Učora, u čaćvier, na pasiedžańni Biełaruskaj federacyi futbołu hałoŭny trener zbornaj Jury Puntus paprasiŭsia ŭ adstaŭku.
Učora kiraŭnik administracyi prezydenta i staršynia Biełaruskaj federacyi futbołu Hienadź Niavyhłas pravioŭ pasiedžańnie z udziełam treneraŭ zbornych Biełarusi roznych uzrostaŭ, kamand vyšejšaj lihi i kiraŭnikoŭ klubaŭ.
Hałoŭnym punktam abmierkavańnia było stanovišča ŭ nacyjanalnaj i moładzievaj zbornych krainy. Na pasiedžańni sa spravazdačaj vystupiŭ hałoŭny trener zbornaj Jury Puntus. Jon pahadziŭsia, što pastaŭlenyja zadačy jon nia vykanaŭ i paprasiŭsia ŭ adstaŭku.
Pakul što nichto jaho zajavu nie padpisvaŭ i rašeńnie nia nosić kančatkovaha charaktaru, adnak mała chto sumniajecca, što na nastupnym pasiedžańni BFF, jakoje projdzie ŭ Bieraści, hetaja prośba budzie zadavolenaja.
Zadačaj‑minimum dla Puntusa było zaniać treciaje miesca ŭ svajoj adboračnaj hrupie da čempijanatu Eŭropy. Adnak paśla siami turaŭ kamanda idzie tolki na piatym miescy, majučy ŭsiaho siem punktaŭ. U červieni družyna Puntusa dvojčy biazvolna prajhrała baŭharam. Paśla toj hulni ažno pajšli čutki, što matč byŭ pradadzieny.
Siarod pretendentaŭ na miesca Puntusa fihurujuć byłyja nastaŭniki zbornaj Anatol Bajdačny i Michaił Vierhijenka, a taksama «koŭč» moładzievaj zbornaj Jury Kurnienin. Čytačy hazety «Priessboł» u svaju čarhu hałasujuć za zamiežnaha specyjalista.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii13
Kamientary