Z usioj krainy

 Z usioj krainy

Pamierła Maryja

U vioscy Nižnija Žary Brahinskaha rajonu pamiorła najstarejšaja žycharka Biełarusi i planety Maryja Šaraja, jakoj było 124 hady. Maryja Šaraja pažyła ŭ troch stahodździach, a XX-je pražyła całkam. Pamiorła jana cicha, a chavali jaje ŭsioj vioskaj. Była na tym pachavańni i 104-hadovaja adnaviaskoŭka spadaryni Maryi, jakaja pamiataje niabožčycu jašče niaviestaj.

Zachad i Ŭschod krainy

Na zachadzie Biełarusi złačynnaść udvaja nižejšaja, čym na ŭschodzie. Pra heta paviedamiŭ ministar unutranych spravaŭ U.Navumaŭ. Samaja vysokaja złačynnaść — na Viciebščynie. Mała adstajuć ad jaje Mahiloŭskaja i Homielskaja vobłaści.

Padvysili minimałku

Z 1 sakavika minimalny zarobak padvysili da 5700 rub. (byŭ 3600), a taryfnaja staŭka pieršaha razradu składzie 11500 rub.

Aleś Kudrycki

Kat biez hałavy

Nieviadomymi biełaruskimi patryjotami byŭ pazbaŭleny hałavy pomnik Uljanavu-Leninu, što stajaŭ na terytoryi škoły ŭ Žabincy. “Takim čynam biełaruskija chłopcy vykazali svaje adnosiny da kata, što źniščyŭ sotni tysiač synoŭ i dačok biełaruskaha narodu”, — havorycca ŭ liście, dasłanym u “NN”.

Zabojca paviesiŭsia
ŭ drabilni

Ranicaj u Dzień śviatoha Valancina cmurhonskuju milicyju padniaŭ na nohi zvanok z Zaleśsia (miastečka la Smurhoniaŭ) — znojdzieny trup žančyny. Jak vyśvietliłasia, zabili jaje napiaredadni śviata, uviečary. Na ciele achviary — dva ślady ad naža i čatyry ad siakiery. Abvieścili pošuki zabojcy, u hazecie navat fatazdymak dali i prykmiety abvinavačanaha z abiacańniem uznaharody j ananimnaści, kali złoviać. I jaho znajšli praz 11 dzion paśla zabojstva ŭ zakinutaj drabilni sylikatnaha zavodu. Złačynca paviesiŭsia i pakinuŭ dźvie paśmiarotnyja zapiski. Jon kajaŭsia ŭ zroblenym, u tym, što i sam staŭ achviaraj abstavin.

Zabojca i achviara byli znajomyja, navat blizkija adno adnamu ludzi. Niekatory čas žyli razam. Ale napiaredadni zabojstva mocna pasvarylisia. Kažuć, jana (miž inšym, pracavała biblijatekarkaj i mieła 43 hady) vyhnała jaho sa svajoj chaty. I jon adpomściŭ. Śledčyja kazali — žudasnuju karcinu jany ŭbačyli: pakutnica ŭ sarai, u hnoi, u łužynie kryvi. A tyja, chto ź joj pracavaŭ, kazali, što jana zaŭsiody vyhladała ščaślivaj i viasiołaj, choć žyćcio jaje nie škadavała... I ŭrešcie nie paškadavała kančatkova.

Pikietčyk

Viktara Turaŭca, siabra KCHP BNF, u Smurhoniach viedajuć usie. Nie imia, a jaho biaskoncyja pikiety. Za minuły hod jon vychodziŭ da “Hastranomu” (zvyčajnaje miesca pikietavańnia) 6 razoŭ. Čatyry pikiety zaprašali bajkatavać vybary ŭ Pałatu, astatnimi Viktar pratestavaŭ suprać niezakonnych dziejańniaŭ ciapier užo byłoha namieśnika načalnika milicyi, jaki zabraŭ u baraćbita tabličku ab zbory podpisaŭ za niezaležnaść krainy. Apošni pikiet adbyŭsia 25 lutaha, jak zaŭsiody, u niadzielu. Cełuju hadzinu siabar KCHP razam z žonkaj prastajaŭ na marozie ź plakatami antyłukašenkaŭskaha źmiestu. Jany razdavali ŭlotki, razmaŭlali z narodam. Adzin niadobrazyčlivy hramadzianin padyšoŭ: ja z KDB, kaža, stralaŭ by takich, jak ty, kaža. Paabiacaŭ pazvanić “svaim chłopcam”. Potym padjechała milicyja. Padasłali niejkich dziaciej, jakija fatahrafavali Viktara. Jon pakazaŭ chłopčykam jazyk.

Taciana Skarynkina, Smurhoni

Intehracyja
pa-savieckaarmiejsku

U minułuju niadzielu žychary vioski Krašyn, što pad Baranavičami, adčuli, što vadapravodnaja vada padazrona śmiardzić.

Sanepidemstancyja adrazu ž zabaraniła pić vadu z kranaŭ i pačała chlaravać vadapravodnuju sietku. Na ščaście, nichto nie atruciŭsia. Što da pryčynaŭ zdareńnia, dyk, vidać, ramontnaja bryhada, ramantujučy kanalizacyju 23 lutaha, pabłytała truby i złučyła jaje z vadapravodam.

Zahinuŭ taksoŭca

1 sakavika na hadzinu spyniŭsia ruch na centralnych vulicach Baranavičaŭ. Chavali kiroŭca taksoŭki, što źnik dva tydni tamu, a dniami byŭ znojdzieny za horadam u svajoj mašynie “Aŭdzi-80”. Kala 300 taksoŭcaŭ supravadžali niabožčyka da mohiłak. Kalona mašynaŭ z čornymi stužkami na antenach raściahnułasia amal na 2 km.

Rusłan Raviaka, Baranavičy

Kanfiskavali
33 tysiačy dalaraŭ

Amal 33 tysiačy dalaraŭ kanfiskavali ŭ adzin dzień pamiežniki ŭ punkcie propusku “Katłoŭka”. Hrošy, nia ŭniesienyja ŭ deklaracyju, sprabavali pravieźci troje litoŭcaŭ. Spačatku ŭ kiroŭcy aŭtafurhona “Volva” znajšli 2700 dalaraŭ i 500 marak. Zatym u abšyŭcy aŭtamabila “Falksvahien” — jašče 3400 dalaraŭ. Ale najbolš važki siurpryz čakaŭ achoŭnikaŭ miažy ŭ “Aŭdzi-100”, jakaja naležała litoŭcu. Krychu bolš za 26 tysiač dalaraŭ ZŠA sprabavaŭ jon pravieźci cieraź miažu. Płača ciapier čałaviek...

Marjan Vianhroŭski, Astraviec

Synoŭ nie pakryŭdziŭ

Syn Alaksandra Łukašenki Viktar dva hady tamu ckončyŭ fakultet mižnarodnych dačynieńniaŭ BDU. Paśla karotkaje stažyroŭki ŭ biełaruskim pasolstvie ŭ Niamieččynie jon, jak i baćka, słužyŭ u pamiežnych vojskach. Na “dembiel” sychodziŭ kapitanam, z uznaharoda za vydatnuju słužbu na dziaržaŭnaj miažy.

Ciapier Viktar pracuje pieršym sakratarom upraŭleńnia Eŭropy MZS Biełarusi. Niejkim čynam jamu ŭdałosia pieraskočyć cieraz pasady referenta, ataše, treciaha i druhoha sakrataroŭ. Heta amal toje samaje, kali b vypusknik vajskovaj vučelni adrazu ŭładkavaŭsia na pałkoŭnickuju pasadu.

Michaił Čyhir ličyć hetki karjerny rost syna Łukašenki prajavaj pratekcyjanizmu z boku baćki. “Pračytajcie knihu «Škłoŭskija straści», mnoha novaha daznajeciesia. Tam usio napisana: jak Łukašenka pavodziŭ siabie, kali ŭ saŭhasie pracavaŭ, jak syn jahony pastupaŭ va ŭniversytet. Heta ŭsio viadoma ludziam», — zajaviŭ jon. A Anatol Labiedźka śćviardžaje, što Viktara Łukašenku časta bačyli ŭ Miensku ŭ čas, adviedzieny pad bajavuju i palityčnuju padrychtoŭku, i robić z hetaha vysnovu, što cłužba ŭ taho była našmat lahčejšaja, čym u zvyčajnaha aficera.

Małodšy syn Łukašenki taksama vučycca na dyplamata.

Pavodle Radyjo Svaboda

Mazaičnaja špijonamanija

Biełaruskaje telebačańnie razachvociłasia łavić zamiežnych špijonaŭ. Na hetym tydni palavali na amerykanskich. Pakazvali amerykanskich dyplamataŭ, žyvych i ŭžo ŭ adjeździe, dy nazyvali ich ahientami.

U jakaści dokazu pakazali zapis hutarki z adnym rudym chłapcom, jakoha, byccam by, amerykancy i zaverbavali.

Proźvišča chłapca – Ahalcoŭ, i viedali jaho mnohija biełaruskija aktyvisty. Zaŭvažali jaho to siarod maładafrontaŭcaŭ, to na schodach BPS, dy tak ahalec pabyvaŭ ci nie ŭva ŭsich arhanizacyjach “treciaha sektaru”. Jon ščyra pryznavaŭsia, što jon – siabar junackaj struktury biełaruskich liberał-demakrataŭ, a kali jaho pačynali hetym paprakać, jon apraŭdvaŭsia, što ŭstupiŭ u hetuju arhanizacyju, kab raskłaści jaje ź siaredziny. Viery jamu nichto nidzie nie davaŭ, bo pavodziŭ siabie hety małady čałaviek dziŭnavata. Naprykład, usim raspaviadaŭ, što jahony dziadźka – pałkoŭnik FSB i što jany chočuć pradać zachodnim vyviedkam śpisy ahientaŭ HRU. Jak, maŭlaŭ, heta tolki zrabić?.. Nu, dyk niama durnych!.. Paśla sp.Ahalcoŭ staŭ kazać, što jon adnios tyja śpisy ŭ amerykanskuju ambasadu i što jamu za ich dali 200 dalaraŭ. A paśla źnik z šerahaŭ biełaruskich aktyvistaŭ, kab narešcie źjavicca na BT.

Hetak, BT pieršym vyciahnuła z rukava “supracoŭnika “Narodnaje Voli”, liberał-demakrata Navojeva, druhim – “špijona-maładafrontaŭca” Ahalcova. U nastupnych seryjach nam majuć pakazać zaprodancaŭ, jakija machajuć lichtarykami nataŭskim samalotam-raźviedčykam. Adpaviednyja zdymki vialisia dniami na dachu adnaho z budynkaŭ u Navinkach.

B.T.