Navina pra toje, što rasiejcy, niezadavolenyja vybrykami baćki, źbirajucca ŭźniać ceny na enerhanośbity, pryjemna ŭzradavała. Biełarusam znoŭ paščaściła. Taksaj za ŭvachod u volny kapitalistyčny rynak budzie ŭsiaho niekalki tysiačaŭ admarožanych členaŭ i chraničny nasmark — nastupstvy pierabojaŭ z haračaj vadoj u nastupnuju zimu.
Heta, paviercie mnie, drobiaź. Kitajcaŭ, jakija nie chacieli adčyniać havani inšaziemcam, abstrelvali z karabielnych harmataŭ i padsadžvali na opijumnuju šyrku, benhalcaŭ — kankurentaŭ brytanskich tekstylščykaŭ — maryli hoładam, a arabaŭ, jakija nacyjanalizavali Suecki kanał, fuhasili bombami.
Asabistym psychalahičnym faktaram biełaruskaj škoły vyžyvańnia ŭ rynkavych umovach stanie dušeŭny patryjatyčny žar. Arhumentujučy svaju palityku, Łukašenka pačnie «juzać» ideju niezaležnaści, čym znoŭ zahonić pravuju i levuju apazycyju ŭ stan kryzysu žanru.
Pravym apazycyjaneram — lohka. Buduć i dalej bubnić svaju mantru pra dobraha cyvilizavanaha investara z Zachadu z sacyjalna adkaznaj etykaj. Toje, što adzin ź ich — niamieckaja kampanija — planavaŭ uźvieści ŭ Kurapatach žyły kompleks, ich nie pierakanaje. Jak i toje, što histaryčna pieršymi investarami na peryferyi zaŭsiody byli eks-kalanizatary. U byłych afrykanskich francuskich kalonijach viarški z pryrodnaj renty zdymaje «Elf», u brytanskich — «British Petroleum» i h.d. Uvieś śviet takim čynam i pryjšoŭ da rynku.
Dla šmatlikich levych nacyjanał-papulizm kudy pryvabniejšy za dyktat zamiežnych manapolij. U Konha-Kinšasa, pa terytoryi pryblizna roŭnym Eŭraźviazu, napiaredadni vyzvaleńnia ad belhijcaŭ było ŭsiaho dzieviać tubylcaŭ z vyšejšaj adukacyjaj. Padčas praŭleńnia miascovaha kniaźka Mabutu Sese Seka, jaki raskraŭ krainu ŭščent, pa basejnie raki Konha badzialisia ŭžo sotni tysiač čarnaskurych z «VNUšnymi koračkami».
Siońnia levyja pavinny vyznać, što ŭ časy hlobki (hlabalizacyi) paternaliscka-dziaržaŭny kapitalizm nie źjaŭlajecca prezervatyvam ad virusu biudžetnaha deficytu na sacyjalnyja prahramy. Režym Łukašenki ŭsio ž padparadkavany trajektoryi madeli «raźvićcia naŭzdahon». Jak śviedčyć dośvied krainaŭ z pratekcyjanisckim typam kiravańnia — Birmy, Kitaju, — usio skončycca banalna: mandaryny buduć cicha pradavać dziaržmajomaść.
Dyj nacyjanalizm a-la Łukašenka — heta nabor ekspanataŭ stročyckaha muzeju kultury, «Saŭka dy Hryška dziełali dudu», Kupała i kinachałtura «Nastaśsia Słuckaja».
Levy nacyjanalny prajekt — heta forma źniaćcia adčužeńnia, viartańnie asobie pačućcia tvorcy historyi, kultury i haspadara hramadztva. Advarotnym bokam archaizacyi kulturnaj tradycyi źjaŭlajecca kanservacyja dumki i pravincyjalizacyja.
Adnosiny adčužeńnia charakternyja jak dla łukašenkaŭskaj, tak i dla frytrejderskaj madelaŭ.
Maju nadzieju, što pravakacyi biełaruskich levych buduć padparadkavanyja idei pošuku alternatyvy adčužeńniu i emansypacyi asoby, a nie «antyimperyjalistyčnamu partnerstvu» i farmalnaj apazycyi.
Pryvitańnie Sieviaryncu.
Lolik Uškin
Ciapier čytajuć
«Kajłas, ja idu». Što za biełaruska źnikła ŭ žudasnym sieli ŭ Niepale12
Kamientary