Tvary hodu

2003

Śviatłana Zielankoŭskaja — aktrysa hodu i seks-symbal biełaruskaha kino. U «Nastaśsi Słuckaj» jana, nivodnaha razu nie ahaliŭšysia, uvasobiła całkam aholenuju dziaržaŭnuju idealohiju, a ŭ «Akupacyi» syhrała partyzanskuju Maryju Mahdalenu. Ciapier byłaja aktorka Kupałaŭskaha teatru, Čornaja panna Niaśvižu, śpiavačka «Hościcy» zadumała z svajoj supiernicaj pa «Nastaśsi» Vieranikaj Kruhłovaj supolny muzyčny prajekt «Supiernicy». Nastaśsia — adhałosak postsavieckaj nastalhičnaj mody na ŭsio słavianskaje. Słavianskaje ŭ nas usio — ad kaŭbasaŭ da šakaladu. Ale to Nastaśsia. Śviatłana ž — hustoŭnaja artystka i sapraŭdny etalon biełaruskaj pryhažości-2003.

Kaleha pa cechu Nikol Kidman u filmie Łarsa fon Tryjera «Dohvil» demanstruje, jak kvołaja achviara čałaviečaj žorstkaści moža pieratvarycca ŭ biaźlitasnaha zabojcu, nie pazbaŭlenaha, adnak, pryciahalnaści. Karjera aktorki zaŭvažna pajšła ŭharu paśla razvodu z Tomam Kruzam.

Płyŭčycha Alaksandra Hierasimienia stała biełaruskaj Karalevaj sportu'2003, niahledziačy na dyskvalifikacyju za ŭžyvańnie dopinhu. Jašče Alaksandra sioleta pasprabavała siabie ŭ kino. Praŭda, u animacyjnym: była zaŭvažanaja siarod «haściej ź inšaziemnych abłaściej» u klipie «Krambambuli».

Kitajanka Ki Huan stała tolki treciaj mis śvietu, choć čempijanat pravodziŭsia akurat u jaje na radzimie. Aŭtarytet Krysa de Burha, baćki hałoŭnaj pryzerki, pieravažyŭ upadabańni kitajcaŭ, jakija z usiaje mocy lubili svajo. Pieramožca — absalutna standartnaja blandynka z banalnymi rysami tvaru. Ci nia čas uhladziecca ŭ tvar kitajskaj pryhažuni, za jakoj — miljardy jaje suajčyńnikaŭ i bolš jak tysiačahadovaja kultura? Sioleta ž palacieŭ u kosmas pieršy kitajec Jan Livej — i bieź nijakich kačaharaŭ.

Jašče adzin pryhažun-avijatar Rałandas Paksas uvajšoŭ u krutoje pikie: praz paŭhodu paśla abrańnia prezydentam Litvy apynuŭsia na miažy impičmentu praz karupcyju. Parlament bušuje, a prostym litoŭcam Paksas daspadoby: mała taho što lotčyk, jašče i śpiavaje pryhoža.

Na hruzinskuju śpikierku Nino Burdžanadze zahladaŭsia ŭ dni «ševardnadzehiejtu» ŭvieś śviet. Navat płejboj Saakašvili da prezydenckich vybaraŭ 4 studzienia pryznaŭ jaje carycaj.

Kali mianiaje pryčosku Devid Bekchiem, kapitan anhielskaj nacyjanalnaj zbornaj pa futbole, heta robiać uśled usie jahonyja fany. Maradona kaža — Bekchiem zanadta pryhožy dla futbolnaha pola; Ranalda kaža — Bekchiem pacieje adekalonam, a anhielskija sacyjolahi padviali pad jaho papularnaść navukovuju bazu: maŭlaŭ, futbolnaja zorka ŭdała spałučaje rysy mužčynskaści i chłapiečaści, jon pracavity spartsmen i haspadarlivy muž, jon źmianiŭ staŭleńnie anhielcaŭ da siamji i pryviŭ im talerantnaść da homaseksualistaŭ.

Na źmienu halivudzkamu šarahoŭcu Rajanu pryjšła całkam realnaja amerykanskaja vajarka Džesyka Linč. Jana trapiła ŭ pałon u Iraku, i jaje vyzvaleńnie padavałasia medyjami jak symbal pieramohi ŭ niespadziavana zaciahnutym blickryhu. 19-hadovaja Džesyka pryznavałasia, što ŭ pustelni joj nie chapała drevaŭ: dziaŭčyna ŭsio žyćcio praviała siarod lasoŭ. Voś vam aluzija na Tarzana.

Joška Fišer, 55-hadovy ministar zamiežnych spravaŭ Niamieččyny, sioleta raźvioŭsia z svajoj čaćviortaj (!) žonkaju. I aženicca ŭ piaty raz. Z kožnym razam jahonyja abrańnicy robiacca ŭsio maładziejšyja. Adzin z słohanaŭ vybarčaj kampanii'2002 byŭ: «Zialonyja — seksi». Pierakanaŭčaści ŭ vačach vybarščyc jamu nadało pakazalnaje pachudańnie na dziasiatki kilahramaŭ.

Sadama Chusejna niepaznavalna źmianili miesiacy, praviedzienyja ŭ schovankach. Fatazdymki raptoŭna sastarełaha na niekalki dziesiacihodździaŭ Sadama z pavucińniem u baradzie — strašyłka dla ŭsich dyktataraŭ.

VD, SM

• 0
• 0
• 0
• 0
• 0
• 0
• 0
• 0