dyplamatu ABSE nie praciahnuta viza
Misija niemahčymaja
U paniadziełak biełaruskija ŭłady nie padoŭžyli vizy jašče adnamu dyplamatu ABSE. Biełaruś daviałosia pakinuć anhielcu Endru Karpenteru, treciaj asobie ŭ misii. Ułady nia tolki admovilisia padoŭžyć jamu vizu, ale i pazbavili akredytacyi. Heta nia stałasia niespadziavankaj dla Karpentera: jašče na minułym tydni jon arhanizavaŭ raźvitalnuju sustreču ź mienskimi znajomymi.
15 krasavika biełaruskija ŭłady hetkim ža čynam prymusili pakinuć krainu namieśnika staršyni kansultacyjna-nahladalnaj hrupy francuza Mišela Ryvalje. Biełaruś niekalki miesiacaŭ nia choča puskać da siabie niemca Eberharda Hajkiena, jaki pavinien byŭ uznačalić misiju. U biełaruskaj KNH ABSE zastalisia tolki dva zamiežnyja supracoŭniki — amerykanka, termin dziejańnia vizy jakoj zaviaršajecca ŭ kancy lipienia, i hramadzianka Małdovy, dla jakoj viza nie patrebna. Takoje stanovišča praktyčna paralizavała pracu misii.
Niezdavalnieńnie aficyjnaha Miensku vyklikali zanadta častyja, na dumku ŭład, kantakty dyplamataŭ ABSE z apazycyjaj i zanadta redkija — z uładaj, što asabliva kidałasia ŭ vočy padčas apošnich parlamenckich i prezydenckich vybaraŭ. Papiaredniaha kiraŭnika misii Hansa-Hieorha Vika ŭradavaja presa adkryta nazyvała špijonam. Tydzień tamu na zakrytym pasiadžeńni parlamentu staršynia KDB Ł.Jeryn paŭtorna abvinavaciŭ pradstaŭnikoŭ ABSE ŭ špijonskaj dziejnaści. “Niaŭzbrojenym vokam vidać, što jany ŭmiešvajucca ŭ našy ŭnutranyja spravy”, — skazaŭ Jeryn.
Biełaruś choča, kab misija źmianiła status, pierš za ŭsio abmiežavaŭšy kantakty z apazycyjaj i niaŭradavymi arhanizacyjami. Ułady prapanujuć svajo pasiarednictva ŭ takich kantaktach. A.Łukašenka vykazaŭ žadańnie, kab kantakty z ABSE adbyvalisia biez pasiarednictva misii, a naŭprost. Dyplamaty ABSE niepakojacca, što prykład Biełarusi mohuć pieraniać inšyja dziaržavy, u jakich nia ŭsio ŭ paradku z zachavańniem demakratyčnych pryncypaŭ i pravoŭ čałavieka.
Siońnia ŭ štacie Arhanizacyi pa biaśpiecy i supracoŭnictvie ŭ Eŭropie pracujuć 4 tysiačy čałaviek ŭ 19 krainach ad Bośnii da Tadžykistanu. 85% jaje biudžetu idzie na nazirańnie za vybarami, abaronu svabody słova, seminary dla palicejskich, turemnych nahladčykaŭ i dziaržaŭnych čynoŭnikaŭ.
S.P.
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?12
Kamientary