Levanieŭski, Ivanoŭski, Mamul

U Horadni zvyš za 9 tysiač indyvidualnych pradprymalnikaŭ. Letaś jany zabiaśpiečyli pastupleńnie zvyš jak 13% biudžetu horadu, vytvorčaść 4% pramysłovaj pradukcyi i 7% — spažyvieckich tavaraŭ. Adnak adnosiny haradzkich uładaŭ i pryvatnych handlaroŭ nazvać dobrymi nielha. Prablemy apošnich vyrašajucca biez uliku ich intaresaŭ. U čas pieršamajskaha mitynhu dvoje z troch haradzienskich pradprymalnickich lideraŭ siadzieli ŭ viaźnicy.

Sakavik—krasavik vybuchnuŭ šeraham pradprymalnickich akcyj. Napačatku adbyŭsia «maŭklivy» pratest. Na płoščy Lenina pierad harvykankamam sabralisia čatyry sotni čałaviek. Pradstaŭniki małoha biznesu svajoj «hučnaj cišynioj» patrabavali palepšyć umovy raźvićcia pradprymalnictva. Ludzi stavili podpisy pad zvarotam da prezydenta, nacyjanalnaha schodu i Savietu ministraŭ. Patrabavali admieny licenzavańnia roźničnaha handlu, normy ab ustanoŭcy kasavych sumujučych aparataŭ u pasažyrskim aŭtatransparcie, najaŭnych narmatyŭna-pravavych aktaŭ, jakija pieraškadžajuć raźvićciu pradprymalnictva, novych praviłaŭ handlu na rynkach, kali lubyja parušeńni ciahnuć za saboj vialikija štrafy.

Adzinym paciarpiełym u vyniku mitynhu staŭ namieśnik staršyni respublikanskaha abjadnańnia pradprymalnikaŭ «Perspektyva» Źmicier Ivanoŭski. Jaho zatrymali napiaredadni akcyi. Jon mieŭ pry sabie ŭlotki, jakija zaprašali pradprymalnikaŭ padtrymać «maŭklivy» pratest. Sp.Ivanoŭski adbyŭ dziesiać sutak administracyjnaha pakarańnia za pieravyšeńnie kolkaści drukavanaj pradukcyi. Pavodle zakonu možna da 300 ekzemplaraŭ…

26 sakavika dziaržaŭnyja kantralory zrabili kantrolny zakup na rynku «Karona» i pačali apisvać majomaść pradprymalnika. Za tavaryša zastupilisia inšyja. Pradstaŭnikoŭ Dziaržkantrolu, jakich abaraniali milicyjanty, vycisnuli na vulicu pad vokličy «Hańba!».

U apošni dzień sakavika drobnyja pradprymalniki znoŭ syšlisia kala harvykankamu. Napahatovie byli milicyja i AMAP. Razmova doŭžyłasia ŭ zali pasiadžeńniaŭ vykanaŭčaha kamitetu. Akramia abiacankaŭ ničoha nie prahučała. Padčas razmovy mnohija pradprymalniki demanstratyŭna pakinuli pamiaškańnie.

Tolki adstaŭka kiraŭnictva

Niekalki hadoŭ tamu adzinym lideram haradzienskich drobnych handlaroŭ byŭ kiraŭnik ahulnanacyjanalnaha strajkamu Valery Levanieŭski. Niejak jamu ŭdałosia sabrać na schod u adnym z pałacaŭ kultury zvyš za 500 čałaviek. Pradprymalniki padtrymlivali srodkami. Vychodziać dahetul biuleteni «Pravo», «Naš horod», «NPB», «Iźbiratiel», «Priedprinimatiel», «Fakieł Promietieja».

Valerja zatrymlivali. Nie pakidajuć jaho ŭ spakoi i ciapier. Niadaŭna skłali pratakoł ab administracyjnym pravaparušeńni: jon nibyta vyviešvaŭ na dźviarach šmatkvaternaha domu, u jakim žyvie, abjavy.

Milicyjanty zatrymali jaho synoŭ — studentaŭ Dźmitryja i Ŭładzimiera. Chłopcy raspaŭsiudžvali na rynkach listoŭki z zaklikam patrabavać 1 traŭnia adstaŭki prezydenta i ŭradu. Takoje rašeńnie pryniaŭ ahulnanacyjanalny strajkam Biełarusi. Levanieŭski-starejšy byŭ zaprošany na pasiadžeńnie administracyjnaj kamisii Leninskaha rajonu horadu.

Levanieŭski maje ŭłasny sajt u Internecie. Tut jon reža praŭdu-matku — pra karupcyju ŭ milicejskich i sudovych orhanach, pra Łukašenku, pra načnuju sprobu złamyśnikaŭ praniknuć u kvateru, pra parušeńni tajamnicy pierapiski. Dasłaŭ adkrytaje piśmo Nadzvyčajnamu i Paŭnamocnamu pasłu Rasiei ŭ Biełarusi.

Inšy raz adčuvańnie miery ŭsio ž padvodzić Valerja Stanisłavaviča. Voś jon havoryć, što mienčuki padčas pieršamajskaj demanstracyi rychtujucca zakidać pradstaŭnikoŭ ułady «tuchłymi jajkami i roznym hnillom»…

Poŭny varyjant artykułu hladzicie ŭ hazecie "Naša Niva".

Anton Łabovič

• 0
• 0
• 0
• 0
• 0
• 0
• 0
• 0