Z usioj krainy

 Z usioj krainy

Kunstater vypiŭ

Trajecki kirmaš, što ad 1999 h. pravodzicca ŭ Miensku inicyjatyvaju Fondu kultury z udziełam narodnych majstroŭ z roznych kutkoŭ krainy, 9 červienia prymaŭ Smurhonski rajon. Mastackaja samadziejnaść, vyraby majstroŭ — cacki z tkaniny, vyšyvanyja ručniki, karciny — i pradpryjemstvaŭ-arhanizacyj (naprykład, meblevaja fabryka pradavała dźviery), jatki zazyvali: “Padychodźcie, pabačcie, jak u nas viesieła!” Ale haściej, staličnych žycharoŭ možna było pa palcach pieraličyć. I hetyja ličanyja byli zbolšaha zamiežnyja hramadzianie, jakija ŭ asnoŭnym i zdymajuć šykoŭnyja apartamenty ŭ Trajeckim. Mo nia viedali mienčuki pra śviata (a adkul im było daznacca?). Karaciej, u aŭtobusie pa darozie damoŭ smurhoncy pahadzilisia, što najbolšym uražańniem było, jak Džon Kunstater, namieśnik pasła ZŠA, kaštavaŭ smurhonskaj samahonki i zakusvaŭ małasolnym huročkam.

Taciana Skarynkina, Smurhoni

Sumnieŭnyja doŭhažycharki

115-hadovaja žycharka Francyi Mary Bremon, što pamierła ŭ minułuju sieradu, nie była najstarejšaj žycharkaj planety. Jak paviedamili ŭ Haradzienskim abłvykankamie, u vioscy Małyja Niahnievičy Navahradzkaha rajonu žyvie sp-nia Tekla Babroŭskaja, jakoj sioleta ŭ krasaviku spoŭniłasia 116 hod. Razam ź joj žyvie 80-hadovaja dačka, jany trymajuć haspadarku. A ŭ studzieni ŭ Homielskaj vobłaści pamierła 124-hadovaja Maryja Šaraja.

Praŭda, u 40-ja hady mnohija biełaruskija kabiety nakidali sabie hadoŭ, kab ich užo ŭ kałhas nia hnali.

B.T.

Niaŭstojlivyja husi

U kancy krasavika irlandzkaje ahienctva, što realizuje prajekt «Ustojlivaje raźvićcio pasiołku Śviaciłavičy», pieradało jahonym žycharam 400 husiej. Adnak praź niekatory čas ptuški pačali zdychać. Homielskaja abłasnaja veterynarnaja labaratoryja vyśvietliła, što ptušaniaty zahinuli ad infekcyi, nabytaj jašče na ptuškafabrycy. Apošniaja svaju vinu pryznała i bližejšymi dniami pastavić žycharam Śviaciłavič 270 novych ptušaniat.

Šalonyja lisy

Bolš za 120 čałaviek, što kantaktavali z šalonym lisianiom, źviarnulisia ŭ bolnicy Słonimu. Spačatku chvoraja žyviolina žyła ŭ žaŭnieraŭ tutejšaj vajskovaj častki, a paśla jaje prytulili ŭ słonimskaj škole №9.

A ŭ Pinskim rajonie šalonyja lisy pakusali kałhasnych karovaŭ, dyk piać zdochła. Dajarak ciapier lečać.

Na Zakoziel napali vusieni

Uspyška alerhičnaha dermatytu, vyklikanaha vusieniem załatahuzki, adznačanaja ŭ Darahičynskim rajonie. U palikliniki ŭsio čaściej źviartajucca ludzi sa skarhami na śvierb i pačyrvanieńnie skury. Asabliva paciarpieli žychary vioski Zakoziel. Hałoŭnaj pryčynaj raspaŭsiudžańnia vusienia stali ciopłyja zimy i niedachop jadachimikataŭ. Vusieniaŭ tak šmat, što jany časta padajuć z drevaŭ na ludziej i vyklikajuć vostruju alerhičnuju reakcyju. Na rajonnaj naradzie, pryśviečanaj hetaj prablemie, vyznačanyja miery baraćby z vusieniem. U lipieni-žniŭni planujecca arhanizavać zbor i źniščeńnie pavucinnych hniozdaŭ z vusieniami, a drevy apyrskać jadachimikatami. Kali nie dapamoža, viaskoŭcy źbirajucca źviarnucca da prezydenta.

Encefalit

Pieršyja sioleta zachvorvańni na kleščavy encefalit zarehistravali ŭ Biarozaŭskim rajonie. Zachvareła adna baba i dvoje jaje ŭnukaŭ — 11 i 15 hadoŭ. Zarazilisia, vypiŭšy zaražanaha kazinaha małaka. Kleščavy encefalit vylečvajuć – vypadkaŭ śmierci abo ŭskładnieńniaŭ za apošnija 10 hadoŭ nie adznačałasia. Bolš niebiaśpiečnaja inšaja chvaroba — kleščavy systemny barelijoz. Tym, chto žyvie abo pracuje ŭ lesie, treba abaviazkova rabić pryščepki. Ź viasny ŭ les treba taksama nasić kašuli z rukavami i ahladać siabie čas ad času. Kali klešč usio ž ukusiŭ, varta źviarnucca da doktara i stać na ŭlik.

Razam z kryžam adarvali ruki

U Mahilovie źnikła kopija kryža Eŭfrasińni Połackaj sa skulptury, što na Archirejskim vale. Kopija była vykananaja z dreva j istotnaj kaštoŭnaści nie ŭjaŭlała. Razam z kryžom vandały adarvali ŭ skulptury ruki.

“Nisan” u Dniapry

La vioski Pałykavičy pad Mahilovam u Dniapry znajšli zatopleny aŭtamabil «Nisan Patroł». Niepadalok supracoŭniki milicyi adšukali j trup haspadara ź siečanymi ranami hałavy: 42-hadovy mahiloviec pradstaŭlaŭ u Biełarusi intaresy adnoj rasiejskaj firmy.

Zavaliła čałavieka

U bieraściejskim mikrarajonie Dubroŭka na vulicy Prachadnoj žychary kapali tranšeju pad vodapravod. Kraj tranšei abvaliŭsia, i 20-hadovaha chłapca pa horła zasypała piaskom. Ludzi kinulisia jaho ratavać, ale nie davali rady. Vyklikali ratavalnikaŭ. Jany pryjechali za 4 chviliny i paśpieli raskapać paciarpiełaha žyvym. Toj užo nie varušyŭsia: byŭ u šoku.

Aściarožna, słoik!

6 červienia ŭ Baranavičach na balkonie adnaho ź piacipaviarchovych damoŭ uźnik pažar. Pažarnyja, pryjechaŭšy, ubačyli na zadymlenym balkonie satleły matrac. Apošni zahareŭsia ŭ vyniku fakusavańnia soniečnych promniaŭ praz trochlitrovy słoik z prazrystaj vadkaściu, jaki stajaŭ na haŭbcy. Cikaŭnyja pažarnyja praviali eksperyment: pastavili słoik tak, kab promni traplali na sałomu. Chutka jana pačała tleć.

Pavodle BiełaPAN

Da załatoha vieraśnia

Pakrysie da bankructva nabližajecca žyllova-kamunalnaja haspadarka. Dziaržava rezka skaračaje tradycyjnyja datacyi, adnačasova zabaraniajučy na praciahu leta padvyšać taryfy dla nasielnictva. Ciapier kamunalnikam adno zastajecca padličvać straty j mierkavać, jak padrychtavacca da zimy. Nie vypadaje zekanomić navat na haračaj vadzie. Mienski mer Paŭłaŭ zapatrabavaŭ skaracić terminy tradycyjnych “prafilaktyčnych” ramontaŭ ciepłasietak ź miesiaca da dvuch tydniaŭ.

Spyniajecca handal praduktami charčavańnia z namiotaŭ i aŭtapryčepaŭ na Kamaroŭcy. Aficyjnaja versija — “rekanstrukcyja rynku” — chočuć budavać novuju šmatpaviarchovuju aŭtastajanku.

Tym časam stała viadoma, što zapazyčanaści pa zarobkach buduć pavialičvacca. Ministar finansaŭ Korbut na minułym tydni pryznaŭ, što prablemy z vykanańniem dachodnaj častki jak respublikanskaha, tak i ŭsich miascovych biudžetaŭ nablizilisia da krytyčnaj miažy. Heta adčujuć nastaŭniki, jakija razam z vučniami syduć praz kolki tydniaŭ na tradycyjnyja vakacyi, a svaje hrošy buduć atrymlivać častkami až da vieraśnia.

Viadomaja stała i cana sioletnich “dažynak”. Jany buduć kaštavać kala 4 miljardaŭ rubloŭ — amal 3 miljony dalaraŭ.

Siaržuk Ivanoŭski

Paciarpiełyja za Biełaruś

31 traŭnia ŭ Miensku byŭ zatrymany maładafrontaviec Ivan Tamaševič za toje, što prajechaŭ na rolikach ad vykankamu SND da Administracyi prezydenta ź bieł-čyrvona-biełym ściaham u rukach. U noč z 31 traŭnia na 1 červienia za rasklejku nalepak zatrymali zubroŭcaŭ Cimocha Drančuka, Alaksieja Šydłoŭskaha, Irynu Toŭścik i Valerja Siulda. U Horadni 1 červienia zatrymali Alaksieja Saleja, jaki fatahrafavaŭ, jak sałdataŭ vyvieli rukami irvać travu na hazonach kala abłvykankamu pierad pryjezdam Sielaźniova, zatrymali taksama padčas maładziovaj akcyi pratestu Śviatłanu Niech, Źmitra Jahorava dy administratara kaviarni, jaki vyjšaŭ na vulicu papalić u hety čas. U Barysavie padčas akcyi zubroŭcaŭ zatrymali Siarhieja Padzołku, Źmitra Fiadorčanku, Alesiu Jasiuk z dačkoj Tacianaj. U noč z 4 na 5 červienia ŭ Miensku zatrymali zubroŭcaŭ Alaksieja Šydłoŭskaha, Cimocha Drančuka, Źmitra Drapačku i Alesia Apraniča. 5 červienia ŭ Horadni adbyŭsia sud nad Tadevušam Havinym, zatrymanym padčas akcyi “Chočam viedać praŭdu”. Dali 3 nočy aryštu. U Viciebsku 6 červienia zatrymali Irynu Bajdak, jakaja razdavała navučencam Veterynarnaj akademii ŭlotki. U Mazyry za rasklejku nalepak zatrymlivali Kiryłu Muchina i Jaŭhiena Ancipava. 7 červienia ŭ Homieli zatrymali Sieržuka Paŭlankoviča, Źmitra Haŭrucika, Andreja Vitušku i Kryścinu Sidun, jakija razdavali «Studenckuju Hazetu».