Alaksiej Šydłoŭski. BNF: novy lider — Viačorka

BNF: novy lider — Viačorka

Druhaja sesija šostaha źjezdu BNF u mienskim DK «Sukno» kančatkova patłumačyła sytuacyju ŭ najbujniejšaj biełaruskaj apazycyjnaj partyi. Vidavočna, što adbyŭsia nie raskoł, jak raniej mierkavałasia, a vyłučeńnie z Frontu adnoj jahonaj častki — tak zvanych «paźniakoŭcaŭ». I kali na pieršaj sesii ŭ lipieni hałasy delehataŭ padzialilisia paroŭnu, dyk ciapier pieravaha «viačorkaŭcaŭ» była vidavočnaju.

U minułuju subotu, 30 kastryčnika, a 10-j ranicy la ŭvachodu ŭ Dom kultury toŭpiłasia kala sotni delehataŭ, a taksama žurnalisty i šarahovyja frontaŭcy. Ich nie puskali ŭ budynak z roznych pryčynaŭ: delehataŭ — bo nie stavała niejkich śpisaŭ, šarahovych i žurnalistaŭ — bo takoje było rasparadžeńnie prapaźniakoŭskaj častki kiraŭnictva BNF: Čacholskaha, Bieleńkaha, Kryvarota dy staršyni mandatnaj kamisii Karolika. Ludzi mierźli na vulicy, zatrymanyja družynaju Alesia Čacholskaha, niahledziačy na zakliki Viačorki i Barščeŭskaha prapuścić ich.

Źjezd pačaŭsia a dvanaccataj. Papiarednie delehatam byŭ razdadzieny «pahadžalny» faks Paźniaka, dzie jon prapanavaŭ sfarmavać Sojm BNF z roŭnych častak pradstaŭnikoŭ abodvuch bakoŭ. Ale była i ŭmova: staršynia — sam Paźniak.

Vieści pasiedžańnie vypała Vincuku Viačorku. Pieršaje hałasavańnie było pra toje, kab puścić u zalu žurnalistaŭ. «Za» — prykładna 150 čałaviek z 200 prysutnych na toj momant. Družyna Maładoha Frontu ŭziałasia vykonvać hetaje rašeńnie, tymčasam A.Čacholski zablakavaŭ uvachod svaimi ludźmi i admoviŭsia vykonvać rašeńnie źjezdu. Uźnikła patasoŭka. U vyniku źmierzłyja na vulicy patrapili ŭ faje.

Tymčasam u zali razhortvalisia padobnyja padziei. Na scenu vyskokvali pradstaŭniki «paźniakoŭcaŭ» z abrazami ŭ bok apanentaŭ. Jury Bieleńki vychapiŭ u Viačorki mikrafon i abjaviŭ, što vieści pasiedžańnie budzie jon. Zrazumieła, što sp.Viačorka, jak čałaviek vychavany, nia staŭ usčynać svarku. U zali pačaŭsia šum, zahučali abrazy, sprava voś-voś mahła pieraraści ŭ bojku. Uzdoŭž sceny ŭstaŭ łancuh z chłopcaŭ-maładafrontaŭcaŭ, jakija ŭziali na siabie funkcyju družyny i bolš nikoha na scenu nie puskali. Babulki-«paźniakoŭki», što siadzieli ŭ pieršych šerahach, nazyvali maładafrontaŭcaŭ fašystami dy plavali ŭ ichny bok. Dziŭna, što ludzi, u jakich tak bahata enerhii, admovilisia brać udzieł u Maršy Svabody 17 kastryčnika. Tam ichny impet spatrebiŭsia b bolš.

Bedłam, vierahodna, praciahvaŭsia b da viečara, ale «viačorkaŭcy» pryniali rašeńnie pakinuć zalu. I voś tut «paźniakoŭcaŭ» čakaŭ šok. U zali zastałosia kala 70 čałaviek z 320 delehataŭ źjezdu. Ni pra jaki kvorum nie mahło być i havorki. Tym nia mienš, Ju.Bieleńki pravioŭ pasiedžańnie «svajho frontu», na jakim byli abranyja staršynia Zianon Paźniak, namieśniki i Sojm. Usie 70 čałaviek byli raźmierkavanyja pa pasadach.

Uviečary, a 18-j, pačaŭsia źjezd «viačorkaŭcaŭ», jakich, dziakujučy kvorumu ŭ 239 čałaviek, ciapier i možna ličyć Biełaruskim Narodnym Frontam. Staršyniom BNF staŭ Vincuk Viačorka, namieśnikami: Aleś Bialacki, Viktar Ivaškievič, Pavał Sieviaryniec, Anatol Fiodaraŭ dy Juraś Chadyka. Siarod siabroŭ novaabranaha Sojmu — duchoŭnyja lidery Vasil Bykaŭ, Ryhor Baradulin, Artur Volski.

Ciapier pytańni stajać nastupnym čynam: dźvie partyi — BNF i paźniakoŭskaja KCHP — pad adnym dacham žyć nia buduć, tamu pytańnie numar 1 — pra pamiaškańnie Ŭpravy. Pytańnie numar 2 — pazycyja Miniustu adnosna minułaha źjezdu. Spryjańnie KCHP z boku ŭładaŭ u hetaj spravie paćvierdziłasia šeraham prykładaŭ. Ministar Suchinin, paviedamlajučy zajaŭlalnikam ad BNF pra toje, što «ŭžo addaŭ dakumenty» sp.Papkovu, spasłaŭsia na rasparadžeńnie «źvierchu».

Pry ŭsioj svajoj važnaści hetyja pytańni, tym nia mienš, nie zatulajuć hałoŭnaha: Biełaruski Narodny Front, jaki zachavaŭ viernaść ułasnamu statutu i skinuŭ ź siabie bałast, musić raspačać novy ŭźlot u historyi arhanizacyi. Kali tolki vybranyja stratehija dy taktyka nie akažucca pamyłkovyja.

Alaksiej Šydłoŭski