Naviny

 Naviny

Malčyk za kratami abviaściŭ haładoŭku

Paśla chapuna na 25 sakavika kaho apraŭdali, a kaho i zasudzili.

U Horadni za arhanizacyju niesankcyjavanaha šeścia na Dzień Voli Leninski rajsud zasudziŭ na 10 sutak Siarhieja Malčyka, kiraŭnika miascovaj filii pravaabarončaha centru «Viasna». Malčyk svaje viny nie pryznaŭ i zaraz pa vyniasieńni prysudu abviaściŭ haładoŭku.

A.K.

Raj dla hultajoŭ

Što ni kažy, a kamu za Łukašenkam dobra, dyk heta nievukam i niazdaram. Na minułym tydni baranavickija školniki praciahvali adpačyvać. Takija daŭhija vakacyi vydalisia, tamu što ŭ haradzkim biudžecie niama srodkaŭ na aciapleńnie klasaŭ.

Ludzi kažuć, byccam były staršynia harvykankamu Paŭłaŭ, źjaždžajučy ŭ Miensk, zabraŭ z saboju ŭsie hrošy, ci što jon ich puściŭ na nabyćcio novaj pasady. Kudy ž sapraŭdy pajšli srodki na aciapleńnie z haradzkoha biudžetu, nikoha nie cikavić…

Tymčasam zima viarnułasia, u čaćvier u Baranavičach pajšoŭ śnieh, pačałasia zavirucha. Dzieci radujucca — bo vakacyi mohuć być praciahnutyja da nastupleńnia ciapła.

Raviaka Rusłan z Baranavičaŭ

Novy amerykanski pasoł padobny da biełarusa

Prezydent ZŠA Bił Klintan nazvaŭ imia novaha amerykanskaha pasła ŭ Biełarusi, jaki ŭ červieni źmienić na hetaj pasadzie Denieła Spekharda. Da nas pryjedzie Majkł Kozak (Michaś Kazak, pa-biełarusku), jaki da niadaŭniaha času ŭznačalvaŭ amerykanskuju misiju ŭ Havanie, — paviedamiŭ u piatnicu open.by. Jak kažuć, dźvie naviny ŭ adnoj — pryjemnaja i nia vielmi. Fajna, kali pasoł z pachodžańnia naš ziamlak, ale kraina jahonaj papiaredniaj dyślakacyi — Kuba — lišni raz śviedčyć pra ciapierašniaje miesca Biełarusi ŭ śviecie.

A.K.

Karovy puchnuć z hoładu, a chaładzilniki – ad miasa

Na apošniaj naradzie Łukašenka ledźvie nie zahadaŭ sialanam: «Nia režcia skot!» Ale ŭžo jak minimum spaźniŭsia. U Mahilovie chaładzilniki miascovaha miasakambinatu ŭžo zavalenyja śviežym miasam. Ažno paŭtary tysiačy ton jałavičyny i śvininy musić zachoŭvać zaraz pradpryjemstva. Padobnaje stanovišča pa ŭsioj vobłaści.

Symon Hłazštejn, Mahiloŭ

Niemcy zakazali film pra Labiedźku

Paśla padziejaŭ 25 sakavika pieršy kanał niamieckaha telebačańnia zakazaŭ 30-chvilinavy film pra adnaho ź lideraŭ biełaruskaj apazycyi Anatola Labiedźku, — paviedamiŭ BiełaPAN sa spasyłkaj na Asacyjacyju Maładych Palitykaŭ. Sam Labiedźka ličyć, što «pakul biełaruskim telebačańniem i radyjo vałodaje telemahnat Łukašenka, tam nia budzie miesca alternatyŭnaj pazycyi i svabodnamu abmienu dumkami». Maŭlaŭ, ciapier «hołas i mierkavańnie biełaruskaj apazycyi chutčej pačujuć hramadzianie Polščy, Niamieččyny, Švecyi ci Ŭkrainy, čym biełaruskija padatkapłacielščyki, jakija ŭtrymlivajuć telebačańnie i radyjo».

Za plašku harełki — na toj śviet

Kolki ni kažy, što ŭ harełcy — zhuba, nia vieryć naš paspality čałaviek. Adzin navapołacki ślesar ź miascovaha zavodu žalezabetonnych vyrabaŭ vyrašyŭ dakazać, što nie pieravialisia jašče «vołaty» na Biełarusi. Paspračaŭsia z tavaryšami, što załpam vypje plašku harełki. Sprečku haračy biełaruski ślesar vyjhraŭ. A voś lekaram jahonaje žyćcio vyratavać nie ŭdałosia. Doza akazałasia dla «vołata» śmiarotnaj.

Andrej Alaksandraŭ, Navapołacak

Medyki śpiavajuć i tancujuć

U Biełarusi ŭsio bolš suchotnikaŭ. I ŭsio ciažej ich svoječasova vyjaŭlać. Bo fluarahrafiju prachodziać nia ŭsie, asabliva ŭ vioskach.

Aryhinalny sposab zaciahnuć viaskoŭcaŭ na fluarahrafiju prydumali ŭ Žytkavickim suchotnym dyspansery. Napiaredadni ŭ viosku Dziedaŭka Žytkavickaha rajonu razam ź pierasoŭnym fluarohrafam pryjechała cełaja ahitbryhada. Kala 15-ci medyčnych rabotnikaŭ — supracoŭnikaŭ dyspanseru — naładzili dla viaskoŭcaŭ sapraŭdnaje samadziejnaje šoŭ: śpiavali, tancavali, ładzili konkursy. Adnačasova na pierasoŭnym fluarohrafie žycharam Dziedaŭki rabili zdymki lohkich. Sa słovaŭ starejšaj medyčnaj siastry dyspanseru Niny Machnač, jakaja, darečy, usio heta i prydumała, akcyja mieła vialiki pośpiech. Viaskoŭcy, da jakich nia vielmi časta zajaždžajuć hastralory, byli radyja pabačyć samadziejny kancert, a zamiest kvitkoŭ prajšli fluarahrafiju. Spadarynia Machnač paviedamiła nam, što, niahledziačy na ciažkaje finansavaje stanovišča i šmatlikija prablemy jejnaj ustanovy, supracoŭniki dyspanseru ŭ vyhladzie ahitbryhady chutka iznoŭ nakirujucca ŭ adnu ź viosak Žytkavickaha rajonu, žychary jakoj nie prajšli fluarahrafičny ahlad.

Dziŭny narod biełarusy, a asabliva — medyki. Zarobki mizernyja, dyj tyja zatrymlivajuć, a im da hałavy jašče i niejkija eksperymenty!

Alaksiej Dzikavicki

Ciažka dychać

Ekalahičnaja sytuacyja ŭ Navapołacku pa-raniejšamu dalokaja ad dobraj. Viadoma, prycichli takija hihanty chimdymu, jak «Naftan» i «Palimir», ale ž vałavy vykid usialakaje hadaści ŭ pavietra ŭsio adno składaje ažno 40 tysiačaŭ ton. Heta značyć, 380 kh na kožnaha navapałačanina. I kali pa «vału» Navapołacak sastupiŭ pieršynstvo Mahilovu, dyk u pieraliku na kožnaha žychara «naftahrad» pa-raniejšamu napieradzie. Lideram zastajecca vytvorčaje abjadnańnie «Naftan». Kali paraŭnoŭvać ź siaredniebiełaruskim pakazčykam, dyk u Navapołacku hadaści na 10% bolej.

Andrej Alaksandraŭ

Pirataŭ na Dniapry nia budzie

Mahiloŭskija pravaachoŭniki pačali aktyŭnuju baraćbu ź piractvam. Praŭda, pakolki akijanaŭ i moraŭ pad Mahilovam niama, a na Dniapry pirataŭ taksama nidzie nia bačyli, dyk milicyja i KHB zajmalisia pošukam i vykryćciom videa- i aŭdyjopirataŭ. Ich u abłasnym centry chapaje. Ludzi ŭ pahonach naviedali 3 padpolnyja firmy. Razam aryštavana bolš za 100 pradmietaŭ radyjo-videaaparatury, amal 16000 aŭdyjo-, videakasetaŭ dy kampakt-dyskaŭ. Jak śviedčać vyniki papiaredniaha raśśledavańnia, sučasnyja mahiloŭskija piraty štodzień vydavali pa 150 videakasetaŭ i da paŭtysiačy mahnitafonnych. Niekatoryja kinastužki ŭ vykanańni pirataŭ źjaŭlalisia raniej, čym jany prychodzili na lehalny rynak. Varta adznačyć, što nazyvać padpolnymi tyja studyi možna tolki ŭmoŭna. Pra ich viedaŭ uvieś horad, ich pasłuhami karystalisia jak zvyčajnyja mieścičy, tak i miascovyja telekanały, adzin ź jakich pakazvaŭ siužet pra zatrymańnie.

Symon Hłazštejn

Ułada paškadavała vytvorcaŭ

Mahiloŭski harsaviet vyrašyŭ źmienšyć na dźvie treci padatak na nieruchomaść. Heta vynik amal što kryku «SOS» našych vytvorcaŭ. Padatkaŭ prychodzicca płacić proćmu. U vyniku pierakryvajecca ŭ vytvorcy «apošni kisłarod». Dumki ŭžo nie pra raźvićcio, a pra toje, jak vyžyć. Nievypadkova, što pavodle źviestak aficyjnaj statystyki, najaŭnaja materyjalnaja baza adpracavała svoj resurs užo na 80%. Prychodzicca z žacham spadziavacca, kab što-dzie vypadkova nia vybuchnuła i nie spyniłasia. Deputaty kryk pačuli i pajšli nasustrač. Ale ž z takimi krykami ŭ ekanomicy lohka i hołas sarvać.

S.H.

Arhkamitet Usiebiełaruskaha Źjezdu paviedamiŭ nam, što praciahvaje raspracoŭku Rehlamentu Źjezdu. Z hetaj nahody jon źviartajecca da ŭsich hramadzkich arhanizacyjaŭ, palityčnych partyjaŭ, tvorčych i prafesijnych sajuzaŭ, jakija padtrymlivajuć ideju Ŭsiebiełaruskaha Źjezdu i majuć namier brać u im udzieł, kab zarehistravalisia ŭ Sakrataryjacie da 14 krasavika.

Heta nieabchodna treba zrabić, kab kančatkova zaćvierdzić Rehlament i kab vyznačyć mierkavanuju kolkaść delehataŭ i kvoty dla arhanizacyjaŭ.

Kantaktny telefon dla rehistracyi: (017) 223-65-29