная сума — 800 тысяч рублёў. Магчыма, гэта не адзіны злачынны факт у справе.

***

Пажурылі, але не пасадзілі

У 2009 старшыню Столінскага райвыканкама Аляксея Дзямко пажурыў тагачасны кіраўнік Адміністрацыі прэзідэнта Уладзімір Макей за сямейнасць у працы. Маўляў, сам кіруе раёнам, у райвыканкам уладкаваў сына, адказныя пасады на Століншчыне займалі іншыя сваякі. Але ні да чаго крытыка не пацягнула: ні да расследавання, ні да адстаўкі.

Толькі сёлета, у лютым, Дзямко пазбавіўся крэсла мэра з падачы старшыні Брэсцкага аблвыканкама Канстанціна Сумара — «за правалы ў працы». Але ўжо ў сакавіку яго абралі ў раённы Савет дэпутатаў па Альшанскай выбарчай акрузе, дэпутат якой склаў свае паўнамоцтвы. А затым Дзямко абралі яшчэ і старшынёй савета.

• 0
• 0
• 0
• 0
• 0
• 0
• 0
• 0