«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ
Supracoŭnica adnoj ź minskich kaviarniaŭ pasprabavała znajści praz sacsietki hościu, jakaja pajšła nie zapłaciŭšy. Dziaŭčyna padumała, što łedzi prosta zabyłasia pra rachunak. Ale ŭ kamientarach padkazali: heta viadomy piersanaž — «Lena 20 rubloŭ». Hučyć iranična — ale i ŭ novym vypadku havorka idzie pra 20 rubloŭ.
Barysta Nastaśsia apublikavała ŭ Threads fotazdymak klijentki: «Dziaŭčyna, kali vy paznajecie siabie na fatahrafii, prosim vas viarnucca i apłacić svoj rachunak».
Ale kamientatary chutka rastłumačyli: čakać niama čaho.
Šmat kamu z supracoŭnikaŭ minskich kafe i restaranaŭ žančyna dobra znajomaja — jość zhadki, što hastraluje jana ažno z 2016 hoda.
«Ja pracavała aficyjantkaj u dalokim 2016 hodzie. Heta była adzinaja naviedvalnica, jakaja nie apłaciła rachunak za ŭvieś čas, pakul ja pracavała. Ja, kali ščyra, u šoku, što jana i pa siońnia razhulvaje. Pajeła, paprasiła zvaryć joj kavy i syšła byccam by pa hrošy. Mnie jašče tak kryŭdna było, što i za kavu tuju nie vypituju mnie jašče pryjšłosia zapłacić».
«Prychodziła da mianie ŭ kaviarniu, skazała, što muž zabyŭ fizičnuju kartku ŭ mašynie i paprasiła pačakać, pakul muž vierniecca. Ničoha nie zasmuciła, bo kantynhient na rajonie vielmi dobry. Samaje iraničnaje, što raspaviadała, jak jaje kinuli na hrošy, a potym sama mianie ž i kinuła».
«Sustrakała jaje nieadnojčy ŭ sietcy kafe, dzie ja pracavała. Rachunak nie apłaciła, źbiehła ŭ pieršy raz. Druhi ja na jaje vyklikała milicyju. Na jaje ŭ milicyi ŭžo doŭhi śpis takich nieapłačanych rachunkaŭ. Ale jaje adpuścili — suma vielmi maleńkaja. Spravu zakryli. Jana praciahvaje chadzić, na jaje pišuć zajavy, zavodziać spravy, a potym zakryvajuć. Heta ciahniecca hadami. Vychad pakul adzin: zapomnić i ničoha joj nie davać u ruki biez apłaty. Milicyja ničoha ź joj nie robić».
«Heta dama trojčy była ŭ kaviarni, dzie ja pracavała. Pieršy raz sprabavała zaduryć hałavu, byccam jość prablemy z kartkaj, ale vy hatujcie, ja zapłaču. Potym dvojčy jaje paili kavaj čullivyja hości».
Niechta navat zachaplajecca talentam žančyny hadami žyć za košt davierlivych biełarusaŭ i nazyvaje lehiendaj Minska. Kahości jana paśpiavała padmanuć dvojčy za adzin dzień.
U 2023 hodzie pra jaje pisaŭ błohier Kakabaj: «Tryvožnyja zvanki pastupajuć z restaranaŭ Minska: «Załaty hrabianiec», «Fabryk», «Le Hos», «Majłaŭbiery» i jašče niekalki. Usich abjadnoŭvaje adna niepryjemnaja situacyja: va ŭstanovu prychodzić dziaŭčyna, zakazvaje ježu i napoi, jak praviła, ček kala 50‑100 rubloŭ. Paśla sychodzić niby sustreć siabroŭku, a dalej jaje bačać tolki na zapisy kamier unutranaha nazirańnia».
Paźniej pra pryhody žančyny pisaŭ «Anłajnier» — tady ž jana i atrymała mianušku «Lena 20 rubloŭ» praz toje, što stralała ŭ žycharoŭ Lebiadzinaha ŭ Minsku pa 20 rubloŭ. Lehienda była prostaja: «Razradziŭsia ajfon, najaŭnych na taksi niama — dapamažycie, kali łaska». Jana pakidała svoj numar (realny) i prasiła dasłać joj rekvizity kartki, kudy pieraličyć doŭh.
Kamuści navat viartała praź niekalki tydniaŭ — časam krychu bolš, čym atrymała. Ale čaściej za ŭsio ludzi zastavalisia ni z čym. Raźlik prosty — niašmat chto zachoča marnavać čas na pachod u milicyju dziela 20 rubloŭ.
Byli i inšyja historyi: kahości Lena prasiła apłacić pradukty ŭ kramie (bo taksama razradziŭsia telefon), kamuści raspaviadała pra nieabchodnaść terminova apłacić arandavanuju na sutki kvateru (chłusiła, byccam tolki što pryjechała z Maskvy)…
Kali ludzi pačynali huhlić telefonny numar, adrazu natykalisia na zapisy, što naležyć jon machlarcy.
U chutkim časie stała viadoma, što žančynu zatrymali. Siłaviki dali spravazdaču:«Heta 35‑hadovaja biespracoŭnaja hamialčanka, jakaja žyvie ŭ stalicy. Dziaŭčyna pryciahnuta da administracyjnaj adkaznaści. Akramia taho, supracoŭniki milicyi ŭ ciapierašni čas pravodziać pravierku i vyśviatlajuć jaje datyčnaść da ździajśnieńnia inšych supraćpraŭnych dziejańniaŭ».
U 2024 hodzie pakryŭdžanaja svajoj słavaj Lena dała intervju «Anłajnieru». Arhumienty jaje byli kštałtu «jakaja ž ja machlarka, kali pakidała sapraŭdny numar telefona?!» Zapeŭnivała, što viarnuła ŭsie hrošy — a trubku nie padymała, bo ab čym joj razmaŭlać ź ludźmi, kali pytańnie zakryta.
A voś što raspaviała žančyna pra svajo zatrymańnie: «Ja zajšła ŭ handlovy centr, da mianie padbieh achoŭnik, spyniŭ mianie, vyklikaŭ milicyju. Supracoŭniki milicyi zabrali mianie, dastavili ŭ RUUS i dali 10 sutak nibyta za toje, što ja łajałasia matam, ale ja nikoli nie łajusia matam i nie pju ałkahol. U milicyi nie paćvierdziŭsia nivodny fakt, što ja kamuści nie viarnuła hrošy».
Asabliva Lenu ŭ navinach pra siabie kryŭdziła farmuloŭka «biespracoŭnaja hamielčanka». Jana śćviardžała, što žyvie i pracuje ŭ Minsku z 2013 hoda. Raspaviała, što raniej skončyła VNU ŭ Homieli, potym pracavała tam u banku. Ale pra pracu ŭ stalicy raspaviadać admoviłasia.
Vychvalałasia, byccam nabyła kvateru na praśpiekcie Dziaržynskaha i pačała budavać jašče adnu ŭ Novaj Baravoj.
Žurnalisty źviazalisia i ź siamjoj Leny. Muža i dziaciej na toj momant u jaje nie było. Byŭ baćka, jaki žyŭ u vioscy Homielskaj vobłaści, i brat z Homiela. Maci daŭno pamierła. Brat i baćka viedali pra sumnuju słavu svajoj blizkaj svajački: baćka nie reahavaŭ nijak, a brat tolki złaradničaŭ.
«Lena 20 rubloŭ» płakałasia, što ŭ 2019 hodzie zastałasia biez 100 tysiač dalaraŭ na mytni — byccam by šalonyja hrošy zabrali praz toje, što jany nie byli zadekłaravanyja. A kali žurnalisty paprasili paćvierdzić historyju, skinuła tekst pra žančynu, u jakoj na miažy kanfiskavali 32 tysiačy dalaraŭ (vialikuju roźnicu jana nie zmahła rastłumačyć). Dakumientaŭ u redakcyi tak i nie dačakalisia.
Vyhladaje, što z taho času spravy ŭ «Leny 20 rubloŭ» pahoršylisia. Ciapier jana razvodzić nie darahija restarany, a biudžetnyja kaviarni. A žychary Novaj Baravoj skardziacca, što žančyna śpić u ich padjezdach i karystajecca ahulnaj prybiralniaj.
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary