Liceisty pajeduć da Mandeły

Liceisty pajeduć da Mandeły

Pry kancy leta kamanda biełaruskich školnikaŭ vypravicca ŭ Paŭdniova-Afrykanskuju Respubliku na mižnarodnuju alimpijadu pa hieahrafii. Troje z čatyroch školnikaŭ — navučency Biełaruskaha liceju imia Jakuba Kołasa. Cikava, što adzin ź pieramožcaŭ respublikanskaje alimpijady — chłopiec, jaki prachodziŭ častku kursu siaredniaj škoły doma, kali była začynienaja jahonaja biełaruskaja klasa.

Aŭhińnia Sidarčuk čaćviertakurśnica, Źmicier Kožuch i Aleś Jokša — treciakurśniki. Čaćviorty ŭdzielnik kamandy — navučeniec Liceju BDU.

Aleś Jokša, vučyŭsia peŭny čas adzin, pa asobnaj prahramie. U 1998 h., kali kiraŭnictva škoły začyniła biełaruskija klasy, jon u znak pratestu miesiac nie naviedvaŭ zaniatkaŭ. Paśla ŭmiašańnia haradzkoha adździełu adukacyi sytuacyju vyrašyli takim čynam: častku ŭrokaŭ (rasiejskaja i biełaruskaja movy i litaratury, historyja Biełarusi, zamiežnaja mova) chłopiec vyvučaŭ razam z klasaj, a astatnija — pa-biełarusku, pa asobnym hrafiku, składzienym dla jaho nastaŭnikami. Paśla Aleś pastupiŭ u Nacyjanalny licej, dzie zmoh vučycca pa-biełarusku razam z adnahodkami.

Udzieł u haradzkich, a potym i ahulnanacyjanalnych alimpijadach pa hieahrafii navučency Nacyjanalnaha liceju biaruć z 1996 h. Za hety čas jany 22 razy pieramahali, a vypuskniki liceju Maryja Mandryk, Siarhiej Kucuk, Lizavieta Takareŭskaja, Aŭhińnia Sidarčuk navat daterminova stali studentami hieahrafičnaha fakultetu BDU. U 1999 h. Alaksiej Aniejčyk uvachodziŭ u biełaruskuju kamandu na alimpijadzie ŭ Seule. Našyja školniki tady zaniali šostaje miesca.

Usio heta — dziakujučy nastaŭnicy hieahrafii, zavuču liceju Irynie Sidarency. Za pośpiechi ŭ vychavańni dziaciej Minadukacyi ŭznaharodziła jaje zvańniem vydatnika adukacyi.

Pytańnie pra sioletni ŭdzieł biełaruskaj kamandy ŭ mižnarodnaj alimpijadzie pakul jašče kančatkova nia vyrašanaje. Zajavu Ministerstva padało sa spaźnieńniem, adnak nadzieja na stanoŭčy vynik jość. Dziela taho kab kamanda biełaruskich školnikaŭ usio ž zmahła patrapić na alimpijadu, dyrektar liceju Ŭładzimier Kołas nakiravaŭ list prezydentu PAR Nelsanu Mandełu, z prośbaj paspryjać u vyrašeńni prablemy. A navučency, tym časam, rychtujucca da alimpijady j udaskanalvajuć anhielskuju — adkazvać daviadziecca na joj.

Aprača hieahrafičnaj alimpijady, biełaruskija vučni buduć sioleta ŭdzielničać jašče ŭ piacioch padobnych mižnarodnych spabornictvach: pa fizycy (vostraŭ Bali, Indanezija), pa infarmatycy (Paŭdniovaja Kareja), pa matematycy (Vialikaja Brytanija), pa bijalohii (Łatvija), pa chimii (Niderlandy).

Arkadź Šanski