Va USU zajavili pra źniščeńnie 19 tankieraŭ u Azoŭskim mory. Jany mahli vazić bienzin u Krym

Ukrainskija drony atakujuć rasijskija tankiery v Azoŭskim mory

Bieśpiłotniki treci dzień zapar nanosiać udary pa rasijskich tankierach u Azoŭskim mory. Infarmacyju pra heta ŭ svaim telehram-kanale publikuje kamandujučy Sił bieśpiłotnych sistem USU Robiert «Madziar» Broŭdzi. Z kožnym dniom pad udary traplaje ŭsio bolš karabloŭ, jakija pieravoziać naftapradukty.

U paniadziełak, 6 lipienia, Broŭdzi napisaŭ, što ŭkrainskija drony parazili dva tankiery, jakija nakiroŭvalisia z hruzam bienzinu z Tahanroha ŭ anieksavany Krym. Pavodle jaho słoŭ, na borcie kožnaha było pa 7 tysiač ton paliva (ekvivalent 200 čyhunačnych cysternaŭ).

Na apublikavanym Madziaram zapisie vidać, jak drony dahaniajuć rasijskija karabli i atakujuć ich. Ukrainskija vajskoŭcy śćviardžajuć, što heta tankiery «Kapitan Barmin» i «Sanar-4» kłasa «raka — mora», jakija adnosiacca da «cieniavoha fłotu» Rasii. Jany rehularna kursiravali pamiž račnymi i marskimi partami ad Vałhahrada da Navarasijska, nieadnarazova zachodzili ŭ Krym.

U momant ataki ŭ niepasrednaj blizkaści ad tankieraŭ inšych karabloŭ u poli zroku kamier bieśpiłotnikaŭ nie było. Stupień paškodžańnia abodvuch karabloŭ vyznačyć składana, pakolki SBS USU nie raźmiaščali na svaich resursach kadry z daraźviedkaj celaŭ, jakija ŭdałosia parazić.

Pavialičyć

Čamu ataki ŭ Azoŭskim mory pahražajuć zabieśpiačeńniu Kryma

Užo na nastupny dzień, 7 lipienia, Madziar paviedamiŭ, što jaho padnačalenyja vynikova atakavali adrazu dziesiać rasijskich karabloŭ u Azoŭskim mory — vosiem tankieraŭ, adzin suchahruz i adzin parom.

Hetym razam na apublikavanych kadrach vidać, što karabli iduć vialikaj hrupaj — nie mienš za 20 sudnaŭ na nievialikaj adlehłaści adno ad adnaho. U roliku pakazanyja ŭdary pa tankierach, častku ź jakich parazili adrazu niekalki bieśpiłotnikaŭ. Apublikavanyja taksama kadry daraźviedki: vidać, što na niekatorych sudnach paśla ataki pačaŭsia mocny pažar.

Vierahodna, tankiery parazili niedaloka ad Kierčy. U hetaj častcy akvatoryi Azoŭskaha mory 7 lipienia spadarožniki NASA FIRMS zafiksavali niekalki zaŭvažnych z kalaziamnoj arbity bujnych ačahoŭ hareńnia.

Kamandavańnie SBS USU paznačyła nazvy atakavanych tankieraŭ: «Vieniera-3», «Sanar-1», «Sanar-17», «Klimiena», Teti, «Alaksiej Saŭrasaŭ», «Pieniełopa», «Ivan Čaramisinaŭ». Niekatoryja ź ich znachodziacca ŭ sankcyjnych śpisach i nieadnarazova byli zaŭvažanyja ŭ pieravozkach naftapraduktaŭ u Krym.

«Charakternaja arhanizacyja pachodu hetych tankieraŭ — biezabaronnaja ščylnaja masa karabloŭ pasiarod mora, jakaja ŭjaŭlaje saboj cir dla ŭkrainskich apierataraŭ dronaŭ FPV. Ni prykryćcia karablami Čarnamorskaha fłotu, jaki daŭno ŭžo ledź sam siabie achoŭvać moža, ni ahniavych hrup na samich karablach», — prakamientavaŭ ukrainskuju ataku bujny Z-kanał «Vojennyj ośviedomitiel».

Jaho aŭtary vykazali zdahadku, što ŭ chutkim časie Rasija atrymaje svoj ułasny Armuzski praliŭ z Ukrainaj u roli Irana. U takim vypadku marski šlach u Krym dla rasijskich tankieraŭ taksama budzie zakryty.

Rasijskija tankiery iduć u Krym biez vajskovaha supravadžeńnia

Narešcie, 8 lipienia kamandujučy ŭkrainskimi SBS napisaŭ pra vynikovyja ataki suprać jašče dzieviaci rasijskich tankieraŭ u Azoŭskim mory. Ukrainskija bieśpiłotniki znoŭ bieśpieraškodna nanosili pa ich udary. Pracy pa dronach srodkami SPA na videa nie zaŭvažna.

Zatoje vyrazna vidać mocny pažar, jaki ŭspychnuŭ na borcie adrazu niekalkich karabloŭ (niekatoryja ź ich parazili nieadnarazova). Možna razhledzieć, što z paškodžanaha korpusa niekatorych tankieraŭ pačałosia vyciakańnie naftapraduktaŭ u mora.

Źviazany ź Minabarony RF pablik «Rybaŕ» tłumačyć adsutnaść vajskovaha prykryćcia i supravadžeńnia hruzavych sudoŭ, jakija iduć u Krym, tym, što rasijskija vajskovyja karabli sami ŭraźlivyja dla ŭkrainskich dronaŭ.

«Adnak sutnaść u inšym: a što, za try hady nielha było daabstalavać chacia b častku karabloŭ kulamiotami, PZRK i inšymi srodkami, jakimi całkam mahčyma vyjaŭlać i źbivać nizkalatajučyja i paraŭnalna cichachodnyja celi?» — pytajucca aŭtary telehram-kanała.

Pavialičyć

Jak udary pa tankierach mohuć uzmacnić deficyt bienzinu ŭ Krymie

Zabieśpiačeńnie Kryma z dapamohaj tankieraŭ prosta ciapier — ledź nie adzinaja mahčymaść zavozić paliva na paŭvostraŭ. Paśla taho jak ukrainskija bieśpiłotniki ŭstalavali ahniavy kantrol nad suchaputnymi šlachami ŭ Krym, jon akazaŭsia krytyčna zaležnym ad zabieśpiačeńnia marskim šlacham.

Paśla masiravanaj dronavaj ataki na Słavianski NPZ u Krasnadarskim krai — asnoŭnaha pastaŭščyka paliva na paŭvostraŭ, — a taksama šmatlikich udaraŭ pa najbližejšym da jaho naftanaliŭnym porcie Kaŭkaz uźnikła nieabchodnaść vykarystoŭvać alternatyŭnyja maršruty.

Adzin ź ich — praz čarnamorskija naftavyja terminały ŭ Novarasijsku i Tuapse. Adnak jany śpiecyjalizujucca na adhruzcy syroj nafty, mazutu, dyzielnaha paliva i nie aryjentavanyja na bienzin, u jakim tak mocna maje patrebu Krym. Da taho ž u Čornym mory aktyŭnyja nie tolki pavietranyja, ale i marskija drony, što jašče bolš pavyšaje ryzyku transpartavańnia hetym šlacham.

U suviazi z hetym adzinaja marskaja łahistyčnaja alternatyva ciapier — dastaŭlać paliva praz Azoŭskaje mora. U pryvatnaści, jaho adhružajuć na tankiery ŭ partach Tahanroha, Rastova-na-Donie i Azova.

U suviazi z tym što siarod atakavanych ukrainskimi bieśpiłotnikami tankieraŭ častku składajuć sudny kłasa «raka — mora», vierahodna, paliva mahło nakiroŭvacca i niepasredna z NPZ Pavołžskaha rehijona — Saratava, Samary, Baškartastana, Tatarstana.

Usiaho ŭ Rasii pa stanie na pačatak 2025 hoda naličvałasia 428 naliŭnych sudnaŭ, uklučajučy jak marskija tankiery, tak i tankiery kłasa «raka — mora». Takim čynam, usiaho tolki za try dni ŭkrainskija SBS mahli vyvieści sa stroju da 5% usiaho rasijskaha naliŭnoha fłotu. Kali ž brać vyklučna sudny kłasa «raka — mora», to hetaja dola akažacca jašče vyšejšaj.

Pavodle padlikaŭ «Vot Tak», z pačatku 2026 hoda i pa 6 lipienia, kali pačałasia maštabnaja kampanija pa źniščeńni tankiernaha fłotu ŭ akvatoryi Azoŭskaha mora, u hetym rajonie SBS USU źniščyli tolki dva rasijskija tankiery. Adzin ź ich byŭ atakavany 30 maja ŭ porcie Tahanroha, druhi — 5 červienia niedaloka ad akupavanaha Maryupala.

Akramia hetaha, na praciahu taho ž pieryjadu bieśpiłotniki parazili siem suchahruzaŭ i čatyry paromy, jakija ažyćciaŭlali pieravozku praz Kierčanski praliŭ.

• 0
• 0
• 0
• 0
• 0
• 0
• 0
• 0