Ekanamičnaja chronika. 5 śniežnia

Kampensacyja ŭkładaŭ... Valutnaja liberalizacyja... Strajkam — pa zapazyčanaści... Novy rynak u Homli... Krynica” — pieršaja...

Kampensacyja ŭkładaŭ

3 śniežnia pracoŭnaja hrupa pałaty pradstaŭnikoŭ pačała razhladać zakonaprajekt “Ab pakryćci bankaŭskich układaŭ fizyčnych asobaŭ”. Jaho meta — zabiaśpiečyć kampensacyju tym, chto stracić hrošy, pakładzienyja na rachunak. Całkam kampensujuć układy da 2 tys. dalaraŭ, a da 5 tys. dalaraŭ — u miežach 80%. Zajmacca hetym budzie Rezervovaja karparacyja, u jakuju ŭvojduć usie banki krainy.

Valutnaja liberalizacyja

Nacyjanalny bank da 1 studzienia 2004 h. dazvoliŭ pradprymalnikam kuplać najaŭnuju zamiežnuju valutu za bieznajaŭnyja rubli, kab nabyvać tavary za miažoj. Pieraličvać rubli možna z raźlikovaha rachunku pradprymalnika. Pry hetym nia treba adkryvać admysłovy rachunak dla zachoŭvańnia zamiežnaj valuty, deklaravać metavaje vykarystańnie dy termin zachoŭvańnia valuty. Nabyvać jaje možna ŭ kasach banku.

Strajkam — pa zapazyčanaści

29 listapada pracaŭniki homielskaha Kambinatu budaŭničych kanstrukcyjaŭ spynili pracu, bo im čatyry miesiacy nie płacili hrošaj. Ministerstva architektury j budaŭnictva, jakomu padparadkoŭvajecca kambinat, paabiacała ŭziać kredyt na 122 tys. dalaraŭ pad 10% hadavych, kab addać zapazyčanaść. 2 śniežnia zastrajkavali niekalki cechaŭ “Mahiloŭdreva”, bo im nia vypłacili zarobkaŭ za vierasień.

Novy rynak u Homli

1 śniežnia ŭ Homli adčyniŭsia novy rynak “Prudkoŭski”. Heta kompleks z 16 halerejaŭ, 5 praduktovych paviljonaŭ dy raznastajnych kramaŭ ahulnaj płoščaj 6 ha. Firma “Sabina”, jakoj naležyć rynak, źmienšyła arendnuju płatu za śniežań-luty na 10—15%, kab handlary mahli krychu skinuć ceny dy pryciahnuć pakupnikoŭ.

“Krynica” — pieršaja

2 śniežnia ŭ Maskvie prajšoŭ konkurs “Piva, napoi dy mineralnyja vody”, u jakim udzielničali bolš za 100 kampanijaŭ z SND. Našaja “Krynica” — absalutnaja pieramožca. “Cevita” atrymała hran-pry ŭ naminacyi suchich napojaŭ, raspuščalnaja harbata “Cipsi” — załaty medal. “Porter” zaniaŭ pieršaje miesca siarod ciomnych hatunkaŭ piva, “Miensk” — siarod śvietłych.

Cement na biblijateku

24-paviarchovy hmach Nacyjanalnaj biblijateki zbudujuć na vaŭkavyskim cemencie. Na tym tydni AT “Krasnasielskbudmateryjały” atrymała zamovu na pastaŭku 6 tys. t cementu marki “500”. Zamovu vykanajuć ciaham troch miesiacaŭ. Vaŭkavyski cement duža tryvały — jaho vykarystoŭvali padčas budaŭnictva Asuanskaj płaciny dy mienskaha metro. Maskoŭskaja Astankinkaja vieža nie abvaliłasia paśla pažaru dziakujučy cementu z-pad Vaŭkavysku, ź jakoha jana zroblenaja.

Lifty dla invalidaŭ

“Mahiloŭliftmaš” raspačaŭ seryjnuju vytvorčaść liftaŭ dla invalidaŭ. Dźviery ŭ tych liftach šyrejšyja, čym u zvyčajnych, — kab volna prachodzili invalidnyja vazki. Knopki kiravańnia raźmieščanyja nizka — ich možna naciskać siedziačy. Hetyja lifty planujuć pradavać navat za miažu.

A.K.

• 0
• 0
• 0
• 0
• 0
• 0
• 0
• 0