Aleś Kudrycki. Miljard za łamačča

 Miljard za łamačča

“Karupcyjnaje pavučyńnie”– tak nazyvajuć śledčyja spadčynu, jakuju pakinuŭ pa sabie Ŭładymira Mantesynas, šef peruanskaj słužby vyviedki. Siarod 212 padazronych – Viktor Alberta Venera Haryda, nabližany da Mantesynasa, jakoha vinavaciać u machinacyjach z prodažam biełaruskaje zbroi.

Paru tydniaŭ tamu Venera Haryda pakłaŭ u bank Majami (ZŠA) kala 15 miljonaŭ dalaraŭ. Tam jaho j schapili ahienty Federalnaha Biuro Raśśledavańniaŭ – jašče 19 studzienia ŭłady Peru vypisali order na aryšt Haryda, a 22 studzienia da vyšuku padklučyŭsia Interpoł. Rachunak zamarožany, a sam Haryda čakaje ŭ amerykanskaj viaźnicy vydačy na radzimu, dzie jon pojdzie pad sud.

Jak vyjaviłasia, Venera Haryda byŭ bujnym krucialom. Cieručysia la ŭłady, jon damohsia taho, što ŭznačaliŭ vajskovy dy palicyjny pensijnyja fondy dy pačaŭ atrymlivać niebłahi prybytak z manipulavańnia hrašyma peruanskich siłavikoŭ. Jon dy Mantesynas zasnavali ŭłasnyja budaŭničyja kampanii. Spracavalisia niabłaha – muravali kvaternyja kompleksy dy hateli, a potym pradavali ich tamu samamu pensijnamu fondu pa vysačeznych koštach. Takim čynam, Haryda zarablaŭ na tym, što traciŭ padkantrolnyja jamu hrošy.

Najvialikšuju cikavaść ujaŭlajuć machinacyi sa zbrojaj, jakija prakručvaŭ Haryda. Pavodle Associated Press, nabyvajučy zbroju ź Biełarusi, Ukrainy dy Baŭharyi, Haryda zusim nie źbiraŭsia macavać peruanskija vojski. Naadvarot, jaho cikavili pieradusim defektnyja ŭzbrajeńni, jakija možna było vyhandlavać pa małych koštach, a potym pradać svaim vajskoŭcam šmatkroć daražej. Na 17 zamarožanych rachunkach Mantesynasa ŭ švajcarskich bankach lažyć kala 70 miljonaŭ dalaraŭ, atrymanych z handlu zbrojaj.

Pakul niama dakładnych źviestak pra peruanska-biełaruski handal zbrojaj. Pavodle niekatorych źviestak, pačynajučy z 1996 h. Peru nabyła ŭ Biełarusi ad 12 da 21 “MiHaŭ”, ad 14 da 18 šturmavikoŭ “Su-25”, a taksama systemy supraćpavietranaje abarony. Amerykanskaja hazeta Christian Science Monitor śćviardžaje, što ahulnaja suma kantraktaŭ na pastaŭki ŭ Peru adnych tolki biełaruskich “MiHaŭ” dy rasiejskich zapčastak da ich składaje amal miljard dalaraŭ. Vo dzie hrošy!

Kali Biełaruś i sapraŭdy pradavała Peru złamanyja “MiHi”, možna tolki paspačuvać našym vajskoŭcam, jakija razam z parazaju režymu Fuchimory, uciokami Mantesynasa dy aryštam Haryda zhubili niebłahi varyjant prybytkovaj kanversii. Što praŭda, 1 lutaha ŭ Miensk zavitaŭ ministar zamiežnych spravaŭ Iranu. Nie zarastaje «ściažynačka małaja». Jak pakazvaje praktyka, “liški ŭzbrajeńnia” nikoli nie byvajuć zališnimi.

Heta ŭžo druhi skandał z karupcyjnymi kantraktami na łamanuju avijatechniku, pastaŭlenuju ź Biełarusi ŭ zamorskija dziaržavy. Pra analahičnuju ŭhandyjskuju aferu «NN» pisała raniej.

Aleś Kudrycki