Šarecki źniaŭ bieł-čyrvona-bieły ściah
Na tym tydni da staršyni Šareckaha pryjechaŭ pryznačany na sesii Viarchoŭnaha Savietu hieneralny prakuror Biełarusi, deputat Ryhor Prakapovič.
Paśla cyrymonii pradstaŭleńnia adbyłasia pres-kanferencyja dla žurnalistaŭ. Jana pravodziłasia ŭ siadzibie Tavarystva Biełaruskaje Kultury, dzie mieścicca i kabinet S.Šareckaha. Pierad pres-kanferencyjaj sp.Šarecki zahadaŭ źniać sa ściany bieł-čyrvona-bieły ściah, čym vyklikaŭ abureńnie haspadaroŭ pamiaškańnia. Adnak musili ŭsio ž źniać...
U pačatku novy prakuror pasprabavaŭ skazać paru słovaŭ pa-biełarusku:
— Šanoŭnyja spadaryni! Šanoŭnyja siabry! Mnie vielmi pryjemna być u hetym histaryčnym budynku razam z vami. Ale pa niekatorych abstavinach dalejšuju razmovu z vami ja budu vymušany vieści na rasiejskaj movie!
Hety pasaž vyklikaŭ nieŭrazumieńnie asabliva ŭ zamiežnych žurnalistaŭ, bo nichto nia ŭciamiŭ, što heta za “niekatoryja abstaviny”... Na zapyt karespandenta radyjo “Polonia”, čamu z zali prybrali biełaruski ściah, prakuror adkazaŭ tak:
— Siońnia ja ŭsim vam chaču tut patłumačyć, što byŭ adzin cikavy momant u historyi, kali adzin hienprakuror uviazaŭsia mocna ŭ palityku i što ź im zdaryłasia. A toj prakuror, jaki siadzić pierad vami, nijakaj palitykaj zajmacca nia budzie! I budzie rabić tolki toje, što praduhledžana zakonam! I ja prašu ličyć vašyja pytańni niekalki niekarektnymi i niasvoječasovymi.
Tutaka ŭžo i ŭ biełarusaŭ, i ŭ niebiełarusaŭ usio ŭ hałovach pabłytałasia. Što ž tady palityka, kali nia zhoda zaniać pasadu apazycyjnaha hienprakurora? I čamu niekarektna pytacca ŭ biełaruskaha prakurora pra biełaruski ściah? Pry čym tut zakony?
Adnak błytaninaj usio heta padajecca tolki na pieršy pohlad. Prakuror sapraŭdy musić vykonvać zakony, pryniatyja parlamentam. A mienavita Viarchoŭny Saviet 13 sklikańnia zakanadaŭča admianiŭ naš ściah, i hierb, i movu. Ciapier jany i ŭ Vilniu sa svaimi zakonami pryjechali...
Paśla aficyjnych mierapryjemstvaŭ vilenskija biełarusy viarnuli svaju śviatyniu na miesca.
H.K.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary